నారా చంద్రబాబు నాయుడు ప్రవేశపెట్టిన పీ4 (పబ్లిక్-ప్రైవేట్-పీపుల్ పార్టనర్షిప్) పథకం రాష్ట్రంలో పేదరిక నిర్మూలన లక్ష్యంగా చెబుతూ ఉగాది సందర్భంగా 2025 మార్చి 30న అమరావతిలో ప్రారంభమైంది. ఈ పథకం ద్వారా సమాజంలో ఆర్థికంగా బలమైన 10 శాతం మంది, అట్టడుగున ఉన్న 20 శాతం పేదలను ఆదుకోవాలని చంద్రబాబు పిలుపునిచ్చారు. ఈ విధానాన్ని ఆయన "సమాజంలో విప్లవాత్మక మార్పు" అని పేర్కొన్నారు. అయితే, ఈ పథకం నిజంగా పేదలకు లాభం చేకూరుస్తుందా లేక ప్రజలను మభ్యపెట్టే ఒక రాజకీయ ఎత్తుగడగా మిగిలిపోతుందా అనే అనుమానాలు ప్రజల్లో, విపక్షాల్లో తలెత్తుతున్నాయి.
పీ4 పథకం ఆలోచన ఆకర్షణీయంగా కనిపిస్తుంది..ప్రభుత్వం, ప్రైవేటు సంస్థలు, ప్రజలు కలిసి పనిచేస్తే పేదరికం తగ్గుతుందని చెప్పడం సానుకూలంగా అనిపిస్తుంది. చంద్రబాబు ఈ పథకాన్ని స్వర్ణాంధ్ర విజన్-2047లో భాగంగా చూపిస్తూ, 2029 నాటికి రాష్ట్రాన్ని పేదరిక రహితంగా మార్చాలని లక్ష్యంగా పెట్టుకున్నారు. బంగారు కుటుంబాలను మార్గదర్శులు (ధనవంతులు) ఆదుకునే విధానం ద్వారా ఈ లక్ష్యం సాధ్యమని ఆయన వాదన. కానీ, ఈ పథకం అమలు విషయంలో ఆచరణాత్మక సవాళ్లు స్పష్టంగా కనిపిస్తున్నాయి. ధనవంతులు స్వచ్ఛందంగా పేదలను ఆదుకోవడం ఎంతవరకు జరుగుతుంది? ప్రభుత్వం దీనికి సరైన ప్లాట్ఫామ్ ఇస్తుందని చెప్పినా, దీన్ని పర్యవేక్షించే విధానం, దీర్ఘకాలిక ఫలితాలపై సందేహాలు ఉన్నాయి.
విపక్ష వైఎస్సార్సీపీ నేతలు ఈ పథకాన్ని "ప్రజలకు టోపీ పెట్టే కొత్త నాటకం" అని విమర్శిస్తున్నారు. ఎన్నికల ముందు సూపర్ సిక్స్ వాగ్దానాలు చేసిన చంద్రబాబు, వాటిని నెరవేర్చలేక పీ4 అనే కొత్త గిమ్మిక్ తెచ్చారని ఆరోపిస్తున్నారు. పేదరిక నిర్మూలన అనేది ప్రభుత్వ బాధ్యత అని, దాన్ని ప్రైవేటు వ్యక్తులపై వదిలేయడం బాధ్యత నుంచి తప్పించుకోవడమేనని వారి వాదన. నిజానికి, విద్య, వైద్యం, ఉపాధి వంటి ప్రాథమిక అవసరాలను ప్రభుత్వం నేరుగా అందిస్తేనే పేదరికం తగ్గుతుందని చరిత్ర చెబుతోంది. పీ4లో ఈ విషయాలపై స్పష్టమైన దిశానిర్దేశం కనిపించడం లేదు.
ప్రజల్లో కూడా ఈ పథకంపై అనుమానాలు తలెత్తుతున్నాయి. గతంలో చంద్రబాబు హైదరాబాద్లో అమలు చేసిన పీపీపీ మోడల్ ఆర్థిక వృద్ధికి దోహదపడినా, అది పేదలకు నేరుగా ఎంత లాభం చేకూర్చిందనేది ప్రశ్నార్థకం. పీ4 కూడా ఇలాంటి పరిమిత ఫలితాలతో ముగిస్తే, ఇది కేవలం రాజకీయ ప్రచారంగా మిగిలిపోయే ప్రమాదం ఉంది. చంద్రబాబు ఈ పథకాన్ని విజయవంతం చేయాలంటే, దాని అమలులో పారదర్శకత, ప్రభుత్వం నుంచి నేరుగా సహకారం, ఫలితాలపై దృష్టి అవసరం. లేకపోతే, "జనానికి టోపీ" అనే విమర్శలు నిజమయ్యే అవకాశం లేకపోలేదు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి