హైదరాబాద్ చిరంజీవి బ్లడ్ బ్యాంక్ వేదికగా జరిగిన ఈ కార్యక్రమంలో చిరంజీవి పాల్గొనగా ఆయన కుడి చేతికి బ్యాండేజ్‌లా ఉండటం అభిమానులందరినీ కలవర పెట్టింది. ఏమైంది అని అభిమానులు చిరంజీవిని ప్రశ్నించగా- ఆయన అసలు విషయం చెప్పారు. తన అరచేతికి చిన్నపాటి సర్జరీ అయింది అనే విషయాన్ని మెగాస్టార్ చిరంజీవి వెల్లడించారు. కుడి చేతితో ఏ పని చేయాలన్నా కొంచెం నొప్పిగా, తిమ్మిరి ఏర్పడుతున్నట్టు అనిపించడంతో డాక్టర్‌ను సంప్రదించానని వెల్లడించారు. అయితే కుడి చేతి మణికట్టు దగ్గరలో ఉన్న మీడియన్ నర్వ్ అనే నరం మీద ఒత్తిడి పడటం వల్ల అలా అనిపిస్తోందని దానిని కార్పల్ టన్నెల్ సిండ్రోమ్ అంటారని డాక్టర్లు వెల్లడించినట్లు పేర్కొన్నారు. అపోలో ఆసుపత్రిలో కాస్మొటిక్ సర్జన్ డాక్టర్ సుధాకర్ రెడ్డి ఆధ్వర్యంలో చేతికి సర్జరీ జరిగిందని, 45 నిమిషాల పాటు జరిగిన సర్జరీలో మీడియన్ నర్వ్ చుట్టుపక్కల ఉన్న టిష్యూలను సర్జరీ ద్వారా సరి చేసి, ఒత్తిడి తగ్గించారని మెగాస్టార్ పేర్కొన్నారు. ఈ సర్జరీ జరిగిన పదిహేను రోజుల తర్వాత కుడి చేయి మళ్లీ యధావిధిగా పని చేస్తుందని చిరంజీవి తెలిపారు.
దర్శకుడు విజయ బాపినీడు అల్లుడు అయిన సుధాకర్ రెడ్డి తనకు ఎంతో కాలంగా పరిచయం ఉండటంతో ఆయన ప్రత్యేక శ్రద్ధ తీసుకుని సర్జరీ పూర్తి చేసినట్లు చిరంజీవి వెల్లడించారు. ఈ సర్జరీ కారణంగా ప్రస్తుతం జరుగుతున్న గాడ్ ఫాదర్ సినిమా షూటింగ్‌కు కూడా గ్యాప్ ఇచ్చానని చిరు తెలిపారు. చేయాల్సిన ఫైట్ సీక్వెన్స్ పూర్తి చేసి.. 15 రోజులుగా గ్యాప్ తీసుకుంటున్నానని, నవంబర్ ఒకటో తేదీ నుంచి గాడ్ ఫాదర్ సినిమా షూటింగ్లో పాల్గొంటానని ఆయన పేర్కొన్నారు.
మీరు ఇంతలా కష్టపడుతూ, మీ బాడీని కష్టపెడుతున్నారు కాబట్టి ఒక్కోసారి ఇలా జరుగుతూ ఉంటాయి అని.. ఇక మీదట కుడి చేతికి ఎలాంటి ఇబ్బంది లేదని డాక్టర్ సుధాకర్ రెడ్డి వెల్లడించినట్టు మెగాస్టార్ పేర్కొన్నారు. ప్రస్తుతానికి అంతా సెట్ అయింది కాబట్టి.. పెద్దగా కంగారు పడాల్సిన విషయం ఏమీ లేదని మెగాస్టార్ అభిమానులతో పేర్కొన్నారు. తమ అభిమాన హీరో చిరంజీవి చేతికి సర్జరీ అనే మాట వినగానే.. మెగా ఫ్యాన్స్ తొలుత కంగారు పడినా, ఇప్పుడు అంతా బాగానే ఉందని చెప్పడంతో వారంతా ఊపిరి పీల్చుకున్నారు.
