'ഗുണ്ട ജയൻ' റോഡ് ഷോയുമായി ജനമധ്യത്തിലേക്ക്! ചിത്രത്തിന്റേതായി പുറത്തിറങ്ങുന്ന ഓരോ പോസ്റ്ററും വീഡിയോയും സമൂഹ മാധ്യമങ്ങളിലടക്കം ശ്രദ്ധേയമായിരുന്നു. ഇപ്പോഴിതാ ചിത്രത്തിന്റെ പ്രചണ പരിപാടികളിലും ശ്രദ്ധേയമാകുകയാണ് ഗുണ്ട ജയനും സംഘവും. പഴയകാലത്തെ പ്രചരണ തന്ത്രമാണ് ഇവിടെ ഉപയോഗിക്കുന്നത്. വാഹന അനൗൺസ്മെന്റുമായാണ് രംഗത്തെത്തിയത്. സൈജു കുറുപ്പിനെ നായകനാക്കി അരുൺ വൈഗ സംവിധാനം ചെയ്യുന്ന 'ഉപചാരപൂർവം ഗുണ്ട ജയൻ' നാളെ മുതൽ കേരളത്തിലെ തീയേറ്ററുകളിൽ എത്തും. ഗുണ്ട ജയൻ ഒരു പക്കാ കോമഡി എന്റെർറ്റൈനെർ ആയാണ് ഒരുക്കിയിരിക്കുന്നത് എന്നാണ് അണിയറ പ്രവർത്തകർ പറയുന്നത്. അത് ശരി വെക്കുന്ന ഇതിന്റെ ട്രൈലെർ, ഇതിലെ മനോഹരമായ ഗാനങ്ങൾ എന്നിവ ഇപ്പോൾ തന്നെ സൂപ്പർ ഹിറ്റാണ്.
ചിത്രത്തിൽ മലയാളത്തിന്റെ യുവ താരങ്ങളായ സിജു വിൽസൺ, ശബരീഷ് വർമ്മ എന്നിവർക്കൊപ്പം ജോണി ആന്റണി, സാബുമോൻ, സുധീർ കരമന, ജാഫർ ഇടുക്കി, ബിജു സോപാനം, വിജിലേഷ്, ബൈജു എഴുപുന്ന, തട്ടിം മുട്ടിം ഫെയിം സാഗർ സൂര്യ, വൃന്ദ മേനോൻ, നയന, പാർവതി തുടങ്ങി വൻ താരനിര തന്നെയാണ് അണിനിരക്കുന്നത്. വേഫെയർ ഫിലിംസിന്റെ ബാനറിൽ ദുൽഖർ സൽമാനും മൈ ഡ്രീംസ് എന്റർടൈൻമെന്റിന്റെ ബാനറിൽ സെബാബ് ആനിക്കാടും ചേർന്നാണ് ചിത്രം നിർമ്മിക്കുന്നത്. 'കുറുപ്പ്' എന്ന ബ്ലോക്ക്ബസ്റ്റർ വിജയത്തിന് ശേഷം ദുൽഖർ സൽമാൻ നിർമ്മിക്കുന്ന ചിത്രം കൂടിയാണിത്. സൈജു കുറുപ്പിന്റെ കരിയറിലെ നൂറാം ചിത്രമാണ് 'ഉപചാരപൂർവ്വം ഗുണ്ട ജയൻ'. ചിത്രത്തിന് തിരക്കഥ രചിച്ചത് രാജേഷ് വർമ്മയാണ്.
അതേസമയം സൈജു കുറുപ്പ് നായകനായെത്തുന്ന 'ഉപചാരപൂർവ്വം ഗുണ്ട ജയൻ' എന്ന ചിത്രത്തിലെ ഏറ്റവും പുതിയ ഗാനം ഇന്ന് റിലീസ് ചെയ്തു. ചിത്രത്തിലെ ഗാനങ്ങളെല്ലാം ഇതിനോടകംതന്നെ വലിയ ഹിറ്റുകളായി മാറിയിരുന്നു. ആദ്യം പുറത്തിറങ്ങിയത് ബിജിപാൽ ഈണം നൽകി ദയ ബിജിപാൽ ആലപിച്ച 'ചില്ലുമണി കായലിന്റെ' എന്ന ഗാനം ആണ്. രണ്ടാമത്തേത് നടനും ഗായകനുമായ ശബരീഷ് വർമ്മ ഈണം നൽകി ആലപിച്ച ഗുണ്ട ഗുണ്ട ഗുണ്ട ജയൻ എന്ന ഗാനം ആയിരുന്നു. ഇപ്പോൾ ശബരീഷിനു പിന്നാലെയാണ് സിജുവും ഗായകരുടെ നിരയിലേക്ക് എത്തിയത്.
സിജു ചിത്രത്തിൽ പ്രധാനപ്പെട്ട ഒരു വേഷം കൂടി കൈകാര്യം ചെയ്തിട്ടുണ്ട്. ഫസ്റ്റ്‌ലുക്ക് പോസ്റ്ററിലടക്കം സിജു സജീവ സാന്നിദ്ധ്യമായിരുന്നു. 'അവളെ അവളെ ഞാനെൻ കനവിൽ കണ്ടാളെ' എന്നു തുടങ്ങുന്ന വരികൾക്ക് ഈണം നൽകിയിരിക്കുന്നത് രാജേഷ് വർമ്മയാണ്. സോഷ്യൽ മീഡിയയിൽ ഗാനത്തിന് വലിയ പിന്തുണയാണ് ലഭിക്കുന്നത്. രാജേഷ് വർമ്മ തിരക്കഥ ഒരുക്കുന്ന ചിത്രത്തിന്റെ കഥ, രചന, സംവിധാനം നിർവ്വഹിച്ചിരിക്കുന്നത് അരുൺ വൈഗയാണ്. ഒരു കല്യാണത്തെ ചുറ്റിപ്പറ്റിയാണ് ഈ ചിത്രത്തിന്റെ കഥ വികസിക്കുന്നത്.
Find out more:
click and follow Indiaherald WhatsApp channel