ఈ క్రమంలోనే టికెట్ ఆశించిన దాదాపు 10 మంది స్థానిక పార్టీ నేతలు ఇపుడు ప్రతిపక్ష పార్టీలో చేరడానికి సిద్ధంగా ఉన్నట్టు తెలుస్తోంది. కొందరు స్థానికులు సొంత పార్టీ స్థానిక అభ్యర్థికి కాకుండా ప్రత్యర్థి పార్టీకి మద్దతు ఇస్తున్నట్లు కూడా సమాచారం. కర్నూలు అసెంబ్లీ నియోజక వర్గానికి వైఎస్సార్సీపీ అభ్యర్థిగా రిటైర్డ్ ఐఏఎస్ అధికారి ఏఎండీ ఇంతియాజ్ ఇపుడు బరిలో ఉన్నారు. అతను నియోజకవర్గంతో పాటు రాజకీయాలకు కూడా పెద్దగా అనుభవం లేని వ్యక్తి. కాగా ఇంతియాజ్ పేరును పార్టీ ప్రతిపాదించకముందే సిట్టింగ్ ఎమ్మెల్యే ఎంఏ హఫీజ్ ఖాన్, మాజీ ఎమ్మెల్యే ఎస్వీ మోహన్ రెడ్డి టికెట్ కోసం లాబీయింగ్ చేశారు. అయితే ఏఎమ్డి ఇంతియాజ్ ప్రకటనతో హఫీజ్ ఖాన్ మద్దతుదారులు నియోజకవర్గంలో చురుకుగా పాల్గొనడం లేదని తెలుస్తోంది.
అదేవిధంగా యెమ్మిగనూరు నియోజక వర్గంలో బుట్టా రేణుక కూడా స్థానికురాలు కాకపోవడం కొసమెరుపు. అది మాత్రమే కాకుండా నంది కొట్కూరు నియోజక వర్గంలో కూడా ఇదే పరిస్థితి. జగన్ మోహన్ రెడ్డి పార్టీ అభ్యర్థిగా స్థానికేతర డాక్టర్ సుధీర్ ధారకు టికెట్ కేటాయించారు. సుధీర్ స్వస్థలం కడప జిల్లా పులివెందుల. కర్నూలు జిల్లాతో ఆయనకు ఎలాంటి సంబంధం లేదు. దీంతో నియోజకవర్గంలోని క్యాడర్లు చాలా అశాంతితో ఉన్నారు. అయితే ఇపుడు ఇదే అంశాలు వైసీపీకి చాలా తలనొప్పిగా మారాయని విశ్లేషకులు అంటున్నారు.