గత ఎన్నికల్లో అత్యంత దారుణమైన పరాజయం చవిచూసిన పవన్ కళ్యాణ్ ఈసారి కూటమి ఏర్పాటు చేసుకొని బరిలో దిగుతున్నారు. ఇక అసలు విషయంలోకి వెళితే, చిరు రాజకీయాలను వీడిన తరువాత సినిమా ప్రపంచానికే పరిమితం అయిపోయారు. తమ్ముడి పార్టీ పెట్టి నానా బాధలు పడుతున్నా ఈ తొమ్మిదేళ్లలో ఎక్కడా ఆయన పవన్ వంక చూసిన దాఖలాలు కనబడలేదు. అలాంటి చిరు తాజాగా జనసేన పార్టీకి 5 కోట్ల భారీ మొత్తం ప్రకటించడంతో ఒక్కసారిగా ఈ న్యూస్ మీడియాలో ట్రెండ్ అయిపోయింది. దాంతో చిరంజీవి మద్దతు ఎప్పటికైనా తమ్ముడికే అని కన్ఫర్మ్ అయిపోయింది. ఈ క్రమంలోనే ఒక రూమర్ సోషల్ మీడియాలో చక్కెర్లు కొడుతోంది.
విషయం ఏమిటంటే.. ఆయన ఇప్పటికీ కాంగ్రెస్ లోనే ఉన్నట్టు లెక్క. అవును, చిరు కాంగ్రెస్ పార్టీలో ఉంటూనే కాంగ్రెస్‌కు ఒక్క రూపాయి విరాళం ఇవ్వలేదు కానీ.. తన తమ్ముడి జనసేన పార్టీకి మాత్రం రూ. 5 కోట్లు విరాళం ఎలా ఇచ్చారు? అని ఓ వర్గంవారు ప్రశ్నిస్తున్నారు. వాస్తవానికి చిరంజీవి ఇంకా కాంగ్రెస్‌లోనే ఆలిండియా కాంగ్రెస్ కమిటీ సభ్యుడిగా ఉన్నారు. దీంతోబాటు ఆయన్ను కాంగ్రెస్ పార్టీ స్టార్ క్యాంపెయినర్‌గా కూడా పలుమార్లు చెబుతూ వచ్చింది. మరోవైపు బీజేపీ, నరేంద్ర మోదీతో కూడా ఆయన మంచి సంబంధాలను కలిగి ఉండడం కొసమెరుపు. మొత్తానికి ఇప్పుడైతే ఆయన తమ్ముడికి మద్దతుగా ఆర్థిక సాయం అందజేశారు. దాంతో చిరంజీవి కేవలం విరాళంతో ముగిస్తారా? లేక జనసేన తరఫున ప్రచారం చేస్తారా? అనే చర్చ నెట్టింట జోరుగా ప్రచారం నడుస్తోంది.
