ప్రధాని పదవినే వదులుకున్నారు!
రాహుల్ గాంధీ అంటే దేశ రాజకీయాల్లో చాలా ప్రత్యేకత ఉంది. ఆయన తలచుకుంటే 2009లోనే ప్రధానమంత్రి పదవి దక్కేది. కానీ, పదవిని వద్దని... మన్మోహన్ సింగ్ లాంటి అనుభవజ్ఞుడికే మద్దతునిచ్చిన ఏకైక నాయకుడు ఆయనే! కనీసం కేంద్ర మంత్రిగా కూడా పని చేయాలని ఆయన కోరుకోలేదు. 2019లో కాంగ్రెస్ అధ్యక్షుడిగా ఓటమి పాలు కాగానే, ఆ పదవికి రాజీనామా చేసి పక్కకు తప్పుకోవడం కూడా గొప్ప విషయమే. పదవిని అంటిపెట్టుకుని ఉండకుండా, వంశపారంపర్యంగా వచ్చే అధ్యక్ష పదవి జోలికి మళ్లీ వెళ్లకపోవడం ఆయన ప్రత్యేకతను చెబుతుంది.
కానీ.. ఈ త్యాగాలు సరిపోవు!
అధికారంపై మోజు లేకపోవడం అభినందనీయమే అయినప్పటికీ... వరుస పరాజయాలు మాత్రం ఆయన రాజకీయ శైలిలో ఇంకా లోపం ఉందని చాటి చెబుతున్నాయి. రాజకీయాల్లో కేవలం మంచి మనసు ఉంటే సరిపోదు! నాయకుడిగా అందరి మన్ననలు అందుకోవాలంటే, వ్యూహాలను, వాదనలను మార్చుకోవాలి. 'ఓట్ల చోరీ' లాంటి లాజిక్ లేని విమర్శలు చేసినప్పుడు... అవి ప్రజల కోణం నుంచి కాకుండా, కేవలం రాజకీయ దాడి కోసమే చేశారనే అభిప్రాయం బలపడుతుంది.
ముఖ్యంగా... ప్రతీ అంశాన్ని మోడీకి ముడిపెట్టి విమర్శించడం రాణింపు తీసుకురావడం లేదు. అమెరికా అధ్యక్షుడు ట్రంప్‌కు మోడీ భయపడుతున్నారని ఆయన చేసిన వ్యాఖ్యలు దేశ ప్రజల సెంటిమెంట్‌కు విరుద్ధంగా మారి, చివరకు ఆయనకే బూమరాంగ్ అయ్యాయి. రాజకీయాల కంటే దేశం ఫస్ట్ అనే విషయాన్ని అంతర్జాతీయ అంశాల విమర్శల విషయంలో రాహుల్ గుర్తుంచుకోవాలి.
జనంలో ఒకడుగా కాదు, ప్రత్యేకంగా నిలబడాలి!
రాహుల్ గాంధీ... కుర్రాళ్లతో క్రికెట్ ఆడతారు, చెరువులోకి దిగి మత్స్యకారులతో చేపలు పడతారు, స్వీట్ షాప్‌లో స్వయంగా స్వీట్లు తయారు చేస్తారు. జనంతో ఆయన కలవడం అద్భుతమే! కానీ, నాయకుడు అంటే జనంలో ఒకడు మాత్రమే కాదు... వారి కంటే తాను ప్రత్యేకం అని నిరూపించుకోవాలి. తనకంటూ ఒక ప్రభావం చూపాలి. లేకపోతే... ఈ కనెక్టివిటీని జనాలు తేలిగ్గా తీసుకునే ప్రమాదం ఉంది.
55 ఏళ్ల వయసులో ఉన్న రాహుల్... ఆయన ఘనమైన నేపథ్యం, కాబోయే ప్రధానిగా ఉన్న ట్యాగ్ చూసి దేశ ప్రజలు ఆయన నుంచి ఇంకా ఎక్కువ ఆశిస్తున్నారు. ఆ అంచనాలను అందుకోవాలంటే, తన రాజకీయ పంథాను మరింతగా పదును పెట్టుకోవాల్సిన అవసరం ఉంది. లేదంటే... పదవిని వద్దన్నా ఆయనకు ఫలితాలు మాత్రం దూరంగానే ఉండిపోయే ప్రమాదం ఉంది!
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి