കോൺഗ്രസ് ഭയക്കുന്നത് രാഹുൽ ഗാന്ധിയുടെ ആ യാത്രയോ? ബ്രിട്ടീഷ് ഉപ്പ് തീരുവയെ എതി‍ർത്തുകൊണ്ട് മഹാത്മാ ഗാന്ധി 1930-ൽ ദണ്ഡിയിലേക്ക് നടത്തിയ പദയാത്ര സ്വാതന്ത്ര്യാനന്തരം രാഷ്ട്രീയ പാർട്ടികൾക്ക് ഭരണം നേടാനുള്ള ഉപകരണമായി ഭവിക്കുകയായിരുന്നു. സെപ്റ്റംബർ ഏഴിന് കന്യാകുമാരിയിൽ നിന്നും കോൺഗ്രസ് നേതാവ് രാഹുൽ ഗാന്ധി പദയാത്ര ആരംഭിക്കുകയാണ്. ഭാരത് ജോഡോ പദയാത്ര എന്നു പേരിട്ടിരുന്ന യാത്ര പന്ത്രണ്ട് സംസ്ഥാനങ്ങളിലൂടെയും രണ്ട് കേന്ദ്രഭരണ പ്രദേശങ്ങളിലൂടെയും കടന്നുപോകും. തെരഞ്ഞെടുപ്പ് അടുക്കുമ്പോൾ പദയാത്ര നടത്തിയ നേതാക്കളും പാർട്ടികളും നൂറുമേനി കൊയ്ത ചരിത്രമാണ് മുന്നിലുള്ളത്.മിലേ കദം, ജോഡോ വദൻ എന്ന മുദ്രാവാക്യമുയ‍ർത്തി നടത്തുന്ന യാത്രകൊണ്ട് ജനങ്ങളുമായി കൂടുതൽ ബന്ധം സ്ഥാപിക്കുകയാണ് കോൺഗ്രസിന്റെ ലക്ഷ്യം.
സാമൂഹിക ഐക്യം, തൊഴിലില്ലായ്മ, പണപ്പെരുപ്പം, കേന്ദ്രത്തിലെ ബിജെപി ഭരണം അടക്കം യാത്രയിൽ ചർച്ചയാകും. 2019 ലോക്സഭാ തെരഞ്ഞെടുപ്പിൽ കനത്ത പരാജയം നേരിട്ടതിനെത്തുടർന്ന് കോൺഗ്രസ് അധ്യക്ഷ സ്ഥാനം ഒഴിഞ്ഞെങ്കിലും ഇപ്പോഴും രാഹുൽ അനൗദ്യോഗികമായി തലപ്പത്തു തുടരുകയാണ്. കന്യാകുമാരി മുതൽ കാശ്മീർ വരെ നടക്കുന്ന യാത്രയിൽ കോൺഗ്രസ് എംപിമാരും നേതാക്കളും പങ്കെടുക്കും.കോൺഗ്രസ് ഉപാധ്യക്ഷനായിരിക്കെ 26 ദിവസം നീണ്ടയാത്ര രാഹുൽ ഉത്തർപ്രദേശിൽ സംഘടിപ്പിച്ചിരുന്നു. 2016 സെപ്തംബർ 6ന് ഖോരഖ്പൂ‍ർ ഡിവിഷനിലെ ഡിയോറിയയിൽ നിന്നും ആരംഭിച്ച യാത്ര 141 മണ്ഡലങ്ങളിലൂടെയാണ് കടന്നുപോയത്.
