"మాపై దుష్ప్రచారం చేశారు.. కార్యాలయంపై దాడికి వచ్చారు!.. "ప్రజా తీర్పు స్పష్టంగా ఉంది. అందుకే కాంగ్రెస్‌కు ఈ ఆధిక్యం వచ్చింది. కానీ.. ఈ రెండు విపక్ష పార్టీలు మా ఓటమి కోసం విషపు ప్రచారానికి దిగాయి" అంటూ మంత్రి పొన్నం సంచలన వ్యాఖ్యలు చేశారు. "కాంగ్రెస్ పార్టీ రిగ్గింగ్ చేసిందని బీఆర్ఎస్, బీజేపీలు ఉద్దేశపూర్వకంగా ప్రచారం చేశాయి. ప్రజాస్వామ్యం ఇంత పకడ్బందీగా ఉన్నప్పుడు, అందులోనూ హైదరాబాద్ వంటి మెట్రో నగరంలో రిగ్గింగ్ చేయడం సాధ్యమా?" అంటూ ఆయన విపక్షాల ఆరోపణలను తిప్పికొట్టారు. అంతేకాదు! పోలింగ్ ప్రక్రియ ముగిసిన వెంటనే.. బీఆర్ఎస్, బీజేపీకి చెందిన కార్యకర్తలు కాంగ్రెస్ పార్టీ కార్యాలయంపై దాడికి కూడా వచ్చారని మంత్రి పొన్నం తీవ్ర ఆరోపణలు చేశారు. ఇది విపక్షాల కుట్రలో భాగమేనని ఆయన మండిపడ్డారు.
ప్రజా తీర్పు మా వైపే! .. జూబ్లీ హిల్స్ ఉప ఎన్నికల్లో కాంగ్రెస్ గెలుపు తాము ముందే ఊహించినదేనని, ఈ తీర్పుతో ప్రజలు మరోసారి తమ వైపే ఉన్నారనే విషయం స్పష్టమైందని మంత్రి పొన్నం ప్రభాకర్ ధీమా వ్యక్తం చేశారు. "విపక్షాలు ఎన్ని కుయుక్తులు పన్నినా, ఎన్ని అసత్యాలు ప్రచారం చేసినా.. ప్రజలు మమ్మల్ని నమ్మారు" అంటూ ఆయన వ్యాఖ్యానించారు. ఈ విజయం తమ ప్రభుత్వానికి మరింత బాధ్యతను పెంచిందని, ఇక ముందు మరింత పకడ్బందీగా, నిబద్ధతతో పని చేస్తామని ఆయన ప్రకటించారు. మొత్తానికి, కాంగ్రెస్ విజయోత్సవాల మధ్య మంత్రి పొన్నం చేసిన ఈ ఎదురుదాడి.. తెలంగాణ రాజకీయ వాతావరణాన్ని మరింత వేడెక్కించడం ఖాయం!
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి