మార్కెట్ యార్డుల్లో టమాటాలు అమ్మకానికి రావడం లేదని, కనీస గిట్టుబాటు ధర కూడా అందడం లేదని వారు ఆరోపిస్తున్నారు. నిరసనగా పంటను రోడ్డుపై పోసి ప్రభుత్వంపై నినాదాలు చేస్తున్నారు. ఈ పరిణామం రాష్ట్రవ్యాప్తంగా చర్చనీయాంశమైంది. ముఖ్యమంత్రి చంద్రబాబు ఇప్పటికే మామిడి, ఉల్లిపాయ, మిర్చి రైతుల సమస్యలతో తలమునకలై ఉన్న సమయంలో టమాటా సమస్య మరింత తలనొప్పిగా మారింది. రైతులకు గిట్టుబాటు ధరలు నిర్ధారించడంలో విఫలమవుతున్నారని ప్రతిపక్షం కూడా విమర్శలు చేస్తోంది.
ఈ నేపథ్యంలో వ్యవసాయ మంత్రి అచ్చెన్నాయుడు రంగంలోకి దిగారు. రైతులకు ఎటువంటి నష్టం కలగకుండా ప్రభుత్వం చర్యలు తీసుకుంటుందని ఆయన హామీ ఇచ్చారు. రాప్తాడు మార్కెట్‌లో ఆదివారం టమాటా ధర గరిష్టం రూ.18, కనిష్ఠం రూ.9, మోడల్ ధర రూ.12గా ఉందని వివరించారు. పత్తికొండ మార్కెట్‌లో సాధారణంగా 30-40 మెట్రిక్ టన్నులు సరుకు చేరుతాయని, కానీ దసరా సెలవుల కారణంగా మరో 10 టన్నులు అదనంగా వచ్చాయని చెప్పారు. రోడ్లపై 2వ గ్రేడ్ టమాటాలను పోసి గందరగోళం సృష్టించారని, దీని వెనుక ఎవరు ఉన్నారో ప్రభుత్వం తెలుసుకుంటుందని అచ్చెన్నాయుడు తెలిపారు.
రైతులు ఆందోళన చెందాల్సిన అవసరం లేదని, సరైన మార్కెట్ మద్దతు ధరలు అందేలా చర్యలు తీసుకుంటామని ఆయన భరోసా ఇచ్చారు. మొత్తంగా, టమాటా ధరల పతనం రైతుల ఆర్థిక పరిస్థితిని కుదిపేస్తుండగా, ఈ సమస్యను సమర్థవంతంగా పరిష్కరించాలన్న ఒత్తిడి ఇప్పుడు చంద్రబాబు ప్రభుత్వంపై తీవ్రంగా పెరిగింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి