బోయపాటి ఫస్ట్ హీరో రవితేజ. ఎప్పుడో 15 ఏళ్ల క్రితం బోయపాటి తన ఫస్ట్ సినిమా భద్రను రవితేజతోనే తెరకెక్కించాడు. ఈ చిత్రం బాక్సాఫీస్ వద్ద మంచి విజయం సాధించింది. బోయపాటితో పాటు రవితేజకు కూడా మంచి పేరు తెచ్చిపెట్టింది. ఈ క్రమంలోనే ఇన్నేళ్ల తరువాత వీళ్లిద్దరూ మళ్లీ కలిసి సినిమా చేస్తున్నారనే వార్తలు రావడంతో అప్పుడు ఈ సినిమాపై అంచనాలు పెరుగుతున్నాయి. అంతేకాదు.. ఈ సినిమా వచ్చే ఏడాది ప్రేక్షకుల ముందుకొచ్చే అవకాశం ఉందని, పైగా ఈ చిత్రాన్ని ఓ ప్రముఖ నిర్మాత నిర్మించనున్నారని సమాచారం. అయితే దీనిపై ఇప్పటివరకు ఎలాంటి అధికారిక ప్రకటన విడుదల కాలేదు.
కాగా.. ఇప్పటికే రవితేజ కోసం బోయపాటి ఓ ఫుల్ యాక్షన్ స్క్రిప్టును సిద్ధం చేయిస్తున్నట్లు తెలుస్తోంది. ఈ సినిమా రవితేజ స్టైల్లో పక్కా కామెడీతో సాగుతూనే యాక్షన్ ఎంటర్టైనర్గా ఉండబోతోందని టాక్. అంటే దాదాపు ‘భద్ర’లానే రవితేజకి సరిపడే స్టోరీతో బోయపాటి ఈ సినిమాని ప్లాన్ చేస్తున్నాడన్నమాట. మరో 3 నెలల్లో అఖండ సినిమా పూర్తి కానుండడంతో నెక్ట్స్ ప్రాజెక్ట్ ఇదేనని రూమర్లు వినిపిస్తున్నాయి. ఇక రవితేజ ప్రస్తుతం రమేశ్ వర్మ డైరెక్షన్లో ఖిలాడి సినిమా చేస్తున్నాడు. ఈ సినిమా పూర్తయిన తర్వాత బోయపాటితో సినిమా చేసే అవకాశాలు కనిపిస్తున్నాయి. మరి ఇందులో నిజమెంతుందో తెలియాలంటే మరికొన్ని రోజులు ఆగాల్సిందే.