ಬೆಂಗಳೂರು: ಸ್ಯಾಂಡಲ್ ವುಡ್ ನ ಮಾಯಾಬಜಾರ್ ಚಿತ್ರದ ಹಾಡಿಗೆ ಅಮೆರಿಕಾದ ಡ್ಯಾನ್ಸರ್ಸ್ ನೃತ್ಯ ಮಾಡಿದ್ದು, ಪವರ್ ಸ್ಟಾರ್ ಪುನಿತ್ ರಾಜ್ ಕುಮಾರ್ ಅವರು ಈ ವಿಡಿಯೋವನ್ನು ಟ್ವೀಟ್ ಮಾಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಹೌದು, ಅಷ್ಟಕ್ಕೂ ಆ ಹಾಡು ಯಾವುದು, ಏನದರ ವಿಶೇಷತೆ ಗೊತ್ತಾ!? ಇಲ್ಲಿದೆ ನೋಡಿ ಆ ಮಾಹಿತಿ.
ಅಣ್ಣಾವ್ರ ಮಗ ಪುನಿತ್ ರಾಜ್ ಕುಮಾರ್ ಅವರು ನಿರ್ಮಾಣ ಮಾಡಿರುವ ಮಾಯಾಬಜಾರ್ ಚಿತ್ರ ಕಳೆದ ಶುಕ್ರವಾರ ತೆರೆಕಂಡು ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಈಗ ಈ ಚಿತ್ರದ ಟೈಟಲ್ ಸಾಂಗ್ ಗೆ ಅಮೆರಿಕಾದ ಡ್ಯಾನ್ಸರ್ ನೃತ್ಯ ಮಾಡಿದ್ದು, ಈ ವಿಡಿಯೋವನ್ನು ಅಪ್ಪು ಅವರು ತಮ್ಮ ಟ್ವಿಟ್ಟರ್ ನಲ್ಲಿ ಹಂಚಿಕೊಂಡಿದ್ದಾರೆ. ಹೌದು, ಅಮೆರಿಕದ ಡ್ಯಾನ್ಸರ್ ಡ್ಯಾನ್ಸ್ ಅತ್ಯದ್ಭುತವಾಗಿದೆ.
ಡ್ಯಾನ್ಸಿಂಗ್ ವಿಡಿಯೋವನ್ನು ತಮ್ಮ ಟ್ವಿಟ್ಟರ್ ನಲ್ಲಿ ಪೋಸ್ಟ್ ಮಾಡಿರುವ ಪವರ್ ಸ್ಟಾರ್, ಮಾಯಾಬಜಾರ್ ಟೈಟಲ್ ಸಾಂಗ್ ಅನ್ನು ಅಮೆರಿಕಾದ ಮಿನ್ನಿಯಾಪೊಲೀಸ್ ಸಾಥ್ ಕೊರಿಯೋಗ್ರಫಿ ಶಾಲೆಯವರು ನೃತ್ಯ ಮಾಡಿದ್ದಾರೆ. ನನಗೆ ಬಹಳ ಇಷ್ಟವಾಯಿತು. ನಾವು ಮಾಯಾಬಜಾರ್ ಚಿತ್ರವನ್ನು ಇದೇ ಮಾರ್ಚ್ 6 ರಂದು ಅಮೆರಿಕಾದಲ್ಲಿ ಬಿಡುಗಡೆ ಮಾಡುತ್ತೇವೆ ಎಂದು ಟ್ವೀಟ್ ಮಾಡಿದ್ದು ಇದೀಗ ಎಲ್ಲೆಡೆ ಮಾಯಾಬಜಾರ್ ಟ್ರೆಂಡ್ ಶುರುವಾಗುತ್ತಿದೆ.
ನಟ ಪುನಿತ್ ರಾಜ್ ಕುಮಾರ್ ಅವರ ನಿರ್ಮಾಣ ಎರಡನೇ ಸಿನಿಮಾ ಇದಾಗಿದ್ದು, ಈ ಸಿನಿಮಾವನ್ನು ರಾಧಕೃಷ್ಣ ರೆಡ್ಡಿ ನಿರ್ದೇಶನ ಮಾಡಿದ್ದಾರೆ. ವಸಿಷ್ಠ ಸಿಂಹ, ರಾಜ್ ಬಿ ಶೆಟ್ಟಿ, ಅಚ್ಚುತ್ ರಾವ್, ಪ್ರಕಾಶ್ ರಾಜ್ ಮತ್ತು ಚೈತ್ರರಾವ್ ಅವರು ಮಾಯಾಬಜಾರ್‍ನಲ್ಲಿ ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿದ್ದಾರೆ.
ಮನುಷ್ಯ ಬದುಕಲು ಹಣ ಬೇಕು, ಹಣವನ್ನು ಗಳಿಸಲು ಮನುಷ್ಯ ಏನ್ ಬೇಕಾದರೂ ಮಾಡುತ್ತಾನೆ. ಈ ಹಣದ ಸುತ್ತ ತಿರುಗುವ ಕಥೆಯೇ ಮಾಯಾಬಜಾರ್, ಇದರಲ್ಲಿ ಎಸಿಪಿ ಪಾತ್ರದಲ್ಲಿ ಪ್ರಕಾಶ್ ರಾಜ್ ಅತ್ಯುತ್ತಮ ವಾಗಿ ನಟಿಸಿದ್ದಾರೆ. ಪ್ರಾಮಾಣಿಕ ಪೊಲೀಸ್ ಪಾತ್ರಕ್ಕೆ ಅಚ್ಚುತ್ ರಾವ್ ಜೀವ ತುಂಬಿದ್ದಾರೆ. ರಾಜ್ ಬಿ ಶೆಟ್ಟಿ ಕಳ್ಳನ ಪಾತ್ರ ಮಾಡಿದ್ದಾರೆ. ಇವರ ಮಧ್ಯೆ ಯುವ ಪ್ರೇಮಿಗಳಾಗಿ ವಸಿಷ್ಠ ಸಿಂಹ ಮತ್ತು ಚೈತ್ರರಾವ್ ಮೋಡಿ ಮಾಡಿದ್ದಾರೆ.
