84 రోజులు.. ఏ శుభకార్యమూ లేదు!
ఈనెల నవంబర్ 26న మార్గశిర మాసం శుద్ధ షష్ఠి నుంచి ప్రారంభమైన ఈ శుక్ర మౌఢ్యమి.. వచ్చే సంవత్సరం ఫిబ్రవరి 17 వరకు మాఘ బహుళ అమావాస్య వరకు కొనసాగుతుంది. ఈ సుదీర్ఘ కాలంలో వివాహాలు, గృహ ప్రవేశాలు, విగ్రహ ప్రతిష్ఠాపనలు వంటి ప్రధాన శుభకార్యాలు జరపడం ఏ మాత్రం మంచిది కాదని జ్యోతిష్య శాస్త్రం హెచ్చరిస్తోంది.
మూఢం అంటే ఏమిటి?
జ్యోతిష్యం ప్రకారం, ఒక గ్రహం సూర్యుడి కిరణాలలో మరుగునపడి, దాని శక్తి బలహీనపడటాన్ని మౌఢ్యమి లేదా వాడుక భాషలో మూఢమి (చీకటి) అంటారు. శుక్రుడు సౌఖ్యం, ప్రేమ, వైవాహిక జీవితం, ధన స్థిరత్వానికి కారకుడు. ఈ గ్రహం బలహీనమైతే.. అది సూచించే ఫలితాలు అంతగా అనుకూలంగా ఉండవు. అందుకే శుక్ర మౌఢ్యంలో శుభకార్యాలు తలపెట్టడం శుభసూచకం కాదని పురోహితులు చెబుతున్నారు.
కోట్ల వ్యాపారం కుదేలు!
ఈ 84 రోజుల బ్రేక్ వల్ల వివాహ పరిశ్రమపై తీవ్ర ఆర్థిక ప్రభావం పడనుంది. శుభకార్యాలపై ఆధారపడి జీవించే వేలాది మంది వ్యాపారులు, కార్మికులు ఈ మూడు నెలలు గడ్డు కాలాన్ని ఎదుర్కోక తప్పదు. ముఖ్యంగా:
ఫంక్షన్ హాళ్లు, వివాహ మండపాల ఆదాయం పూర్తిగా నిలిచిపోతుంది.
వస్త్ర, ఆభరణాల దుకాణాలు; స్వర్ణకారుల వ్యాపారం పడిపోతుంది.
క్యాటరింగ్, ఫొటోగ్రాఫర్లు, డెకరేటర్లు, టెంట్ హౌస్‌లకు పని లేకుండా పోతుంది.
అద్దె కార్లు, బస్సుల యజమానులు, సన్నాయి మేళం కళాకారులకూ నష్టమే.
ఈ పరిణామాలు ఆర్థిక వ్యవస్థలో కదలికను తగ్గిస్తాయని, శుక్ర మౌఢ్యం ముగిసే వరకు వివాహాల మార్కెట్ స్తంభిస్తుందని వ్యాపార వర్గాలు ఆందోళన వ్యక్తం చేస్తున్నాయి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి