ఇటీవల జరిగిన ఒక కార్యక్రమంలో శైలేష్ ఈ నిర్ణయాన్ని వెల్లడించారు. "మనం చనిపోయిన తర్వాత ఈ శరీరం మట్టిలో కలిసిపోవడమో లేదా బూడిద అవ్వడమో జరుగుతుంది. అదే మనం అవయవ దానం చేస్తే, మన ద్వారా మరో ఎనిమిది మందికి ప్రాణదానం చేసిన వాళ్ళం అవుతాం. మన కళ్ళు ప్రపంచాన్ని చూస్తాయి, మన గుండె మరొకరిలో కొట్టుకుంటుంది. అంతకంటే అదృష్టం ఏముంటుంది?" అంటూ ఆయన చేసిన వ్యాఖ్యలు ప్రతి ఒక్కరినీ ఆలోచింపజేస్తున్నాయి.శైలేష్ కేవలం మాటలతో సరిపెట్టకుండా, సంబంధిత సంస్థ నుంచి డోనర్ కార్డును కూడా అందుకున్నారు. ఈ ఫోటోను సోషల్ మీడియాలో షేర్ చేస్తూ.. "నా వంతుగా ఈ చిన్న ప్రయత్నం చేస్తున్నాను. వీలైతే మీరు కూడా ఆలోచించండి" అంటూ ఒక గొప్ప పిలుపునిచ్చారు.
సాధారణంగా దర్శకులు తమ సినిమాల ప్రమోషన్లలో బిజీగా ఉంటారు. కానీ శైలేష్ ఇలాంటి సామాజిక అంశాలపై స్పందించడం విశేషం. గతంలో కూడా ఆయన పలు సేవా కార్యక్రమాల్లో పాల్గొన్నారు. ఇప్పుడు ఏకంగా అవయవ దానానికి ముందుకు రావడంతో నెటిజన్లు ఆయనను "రియల్ హీరో" అంటూ కొనిాడుతున్నారు.ఒక మంచి సినిమా తీస్తే ప్రేక్షకుల చప్పట్లు వస్తాయి, కానీ ఒక మంచి పని చేస్తే కోట్లాది మంది ఆశీస్సులు వస్తాయి. శైలేష్ కొలను తీసుకున్న ఈ నిర్ణయం టాలీవుడ్లో మరికొంత మందికి స్ఫూర్తిగా నిలవడం ఖాయం. అవయవ దానంపై ఉన్న అపోహలను తొలగించి, ప్రాణదానం గొప్పతనాన్ని చాటిన శైలేష్ను ఎంత అభినందించినా తక్కువే.
శైలేష్ కొలను 2020లో ‘హిట్’ సినిమా ద్వారా డైరెక్టర్ గా పరిచయమయ్యారు. అదే చిత్రాన్ని ‘హిట్: ది ఫస్ట్ కేస్’ పేరుతో హిందీలో రీమేక్ చేశారు. ఆ తర్వాత ‘హిట్ 2: ది సెకండ్ కేస్’, ‘సైంధవ్’, ‘హిట్ 3’ వంటి సినిమాలను తెరకెక్కించారు. ఇటీవలే తన కొత్త చిత్రాన్ని అధికారికంగా ప్రకటించారు. రోషన్ మేకా, ప్రీతి ముకుందన్ హీరో హీరోయిన్లుగా ‘ఏమో ఏమో ఇది’ అనే ఓ ప్రేమ కథా చిత్రం చేస్తున్నట్లు తెలిపారు. ఈ సినిమా 2026 దసరా కానుకగా ప్రేక్షకుల ముందుకు రానుందని చెబుతూ, టైటిల్ గ్లింప్స్ రిలీజ్ చేశారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి