డబ్బు అవసరం వుందా మీకు? అయినా ఈ లోకంలో డబ్బు అవసరం లేని వారు ఉండనే వుండరు. అత్యవసరాలకు లోన్ ప్లాన్ చేస్తున్నారా? అయితే మీక ఒక ఆప్షన్ అందుబాటులో ఉంది. దీంతో మీరు బ్యాంకుల చుట్టూ తిరగాల్సిన అవసరం లేదు. సులభంగానే ఉన్న చోటు నుంచే రుణం పొందొచ్చు. దీని కోసం అవసరమైన డాక్యుమెంట్లను ఫోన్ ద్వారానే అప్లోడ్ చేయొచ్చు. స్మార్ట్ఫోన్స్ తయారీ కంపెనీ రియల్మి ఇటీవలనే ఆన్లైన్ ఫైనాన్షియల్ మార్కెట్లోకి కూడా అడుగు పెట్టిన విషయం మీకు తెలుసుకదా.. లేకపోతే తెలుసుకోండి.
ఈ సంస్థ పేసా ప్లాట్ఫామ్ ద్వారా కస్టమర్లకు రుణాలు అందిస్తోంది. దేశీ మార్కెట్లో షావోమికి ప్రధాన ప్రత్యర్థిగా ఉన్న రియల్మి తన పేసా ప్లాట్ఫామ్ ద్వారా నాలుగు రకాల సర్వీసులు అందిస్తోంది. అవి వరుసగా... పర్సనల్ లోన్/బిజినెస్ లోన్స్, ఉచిత క్రెడిట్ రిపోర్ట్, మొబైల్ స్క్రీన్ ప్రొటెక్షన్ ఇన్సూరెన్స్, ఇతర సర్వీసులు. మీకు డబ్బు అవసరం ఉంటే రియల్మి పేసా యాప్ ద్వారా రుణం తీసుకోవచ్చు. దీని కోసం యాప్ను గూగుల్ ప్లేస్టోర్ నుంచి డౌన్లోడ్ చేసుకోవాలి. యాప్ ద్వారానే లోన్కు అప్లై చేసుకోవచ్చు. రుణం పొందొచ్చు. అలాగే తీసుకున్న రుణాన్ని తిరిగి చెల్లించొచ్చు.
రియల్మి తన పేసా ప్లాట్ఫామ్ ద్వారా రుణాలు అందించేందుకు ఎర్లీ శాలరీ అనే ఆన్లైన్ లెండింగ్ ప్లాట్ఫామ్తో జతకట్టింది. పర్సనల్ లోన్ తీసుకోవాలని భావిస్తే కనీసం 18 ఏళ్లు ఉండాలి. తక్కువ డాక్యుమెంట్లతోనే త్వరితగతిన రుణం పొందొచ్చు. రియల్మి పేసా యాప్ ద్వారా రూ.లక్ష వరకు రుణాన్ని నిమిషాల్లో పొందొచ్చు. కనీసం రూ.8,000 నుంచి రుణం తీసుకోవలసి ఉంటుంది. గరిష్టంగా రూ.10 లక్షల వరకు కూడా లోన్ వస్తుంది. అయితే ఎంఎస్ఎంఈలకు ఇది వర్తిస్తుంది. రుణంపై వడ్డీ రేట్ల విషయానికి వస్తే సంవత్సరానికి 24 శాతం నుంచి 30 శాతం మధ్యలో వడ్డీ పడుతుంది.
మీరు వినియోగించుకున్న మొత్తంపైనే వడ్డీ చెల్లిస్తే సరిపోతుంది. 3 నెలల నుంచి 60 నెలలలోపు తీసుకున్న రుణాన్ని చెల్లించాలి. రుణం తీసుకోవాలంటే భారతీయ పౌరుడై ఉండాలి. ఉద్యోగం చేయాలి. నెలవారీ వేతనం కనీసం రూ.18,000గా ఉండాలి. హైదరాబాద్, సికింద్రాబాద్, కోల్కతా, ముంబై, పుణే, ఢిల్లీ, చెన్నై, బెంగళూరు వంటి నగరాలకు ఇది వర్తిస్తుంది. ఇతర పట్టణాల్లోని వారి వేతనం కనీసం రూ.15,000 ఉన్న సరిపోతుంది. ఆన్లైన్లో ఇన్స్టంట్ పర్సనల్ లోన్ తీసుకోవాలని భావిస్తే.. కొన్ని డాక్యుమెంట్లు అవసరం అవుతాయి. సెల్ఫీ, పాన్ కార్డు, అడ్రస్ ప్రూఫ్, ఆధార్ కార్డు, బ్యాంక్ స్టేట్మెంట్ వంటివి అవసరం ఉంటుంది.