అయితే ఆమె అంత ధైర్యంగా మాట్లాడడానికి గల కారణం ఏమిటి? ఆమె వెనుక్కున్నది ఎవరు? ఆమె వ్యూహం ఏమిటి? అనే చర్చలు ఇపుడు మీడియాలో వాడివేడిగా జరుగుతున్నాయి. ముఖ్యంగా అసలు షర్మిల వెనుక ఉన్నది ఎవరు? అనే మాట అందరి నోట వినిపిస్తోంది. ఎందుకంటే జగన్ ను రాజకీయ ప్రత్యర్థులు కూడా అనలేని దారుణమైన మాటలను ఇపుడు షర్మిల బాహాటంగానే అనగలుగుతున్నారు. ఈ క్రమంలోనే చంద్రబాబు పేరు బయటకు వినబడుతోంది. అవును, ఈ మాట స్వయంగా వైసిపి నేతలే అంటున్నారు. షర్మిల కాంగ్రెస్ లో చేరడం, ఏపీ రాజకీయాల వైపు రావడం, పీసీసీ పగ్గాలు అందుకోవడం వెనుక చంద్రబాబు వ్యూహాలు ఉన్నట్లు అనుమానాలు ఉన్నాయని గుసగుసలు వినబడుతున్నాయి.
ప్రస్తుతం ఆమె రాష్ట్ర వ్యాప్తంగా బస్సు యాత్ర చేస్తున్నారు. కడప జిల్లా నుంచి లోక్సభ స్థానానికి పోటీ చేస్తున్నారు. ఈ నేపథ్యంలో ఏకంగా కడప నడిబొడ్డులోనే అన్న పరువు గంగలో కలిపేస్తున్నారు. ప్రధానంగా బాబాయ్ హత్య కేసును హైలెట్ చేస్తూ అన్నపై విరుచుకుపడుతున్నారు. సాధారణంగా రాష్ట్రంలో విపక్ష నేతలే కడపలో విమర్శలు చేసేందుకు వెనుకడుగు వేస్తారు. అటువంటిది షర్మిల నిర్భయంగా ఆరోపణలు చేస్తుండడం ఇపుడు విశ్లేషకులకు సైతం మతి పోతోంది. ఈ క్రమంలోనే ఆమె వెనుక బలమైన శక్తి ఉన్నట్లు అనుమానిస్తున్నారు. అది చంద్రబాబుకు మించి ఉండొచ్చు అని కూడా అనుమానించేవాళ్ళు లేకపోలేదు. మరికొంతమంది అయితే బీజేపీ ఆజ్ఞతో పవన్ కళ్యాణ్ వెనక ఉండి నడిపిస్తున్నాడు అనేవాళ్ళు కూడా లేకపోలేదు. లోగుట్టు పెరుమాళ్ళకెరుకగానీ ప్రస్తుతం షర్మిల చరిష్మాకి ఏ డోఖా లేదనేది అయితే సుస్పష్టం.