48 ജില്ലകളിലായി 3,438 കിലോമീറ്ററാണ് രാഹുൽ സഞ്ചരിച്ചത്. 26 ഖാട്ട് സഭകൾ (കട്ടിലിൽ ഇരുന്നുള്ള ക‍ർഷകരുമായുള്ള സംവാദം), 26 റോഡ്‌ഷോകൾ, 26 മറ്റ് പരിപാടികളും യാത്രയ്ക്കിടെ സംഘടിപ്പിച്ചു. കൂടാതെ വായ്പ എഴുതി തള്ളണമെന്ന് ആവശ്യപ്പെട്ട് ക‍ർഷകരിൽ നിന്നും 75 ലക്ഷം അപേക്ഷകളും ശേഖരിച്ചു. ഇത്രയൊക്കെ ചെയ്തെങ്കിലും 2017ലെ നിയമസഭാ തെരഞ്ഞെടുപ്പിൽ കോൺഗ്രസിനെ കാത്തിരുന്നത് പരാജയമായിരുന്നു. വെറും ഏഴ് സീറ്റിലാണ് കോൺഗ്രസ് ജയിച്ചത്. മറ്റുള്ള രാഷ്ട്രീയ പാർട്ടികളെല്ലാം പദയാത്ര നടത്തി നേട്ടമാണുണ്ടാക്കിയതെങ്കിൽ രാഹുലിന്റെ ചരിത്രം അങ്ങനെയല്ല. 2016ൽ കോൺഗ്രസ് ഉപാധ്യക്ഷനായിരിക്കെ ഉത്തർപ്രദേശിൽ പദയാത്ര നടത്തിയെങ്കിലും പിന്നീടുള്ള തെരഞ്ഞെടുപ്പിൽ കോൺഗ്രസിന് കനത്ത പരാജയമാണ് ഏറ്റുവാങ്ങേണ്ടിവന്നത്.
മുതി‍ർന്ന കോൺഗ്രസ് നേതാക്കളെല്ലാം ഇടഞ്ഞു നിൽക്കുന്ന പശ്ചാത്തലത്തിൽ ഇക്കുറിയും 2016 ആവർത്തിക്കുമോയെന്നാണ് ഉയരുന്ന ചോദ്യം.ബ്രിട്ടീഷ് ഉപ്പ് തീരുവയെ എതി‍ർത്തുകൊണ്ട് 1930-ൽ മഹാത്മാ ഗാന്ധിയാണ് 388 കിലോമീറ്റർ നീളുന്ന പദയാത്ര രാജ്യത്ത് ആദ്യമായി സംഘടിപ്പിച്ചത്. എന്തുകൊണ്ടാണ് ഇന്ത്യൻ രാഷ്ട്രീയക്കാരെ പദയാത്രകൾ അത്രകണ്ട് ആകർഷിക്കുന്നത്? മികച്ച വിജയം നേടുന്നതിനുള്ള ഉപാധിയാണോ പദയാത്രകൾ? രാജ്യത്തെ കാൽനട യാത്രകളുടെ ചരിത്രം ഇങ്ങനെയാണ്.
വൈ എസ് രാജശേഖര റെഡ്ഡി 2003ൽ ആന്ധ്രാ പ്രദേശിൽ രണ്ട് മാസം നീളുന്ന പദയാത്ര നടത്തി. 1500 കിലോമീറ്റർ ദൂരം താണ്ടിയ യാത്രയായിരുന്നു ഇത്. ഫലമോ 2004-ൽ അദ്ദേഹം ആന്ധ്രാ പ്രദേശിന്റെ മുഖ്യമന്ത്രിയായി സത്യപ്രതിജ്ഞ ചെയ്തു.
2013-ൽ തെലുങ്കുദേശം പാർട്ടി നേതാവ് ചന്ദ്രബാബു നായിഡു 2013ൽ 1700 കിലോമീറ്റർ നീളുന്ന പദയാത്ര നടത്തി. ഇക്കാരണംകൊണ്ടുതന്നെ 2014ൽ ചന്ദ്രബാബു നായിഡു ആന്ധ്രാപ്രദേശിന്റെ മുഖ്യമന്ത്രിയായി തെരഞ്ഞെടുക്കപ്പെട്ടു.കോൺഗ്രസ് നേതാവും മധ്യപ്രദേശ് മുൻ മുഖ്യമന്ത്രിയുമായ ദിഗ് വിജയ് സിങ് 2017ൽ പദയാത്ര നടത്തി. നർമ്മദാ നദിയുടെ തീരത്തുകൂടി 3,300 കിലോമീറ്റർ ദൈർഘ്യമുള്ള യാത്രയായിരുന്നു ഇത്. നർമ്മദ യാത്ര എന്നാണ് യാത്ര അറിയപ്പെട്ടത്. 2018-ൽ നടന്ന തെരഞ്ഞെടുപ്പിൽ 230-ൽ 114 സീറ്റുകൾ നേടിയാണ് കോൺഗ്രസ് മധ്യപ്രദേശിൽ ജയിച്ചത്. പിന്നീട് ബിഎസ്പിയും എസ്പിയും ചേർന്ന് കോൺഗ്രസ് സർക്കാർ രൂപീകരിച്ചു.
Find out more:
click and follow Indiaherald WhatsApp channel