നബിദിനാശംസ പറഞ്ഞ ജോസ് കെ മാണിയ്ക്ക് അസഭ്യവർഷം! നബിദിനത്തോട് അനുബന്ധിച്ച് ഔദ്യോഗിക ഫേസ്ബുക്ക് പോസ്റ്റിൽ ജോസ് കെ മാണി കുറിച്ച പോസ്റ്റിനു താഴെയാണ് നിരവധി പേർ അസഭ്യവർഷവും വർഗീയ പരാമർശങ്ങളുമായി എത്തിയത്. ഫേസ്ബുക്കിലൂടെ നബിദിനാശംസകൾ നേർന്ന ജോസ് കെ മാണിയ്ക്കെതിരെ സമൂഹമാധ്യമങ്ങളിൽ അധിക്ഷേപ പരാമർശങ്ങളും തെറിവിളിയും. ഇതോടെ പോസ്റ്റിനു താഴെ കമൻ്റ് ചെയ്യാനുള്ള സൗകര്യം എടുത്തു നീക്കിയ നിലയിലാണുള്ളത്. "പ്രവാചകൻ മുഹമ്മദ് നബിയുടെ ജന്മദിനമാണ് ഇന്ന്. സ്‌നേഹത്തിന്റെയും സാഹോദര്യത്തിന്റെയും ദൂതൻ നബി തിരുമേനിയുടെ സന്ദേശങ്ങൾ പരമാവധി ജീവിതത്തിൽ പകർത്താനുള്ള പ്രതിജ്ഞയെടുക്കാം.
ഈ പുണ്യദിനത്തിൻ്റെ പ്രാർഥന അതാവട്ടെ." ഇങ്ങനെയായിരുന്നു ജോസ് കെ മാണിയുടെ പോസ്റ്റ്. എന്നാൽ ജോസ് കെ മാണിയുടെ പോസ്റ്റ് മുസ്ലീം വോട്ടർമാരെ പ്രീണിപ്പിക്കാനുള്ള ശ്രമമാണെന്ന ആരോപണവുമായി ഒരു വിഭാഗം കമൻ്റ് ബോക്സിലെത്തുകയായിരുന്നു. "ഏതെങ്കിലും ഒരു വഞ്ചിയിൽ കാല് വയ്ക്കൂ ജോസ് മോനെ. അല്ലെങ്കിൽ പാല 2021 വീണ്ടും ആവർത്തിക്കും. നമ്മൾ എന്നും മുൻ M.P ആയി ഇരിക്കേണ്ടി വരും." ഒരു കമൻ്റിൽ പറയുന്നു. രൂക്ഷമായ മുസ്ലീം വിരുദ്ധ പരാമർശങ്ങളും വർഗീയതയുമായിരുന്നു പല കമൻ്റുകളിലും നിറഞ്ഞത്. എന്നാൽ ജോസ് കെ മാണിയെ പിന്തുണച്ചും പലരും കമൻ്റ് ചെയ്തിട്ടുണ്ട്. കഴിഞ്ഞ തെരഞ്ഞെടുപ്പിൽ തന്നെ പരാജയപ്പെടുത്തിയ 'സുഡാപ്പികളെ' സന്തോഷിപ്പിക്കാനാണ് ശ്രമമമെന്നും അടുത്ത തവണയും കേരള കോൺഗ്രസ് എം പാലായിൽ ജയിക്കില്ലെന്നു ഉറപ്പായെന്നും ചിലർ കമൻ്റ് ചെയ്തു. ജോസ് കെ മാണിയെ അധിക്ഷേപിച്ച് കമൻ്റ് ബോക്സിലെത്തിയത് ബിജെപി അനുകൂലികളാണെന്നും പലതും ഫേക്ക് പ്രൊഫൈലുകളാണെന്നുമാണ് എതിർവിഭാഗത്തിൻ്റെ ആരോപണം.
ജോസ് കെ മാണിയുടെ പരാമർശത്തെച്ചൊല്ലി വർഗീയത വളർത്താനുള്ള ശ്രമമാണെന്നും ചിലർ ചൂണ്ടിക്കാട്ടി. സംഭവത്തിൽ വിശദീകരണവുമായി കേരള കോൺഗ്രസ് എം അനുകൂല സോഷ്യൽ മീഡിയ വിഭാഗവും രംഗത്തുണ്ട്. അതേസമയം ജോസ് കെ മാണി സമുദായ നേതാവല്ലെന്നും കേരള കോൺഗ്രസ് എം ചെയർമാനാണെന്നും കേരള കോൺഗ്രസ് അനുകൂല ഫേസ്ബുക്ക് ഗ്രൂപ്പുകൾ ഓർമപ്പെടുത്തുന്നു. പാർട്ടിയിലെ അംഗങ്ങൾക്ക് സമുദായസംഘടനകളിൽ പ്രവർത്തിക്കാനും മതത്തിൽ വിശ്വസിക്കാനും അഭിപ്രായം പറയാനും അവകാശമുണ്ടെന്നും ഇതൊന്നും ആരും ചോദ്യം ചെയ്യാറില്ലെന്നുമാണ് പാർട്ടി വൃത്തങ്ങൾ പറയുന്നത്. കേരള കോൺഗ്രസ് എന്നത് സമുദായ പാർട്ടിയല്ലെന്നും മന്നത്ത് പദ്മനാഭൻ തിരിതെളിച്ച പ്രസ്ഥാനമാണെന്നുമാണ് പാർട്ടി വൃത്തങ്ങൾ ചൂണ്ടിക്കാണിക്കുന്നത്.
എന്നാൽ കോൺഗ്രസ് നേതൃത്വവും മാധ്യമങ്ങളും കേരള കോൺഗ്രസിനെ ഒരു ക്രിസ്ത്യൻ പാർട്ടിയായി തളച്ചിടാൻ ശ്രമിക്കുകയാണെന്നുമാണ് ആരോപണം. ഒപ്പം ജോസ് കെ മാണിയ്ക്കെതിരെ അധിക്ഷേപ വർഷം നടത്തിയ പല പ്രൊഫൈലുകളും വ്യാജമാണെന്ന് ഇവർ ചൂണ്ടിക്കാണിക്കന്നു. ക്രിസ്ത്യൻ പേരുകളുള്ള ഇവയിൽ പലതും മലപ്പുറം കേന്ദ്രീകരിച്ച് പ്രവർത്തിക്കുന്ന വ്യാജ പ്രൊഫൈലുകളാണെന്നാണ് ആരോപണം. ജോസ് കെ മാണിയെ അധിക്ഷേപിക്കാൻ ക്രിസ്ത്യൻ ഗ്രൂപ്പുകളിലും കോൺഗ്രസ് ഗ്രൂപ്പുകളിലും ആഹ്വാനമുണ്ടായിരുന്നുവെന്നും ഇവർ ചൂണ്ടിക്കാണിക്കുന്നു. അതേസമയം, ജോസ് കെ മാണിയെ അധിക്ഷേപിച്ച് രംഗത്തെത്തിയ പ്രൊഫൈലുകളിൽ പലതും സംഘപരിവാർ അനൂകൂല പോസ്റ്റുകളും പങ്കുവെച്ചിട്ടുള്ളതായി കാണാം.
Find out more:
click and follow Indiaherald WhatsApp channel