మహారత్న ప్రొడక్షన్స్, ఎస్‌కే పిక్చర్స్, వనిల్లా ఎంటర్టైన్మెంట్స్ బ్యానర్లపై నిర్మాతలు చందు శ్రీనివాస్, ప్రముఖ నిర్మాత సురేష్ కొండేటి మరియు మమత దేవేంద్ర ఎం సంయుక్తంగా ఎంతో ప్రతిష్టాత్మకంగా నిర్మించిన వినూత్న చిత్రం ‘ప్రేమనే ఊరిలో’. ఈ చిత్రానికి మనోజ్ కుమార్ కథ, కథనం అందిస్తూ దర్శకత్వ బాధ్యతలు వహించారు. ఇందులో శ్రీరామ్, రమిక శివు, తపస్విని పూనాచ, సీనియర్ నటుడు రంగాయణ రఘు తదితరులు కీలక పాత్రల్లో నటించి తమ అత్యుత్తమ నటనతో అలరించారు.

సాంకేతిక విభాగం పరంగా ఈ సినిమా ఎంతో బలమైన ప్రాజెక్ట్‌గా రూపుదిద్దుకుంది. ప్యాన్ ఇండియా స్థాయిలో సంచలనం సృష్టించిన ‘KGF’, ‘కాంతారా’ వంటి బ్లాక్‌బస్టర్ చిత్రాలకు అద్భుతమైన సంభాషణలు అందించిన హనుమాన్ చౌదరి ఈ చిత్రానికి పవర్‌ఫుల్ మాటలు రాశారు. ప్రముఖ గేయ రచయిత రాంబాబు గోసాల మనసును హత్తుకునే పాటలను రచించగా, సునద్ గౌతమ్ అందించిన స్వరాలు మరియు నేపథ్య సంగీతం సినిమాకు ప్రధాన ఆకర్షణగా నిలిచాయి. రాజ్‌కాంత్ ఎస్.కె సినిమాటోగ్రఫీ ప్రతి దృశ్యాన్ని ఎంతో మనోహరంగా ఆవిష్కరించగా, హర్షిత్ ప్రభు ఎడిటింగ్ బాధ్యతలను అత్యంత సమర్థవంతంగా నిర్వహించారు.

ఇప్పటికే సెప్టెంబర్ 25న కన్నడలో విడుదలైన ఈ చిత్రానికి బాక్సాఫీస్ వద్ద అనూహ్య స్పందన లభిస్తోంది. కర్ణాటకలోని అనేక థియేటర్లలో హౌస్‌ఫుల్ కలెక్షన్లతో ఈ అందమైన ప్రేమ కథా చిత్రం ఘనవిజయం సాధిస్తోంది. అక్కడ లభించిన విశేష ఆదరణతో, గాంధీ జయంతి సందర్భంగా అక్టోబర్ 2వ తేదీన ఈ చిత్రాన్ని తెలుగు ప్రేక్షకుల ముందుకు తీసుకువచ్చేందుకు మేకర్స్ సర్వం సిద్ధం చేశారు.

ఇప్పటికే ఈ సినిమా నుండి విడుదలైన పాటలు, టీజర్ మరియు ట్రైలర్‌లకు సోషల్ మీడియాలో విశేష స్పందన లభించి, సినిమాపై అంచనాలను భారీగా పెంచేశాయి. యువతతో పాటు కుటుంబ ప్రేక్షకులను విశేషంగా ఆకట్టుకుంటున్న ఈ ఫీల్-గుడ్ లవ్ స్టోరీని కన్నడ ప్రేక్షకుల తరహాలోనే తెలుగు ప్రేక్షకులు కూడా పెద్ద ఎత్తున ఆదరించి, బ్రహ్మాండమైన విజయాన్ని కట్టబెడతారని చిత్ర నిర్మాతలు ఎంతో ధీమా వ్యక్తం చేస్తున్నారు.