വനം മന്ത്രി ജനങ്ങളെ പരിഹസിക്കുന്നുവെന്ന് വിഡി സതീശൻ! മുല്ലപ്പെരിയാറിൽ സംയുക്ത പരിശോധന നടത്തിയില്ലെന്ന് വനം മന്ത്രി നേരത്തെ നിയമസഭയെ അറിയിച്ചിരുന്നു. എന്നാൽ ഇതിനു വിരുദ്ധമായ നിലപാടാണ് ജിലവിഭവ വകുപ്പ് മന്ത്രിക്കു വേണ്ടി മറുപടി നൽകിയ മന്ത്രി കെ കൃഷ്ണൻ കുട്ടി ഇന്ന് നിയമസഭയിൽ സ്വീകരിച്ചത്. സർക്കാർ അറിയാതെ ഏതോ ഒരു ഉദ്യോഗസ്ഥൻ ഒരു സുപ്രഭാതത്തിൽ ഉത്തരവ് ഇറക്കിയെന്ന മട്ടിൽ സംസാരിച്ച വനം മന്ത്രി നിയമസഭയെ തെറ്റിദ്ധരിപ്പിക്കുകയും ജനങ്ങളെ പരിഹസിക്കുകയും ചെയ്തിരിക്കുകയാണെന്നും അദ്ദേഹം പറഞ്ഞു. മുല്ലപ്പെരിയാറിൽ മരം മുറിക്കാൻ തമിഴ്‌നാടിന് അനുമതി നൽകിക്കൊണ്ടുള്ള ഉത്തരവ് പുറത്തിറക്കിയത് മുഖ്യമന്ത്രിയുടെ അറിവോടെയെന്ന് പ്രതിപക്ഷ നേതാവ് വി ഡി സതീശൻ.
ഉത്തരവ് റദ്ദാക്കാൻ സർക്കാർ ഇതുവരെ തയാറായിട്ടില്ല. മരംമുറിയുമായി ബന്ധപ്പെട്ട് നിയമസഭയെ തെറ്റിദ്ധരിപ്പിച്ചതിലും മന്ത്രിമാർ പരസ്പരവിരുദ്ധമായ മറുപടി നൽകിയതിലും പ്രതിഷേധിച്ച് നടത്തിയ വാക്കൗട്ടിന് മുന്നോടിയായി സംസാരിക്കവെയാണ് പ്രതിപക്ഷ നേതാവിൻറെ വാക്കുകൾ. മുല്ലപ്പെരിയാറിൽ പുതിയ ഡാം വേണമെന്ന കേരളത്തിൻറെ പൊതു നിലപാടിന് വിരുദ്ധമാണ് മരം മുറി ഉത്തരവ്. മുൻകൂട്ടി ആസൂത്രണം ചെയ്തതു പ്രകാരം ജൂൺ 11നാണ് കേരള, തമിഴ്‌നാട് ഉദ്യോഗസ്ഥർ മുല്ലപ്പെരിയാറിൽ സംയുക്ത പരിശോധന നടത്തിയത്. അഡീഷണൽ ചീഫ് സെക്രട്ടറി പങ്കെടുത്ത യോഗമാണ് സംയുക്ത പരിശോധന തീരുമാനിച്ചത്. അതിന് പിന്നാലെ മരംമുറിക്കാൻ അനുമതി നൽകി ഉത്തരവ് ഇറക്കുന്നു. എന്നിട്ട് മന്ത്രിമാർ ഒന്നും അറിഞ്ഞില്ലെന്ന് പറയുകയാണെന്നും വിഡി സതീശൻ പറഞ്ഞു.
സഭയിൽ ഒന്ന് പറയുകയും എകെജി സെൻററിന് മുന്നിൽ മാറ്റിപ്പറയുകയും ചെയ്ത വനം മന്ത്രി നിയമസഭയെയും ജനങ്ങളെയും പരിഹസിക്കുകയാണ്. സുപ്രീം കോടതിയിലെ കേരളത്തിൻറെ കേസ് ആവിയായി. ഇനി എങ്ങനെ പുതിയ ഡാം ആവശ്യപ്പെടും? രണ്ടു മന്ത്രിമാർ വ്യത്യസ്ത മറുപടിയാണ് നൽകിയത്. എന്നാൽ ഉത്തരവ് ഇതുവരെ റദ്ദാക്കിയില്ല. മുഖ്യമന്ത്രിയുടെ അറിവോടെയാണ് മരം മുറിക്ക് അനുമതി നൽകിയത്. ഏതോ ഒരു ഉദ്യോഗസ്ഥൻ ഒരു സുപ്രഭാതത്തിൽ ഉത്തരവ് ഇറക്കി എന്ന മട്ടിൽ ആണ് വനം മന്ത്രി പറയുന്നത്. ഈ നിലപാട് സുപ്രീം കോടതിയിൽ പുതിയ ഡാം വേണമെന്ന സർക്കാർ വാദം പൊളിക്കും.
ബേബി ഡാം ശക്തിപ്പെടുത്തി മുല്ലപ്പെരിയാറിലെ ജനനിരപ്പ് 152 അടിയാക്കണമെന്ന തമിഴ്‌നാടിൻറെ നിലപാടിന് സഹായകമായ സമീപനമാണ് കേരള സർക്കാർ ഇപ്പോൾ സ്വീകരിച്ചിരിക്കുന്നത്. കേരള നിയമസഭ ഏകകണ്ഠമായാണ് മുല്ലപ്പെരിയാറിൽ പുതിയ ഡാം വേണമെന്ന തീരുമാനമെടുത്തത്. ഇതിനു വിരുദ്ധമാണ് സർക്കാരിൻറെ ഇപ്പോഴത്തെ നിലപാടെന്നും പ്രതിപക്ഷ നേതാവ് പറഞ്ഞു. മുല്ലപ്പെരിയാർ മേൽനോട്ട സമിതിയിലെ കേരളത്തിൻറെ പ്രതിനിധിയായ ജല വിഭവ വകുപ്പ് അഡീഷണൽ ചീഫ് സെക്രട്ടറിക്ക് മുഖ്യമന്ത്രിക്ക് കീഴിലുള്ള ആഭ്യന്തര വകുപ്പിൻറെ കൂടി ചുമതലയുണ്ട്. അതുകൊണ്ടു തന്നെ മുഖ്യമന്ത്രി അറിയാതെ ഇങ്ങനെയൊരു ഉത്തരവിറങ്ങില്ല.
Find out more:
click and follow Indiaherald WhatsApp channel