స్క్రిప్ట్ విషయంలో అనిల్ రావిపూడి చాలా వేగంగా నిర్ణయాలు తీసుకుంటారు. షూటింగ్ ప్రక్రియను అత్యంత తక్కువ సమయంలో పూర్తి చేసి నిర్మాతలకు భారం తగ్గించడం ఆయన ప్రత్యేకత. ఎంతటి అగ్ర హీరో అయినా తన కథకు అనుగుణంగా వారిని మలచుకోవడంలో ఆయన సిద్ధహస్తుడు. రాజమౌళి తరహాలోనే అనిల్ రావిపూడికి ప్రేక్షకుల పల్స్ బాగా తెలుసు. జనం ఏ సీన్కు నవ్వుతారు, ఏ డైలాగ్కు విజిల్స్ వేస్తారు అనే విషయంలో ఆయనకు స్పష్టమైన అవగాహన ఉంది. చిత్రసీమ మొత్తం భారీ బడ్జెట్ సినిమాలు, అద్భుత లోకాల చుట్టూ తిరుగుతున్న సమయంలో ఆయన సామాన్యమైన కథలతోనే బ్లాక్ బస్టర్ హిట్లు కొడుతున్నారు. ప్రమోషన్ల విషయంలో కూడా ఆయన వ్యూహాలు మెస్మరైజ్ చేస్తాయి.
సాధారణంగా ప్రచార కార్యక్రమాలకు దూరంగా ఉండే నయనతారను కూడా ఒప్పించి రంగంలోకి దింపారంటే ఆయన తెలివితేటలు అర్థం చేసుకోవచ్చు. వరుస విజయాలు అందుకుంటున్నా అనిల్ రావిపూడిపై సోషల్ మీడియాలో విమర్శలు, ట్రోలింగ్ ఆగడం లేదు. ఆయన చేసే కామెడీని 'క్రింజ్' అని కొందరు విమర్శిస్తుంటారు. అయితే ఆ విమర్శలను ఆయన ఎప్పుడూ పట్టించుకోలేదు. అదుపు తప్పి మాట్లాడకుండా తన పనితోనే సమాధానం చెబుతున్నారు. ఒక సినిమా హిట్ అయితే అది అదృష్టం అనుకోవచ్చు, కానీ వరుసగా తొమ్మిది సినిమాలు బాక్సాఫీస్ వద్ద విజయం సాధించాయంటే అది ఖచ్చితంగా ప్రతిభే. ప్రేక్షకులు పిచ్చివారు కాదు, నచ్చితేనే థియేటర్లకు వచ్చి కోట్లు కుమ్మరిస్తారు.
నెగిటివిటీని తట్టుకుని నిలబడటమే కాకుండా, విమర్శలను తన ఎదుగుదలకు సోపానాలుగా మార్చుకున్నారు. తక్కువ పెట్టుబడితో నిర్మాతలకు లాభాలు తెచ్చిపెట్టే ఇలాంటి దర్శకులు పరిశ్రమకు ఎంతో అవసరం. అనిల్ రావిపూడి కేవలం వినోదమే కాకుండా ఫ్యామిలీ ఎమోషన్స్ కూడా తన సినిమాల్లో చక్కగా పండిస్తున్నారు. ఇప్పుడు వచ్చిన 'మన శంకర వరప్రసాద్ గారు' సినిమా వసూళ్ల సునామీ సృష్టించడం ఆయన బ్రాండ్ విలువను మరింత పెంచింది. రాజమౌళి తర్వాత అత్యంత నిలకడగా విజయాలు సాధిస్తున్న దర్శకుడిగా అనిల్ పేరు టాలీవుడ్ రికార్డుల్లో నిలిచిపోతుంది. భారీతనం కంటే వినోదానికే ప్రాధాన్యత ఇచ్చే ఆయన శైలి నిర్మాతలకు కల్పవృక్షంలా మారింది. చిత్ర పరిశ్రమ కళకళలాడాలంటే ఇలాంటి సక్సెస్ఫుల్ దర్శకులు ఇంకా ఎందరో రావాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి