സംസ്ഥാനത്ത് ഇന്ന് പുതിയ കൊറോണ പോസിറ്റീവ് കേസുകള് റിപ്പോര്ട്ട് ചെയ്തിട്ടില്ലെന്ന് ആരോഗ്യമന്ത്രി കെ.കെ.ശൈലജ.
സംസ്ഥാനത്തിന്റെ വിവിധ ഭാഗങ്ങളിലായി 3313 പേരാണ് ഇപ്പോള് നിരീക്ഷണത്തിലുള്ളത്.
ഇതില് 3020 പേര് വീടുകളിലും 293 പേര് ആശുപത്രികളിലുമാണ് നിരീക്ഷണത്തിൽ കഴിയുന്നത്.
പരിശോധനയ്ക്കയച്ച 1179 സാമ്പിളുകളില് 889 സാമ്പിളുകള് നെഗറ്റീവ് ആണ്.
ബാക്കിയുള്ളവയുടെ ഫലം ലഭിച്ചിട്ടില്ല. തിരുവനന്തപുരത്തും കോഴിക്കോടും സാമ്പിള് പരിശോധന തുടങ്ങിയെന്നും മന്ത്രി വക്തമാക്കി.
പബ്ലിക് ഹെല്ത്ത് ലാബ്, തൃശൂര് മെഡിക്കല് കോളേജ്, രാജീവ്ഗാന്ധി ബയോ ടെക്നോളജി ഇന്സ്റ്റിറ്റ്യൂട്ട് എന്നിവിടങ്ങളില് പരിശോധനയ്ക്കായി അനുമതി തേടിയിട്ടുണ്ട്. ഇതിനും കൂടി അനുമതി കിട്ടിയാല് വേഗത്തില് ഫലം ലഭിക്കുന്നതാണെന്നും മന്ത്രി പറഞ്ഞു.
ആരോഗ്യ വകുപ്പിന്റെ അവലോകന യോഗത്തിന് ശേഷം സംസാരിക്കുകയായിരുന്നു മന്ത്രി.
ഇറ്റലിയില് നിന്നും പത്തനംതിട്ടയില് എത്തിയ മൂന്നംഗ കുടുംബവുമായി സമ്പര്ക്കം പുലര്ത്തിയ 969 പേരെയാണ് കണ്ടെത്തിയത്. ഇതില് 129 പേരെ ഹൈ റിസ്ക് വിഭാഗത്തില്പ്പെടുത്തിയിട്ടുണ്ട്. ഇവരില് 13 ശതമാനം പേര് 60 വയസില് കൂടുതലുള്ളവരാണ്. അവര്ക്ക് പ്രത്യേക പരിചരണമാണ് നല്കുന്നത്.
കോട്ടയത്ത് 60 പേര് കോണ്ടാക്ട് ലിസ്റ്റിലുണ്ട്. എറണാകുളത്ത് കോവിഡ് 19 സ്ഥിരീകരിച്ച് ചികിത്സയിലുള്ള മൂന്ന് വയസുകാരനുമായും മാതാപിതാക്കളുമായും സമ്പര്ക്കം പുലര്ത്തിയ 33 ഹൈ റിസ്കുള്ളവര് ഉള്പ്പെടെ 131 പേരെയും കണ്ടെത്തിയിട്ടുണ്ട്.