ప్రపంచంలోనే అత్యంత పొడవైన బుర్జ్ ఖలీఫా భవనం ఎత్తు 829.8 మీటర్లు కాగా.. రాత్రి సమయాల్లో దీనిపై వాణిజ్య ప్రకటనలు అద్భుతంగా డిస్‌ప్లే అవుతుంటాయి. ఈ అత్యంత ఎత్తైన భవనంపై రాత్రివేళల్లో మిరుమిట్లు గొలిపే లైట్స్ పై వాణిజ్య ప్రకటనలు చాలా ఆకర్షణీయంగా కనిపిస్తాయి. చాలా కిలోమీటర్ల వరకు ఈ వాణిజ్య ప్రకటనలు స్పష్టంగా కనిపిస్తాయి. మరి ఈ అద్భుతమైన భవనంపై 3 నిమిషాల పాటు ఒక యాడ్ ప్లే చేసినందుకు ఎంత డబ్బులు తీసుకుంటారో తెలుసా? ఒకవేళ మీరు సోమవారం నుంచి శుక్రవారం వరకు.. రాత్రి 8 గంటల నుంచి 10 గంటల సమయంలో బుర్జ్ ఖలీఫా పై 3 నిమిషాలపాటు మీకు సంబంధించిన యాడ్ ప్లే చేయదలచుకున్నారనుకోండి.. మీరు అక్షరాల యాభై లక్షల రూపాయలు చెల్లించాల్సి ఉంటుంది. ఒకవేళ మీరు శనివారం లేదా ఆదివారం నాడు 3 నిమిషాల నిడివిగల అడ్వర్టైజ్మెంట్ బుర్జ్ ఖలీఫా పై ప్లే చేయాలనుకున్నారనుకోండి రూ.70 లక్షల రూపాయలు చెల్లించాల్సి ఉంటుంది.
ఇంకో దిమ్మతిరిగే విషయం ఏమిటంటే.. ఈ భవనం పై ప్రకటన డిస్‌ప్లే చేయాలనుకుంటే 30 రోజులు ముందుగానే.. బుర్జ్ ఖలీఫా ఓనర్ అయిన ఎమర్ ప్రాపర్టీస్ ని సంప్రదించాల్సి ఉంటుంది. అనంతరం మనకు సంబంధించిన అడ్వర్టైజ్మెంట్ వారికి పంపించాలి. వారు మన ప్రకటనను క్షుణ్నంగా పరిశీలించి ఆ తర్వాత తమ భవనంపై డిస్‌ప్లే చెయ్యాలో లేదో నిర్ణయిస్తారు. ఒకవేళ భవనంపై ప్రకటన ప్రదర్శించే అనుమతి లభిస్తే వారాలను బట్టి 3 నిమిషాలకు లక్షల్లో డబ్బులు చెల్లించాల్సి ఉంటుంది. ఏది ఏమైనా ఒక ప్రకటనను మూడు నిమిషాల పాటు ప్రదర్శించడానికి 50 లక్షల రూపాయలు తీసుకోవడం నిజంగా షాకింగ్ విషయమే.
సాధారణంగా మన భారతదేశంలోని ప్రముఖ టీవీ ఛానళ్లలో రాత్రి వేళ 8 గంటల నుంచి 11 గంటల మధ్య సమయంలో 30 సెకండ్ల నిడివిగల ప్రకటన ఇవ్వాలంటే 50 వేల నుంచి 5 లక్షల రూపాయలు తీసుకుంటారు. ఈ లెక్కన చూసుకుంటే.. అత్యంత పాపులర్ అయిన ఎంటర్టైన్మెంట్ టీవీ ఛానళ్లలో మూడు నిమిషాల నిడివిగల అడ్వర్టైజ్మెంట్ ప్రసారం చేసినందుకు 3 - 30 లక్షలు రూపాయలు తీసుకుంటారని చెప్పుకోవచ్చు. ప్రముఖ ఎంటర్టైన్మెంట్ టీవీ ఛానల్స్ కి రాత్రి సమయంలో వీక్షకుల సంఖ్య లక్షల్లో ఉంటుంది. దీంతో మన ప్రకటనకు మంచి రెస్పాన్స్ వచ్చే అవకాశం ఉంటుంది. ఇక నెలరోజుల పాటు ప్రతిరోజు ఎనిమిది సార్లు 30-60 సెకండ్ల నిడివిగల ప్రకటన టీవీ ఛానల్లో ప్రసారం కావాలంటే 3 కోట్ల వరకు చెల్లించాల్సి ఉంటుంది. పాపులారిటీని బట్టి ప్రకటనలకు అయ్యే ఖర్చు ఆధారపడి ఉంటుంది. ఏది ఏమైనా బుర్జ్ ఖలీఫా ఇండియన్ పాపులర్ చానెల్స్ కంటే కాస్త ఎక్కువగానే డబ్బులు తీసుకుంటూ ఆశ్చర్యపరుస్తోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి