చరిత్ర సృష్టించిన విజయ రథం .. ఎవరు ఊహించారు, ఇంకెవరు ఊహించలేదు అనే సంగతి కాసేపు పక్కనపెడితే... చరిత్రలో నిలిచిపోయే విజయాన్ని భారత క్రికెట్ జట్టు సొంతం చేసుకుంది. ఆస్ట్రేలియాపై 339 పరుగుల భారీ టార్గెట్‌ను ఛేదించి తమ సత్తా ఏమిటో ప్రపంచానికి చాటింది. ఆదివారం టైటిల్ కోసం జరిగే పోరుకు ముందు దక్షిణాఫ్రికాకు భారీ అలర్ట్ జారీ చేసింది. ఈ క్రమంలో పలు ప్రపంచ రికార్డులను తన ఖాతాలో వేసుకుంది.
భారత్ వర్సెస్ ఆస్ట్రేలియా మ్యాచ్‌లో బద్దలైన రికార్డులివే: అత్యధిక విజయవంతమైన ఛేజింగ్: మహిళల వన్డే క్రికెట్ చరిత్రలో ఇదే అత్యధిక విజయవంతమైన ఛేజింగ్. ఈ నెల ప్రారంభంలో ఇదే టోర్నమెంట్‌లో భారత్‌పై ఆస్ట్రేలియా సాధించిన 331 పరుగుల ఛేజింగ్‌ను అధిగమించి సరికొత్త రికార్డ్ సృష్టించబడింది. నాకౌట్‌లో భారీ ఛేదన: వన్డే ప్రపంచ కప్ నాకౌట్‌లో పురుషుల లేదా మహిళల జట్టు 300 లేదా అంతకంటే ఎక్కువ పరుగులు ఛేదించడం ఇదే తొలిసారి.
అత్యధిక పరుగులు నమోదైన మ్యాచ్: 2017లో బ్రిస్టల్‌లో జరిగిన ఇంగ్లాండ్-సౌతాఫ్రికా మ్యాచ్‌లో నమోదైన రికార్డ్ (మొత్తం 678 పరుగులు) బద్దలైంది. తాజాగా జరిగిన భారత్-ఆసీస్ మ్యాచ్‌లో మొత్తం 679 పరుగులు నమోదయ్యాయి. సిక్సర్ల సునామీ: మహిళల వరల్డ్ కప్‌లో ఒకే మ్యాచ్‌లో అత్యధికంగా 14 సిక్స్‌లు (భారత్ 5, ఆసీస్ 9) నమోదవడం ఇదే తొలిసారి. వ్యక్తిగత రికార్డు, భారత చరిత్ర .. యువ సెంచరీ వీరురాలు: ఆస్ట్రేలియా ఓపెనర్ ఫోబ్ లిచ్‌ఫీల్డ్ (119) వరల్డ్ కప్ నాకౌట్ మ్యాచ్‌లో సెంచరీ చేసిన అతి పిన్న వయస్సు (22 ఏళ్లు) బ్యాటర్‌గా రికార్డ్ నెలకొల్పింది.
వరల్డ్ కప్‌లో భారత చరిత్ర: సెమీస్‌లో ఆసీస్‌పై రెండో విజయం: వన్డే ప్రపంచకప్‌లో ఆస్ట్రేలియాను సెమీస్‌లో ఓడించి ఫైనల్లో ప్రవేశించడం భారత్‌కు ఇది రెండోసారి. గతంలో 2017లోనూ సెమీస్‌లో ఆసీస్‌ను ఇలాగే ఓడించింది. మూడోసారి ఫైనల్: మహిళల వన్డే ప్రపంచకప్‌లో ఫైనల్‌కు చేరడం భారత్‌కు ఇది మూడోసారి. గతంలో 2005, 2017లలో ఫైనల్‌కు అర్హత సాధించింది. ఈ అద్భుతమైన విజయంతో భారత జట్టు ఇప్పుడు ఆదివారం నాటి ఫైనల్ పోరుకు సిద్ధమవుతోంది. కప్పును ముద్దాడడానికి కేవలం ఒక అడుగు దూరంలో ఉంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి