అసలు వివరాల్లోకి వెళ్తే, అమెరికా కేంద్రంగా పనిచేసే 'మాక్సర్ టెక్నాలజీస్' అనే సంస్థ అత్యాధునిక శాటిలైట్ చిత్రాలను అందించడంలో దిట్ట. సరిగ్గా రెండు నెలల క్రితం, పాకిస్తానీ గూఢచార సంస్థలకు అత్యంత సన్నిహితంగా మెలిగే 'బిజినెస్ సిస్టమ్స్ ఇంటర్నేషనల్' (BSI) అనే పాక్ కంపెనీ నుంచి మాక్సర్ కు భారీ ఎత్తున ఆర్డర్లు అందాయి. కాశ్మీర్ లోని అత్యంత సమస్యాత్మక, వ్యూహాత్మక ప్రాంతాలైన పహల్గాం, పుల్వామా, అనంతనాగ్, పూంచ్, రాజౌరీ, బారాముల్లా వంటి ప్రదేశాల హై-రిజల్యూషన్ చిత్రాలు కావాలని BSI పట్టుబట్టింది. ఈ చిత్రాల కోసం కోట్లాది రూపాయలు ముట్టజెప్పడంతో, మాక్సర్ సంస్థ వాటిని సరఫరా చేస్తూ వచ్చింది. ఆశ్చర్యకరంగా, పహల్గాం దాడి జరగడానికి కేవలం పది రోజుల ముందు వరకు కూడా ఈ ఆర్డర్లు కొనసాగాయని తేలడం కుట్ర తీవ్రతను తెలియజేస్తోంది.
ఈ BSI సంస్థ వెనుక ఉన్న అసలు సూత్రధారి ఎవరో తెలిస్తే నివ్వెరపోవాల్సిందే. సయ్యద్ అబ్దుల్లా షా అనే పాకిస్తానీ-అమెరికన్ వ్యాపారవేత్త దీని వెనుక ఉన్నాడు. ఇతను గతంలో అమెరికా నుంచి పాకిస్తాన్ అణు కార్యక్రమానికి (PAEC) చెందిన కీలక సంస్థలకు అక్రమంగా హై-పర్ఫార్మెన్స్ కంప్యూటర్ హార్డ్‌వేర్, సాఫ్ట్‌వేర్లను తరలించిన కేసులో దోషిగా తేలి, అమెరికాలోనే జైలు ఊచలు లెక్కబెట్టి వచ్చాడు. అలాంటి అసాంఘిక చరిత్ర కలిగిన వ్యక్తి స్థాపించిన కంపెనీయే ఇప్పుడు కశ్మీర్ సమస్యాత్మక ప్రాంతాల అత్యాధునిక మ్యాపులను సేకరించడం వెనుక భారీ కుట్ర దాగి ఉందనే అనుమానాలు బలపడుతున్నాయి.
రక్షణ రంగ నిపుణుల విశ్లేషణ ప్రకారం, ఈ హై-రిజల్యూషన్ చిత్రాల ద్వారా ఉగ్రవాదులు కశ్మీర్ లోని భద్రతా బలగాల కదలికలు, రహస్య మార్గాలు, కీలక స్థావరాలపై పూర్తి స్పష్టతతో పక్కా ప్రణాళిక రచించుకున్నారు. BSI అధినేత సయ్యద్ షా ఈ కీలక మ్యాపులను పాకిస్తాన్ సైన్యం లేదా ఐఎస్ఐకి చేరవేయగా, వారు వాటిని కాశ్మీర్ లోని ఉగ్రవాద గ్రూపులకు అందించి, దాడులకు మార్గనిర్దేశం చేశారనేది ప్రధాన ఆరోపణ. ఈ పక్కా సమాచారంతోనే ఉగ్రవాదులు భద్రతా బలగాలను బోల్తా కొట్టించి, దాడులకు తెగబడ్డారని తెలుస్తోంది.
ఈ కుట్ర కోణం బయటపడటంతో, మాక్సర్ టెక్నాలజీస్ సంస్థ తమ వెబ్సైట్ లోని భాగస్వాముల జాబితా నుంచి BSI పేరును హడావుడిగా తొలగించింది. ఈ వార్త ప్రచురితమైన మరుసటి రోజే ఈ పరిణామం చోటుచేసుకోవడం, ఈ వ్యవహారంలో ఇంకా తెలియని లోతులు ఉన్నాయనే వాదనకు బలం చేకూరుస్తోంది.
మొత్తంగా, కాశ్మీర్ లో అశాంతిని రెచ్చగొట్టేందుకు, అమాయకుల ప్రాణాలను బలిగొనేందుకు అమెరికా గడ్డపై నుంచే పాకిస్తాన్ ఎంత పకడ్బందీగా కుట్ర పన్నిందో ఈ ఉదంతం కళ్లకు కడుతోంది. టెక్నాలజీని ఉగ్రవాదానికి వాడుకున్న ఈ తీరు, అంతర్జాతీయ ఉగ్ర నెట్వర్క్ ఎంత బలంగా విస్తరించిందో చెప్పకనే చెబుతోంది. కాశ్మీర్ కుట్రలో వెలుగు చూసిన ఈ కొత్త కోణం, యావత్ దేశాన్ని ఉలిక్కిపడేలా చేసింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి