ప్రపంచవ్యాప్తంగా కోట్లాది మంది వినియోగదారులను కలిగిన ప్రముఖ మెసేజింగ్ యాప్ వాట్సాప్ , తమ ప్లాట్‌ఫారమ్‌పై స్పామ్ (Spam), అనవసర సందేశాల బెడదను తగ్గించేందుకు మరో కీలక చర్యకు సిద్ధమవుతోంది. వాట్సాప్ ఎప్పటికప్పుడు తీసుకొచ్చే కొత్త అప్‌డేట్స్ (Updates) ద్వారా యూజర్ల అనుభవాన్ని మెరుగుపరుస్తోంది. ఇందులో భాగంగా, ఇప్పుడు కాంటాక్ట్ లిస్ట్‌లో లేని వ్యక్తులకు లేదా పంపిన సందేశాలకు తిరిగి రిప్లై (Reply) ఇవ్వని వారికి పంపే మెసేజ్‌లపై నెలవారీ పరిమితిని (Monthly Limit) విధించాలని వాట్సాప్ యోచిస్తున్నట్లు సమాచారం.
ఈ కొత్త ఫీచర్‌ను వాట్సాప్ ప్రస్తుతం వివిధ దేశాలలో పరీక్ష (Testing) నిర్వహిస్తున్నట్లు తెలుస్తోంది. ఈ నిర్ణయం ప్రధానంగా ఎక్కువ మొత్తంలో, స్పాం మేసేజ్ లను (Mass, unsolicited messaging) పంపే వ్యక్తిగత యూజర్లు లేదా బిజినెస్ ఖాతాలను (Business Accounts) లక్ష్యంగా చేసుకుని రూపొందించబడింది. వినియోగదారులకు తరచుగా వచ్చే అనవసర నోటిఫికేషన్‌లు (Unwanted Notifications), ప్రమోషనల్ కంటెంట్ (Promotional Content) వంటి వాటిని తగ్గించడం ద్వారా వారికి మరింత ప్రశాంతమైన, నిర్వహించదగిన ఇన్బాక్స్‌ను అందించాలనేది దీని ముఖ్య ఉద్దేశం.
ఒక సందేశం... కాంటాక్ట్‌లో లేని వ్యక్తికి లేదా బిజినెస్‌కి పంపబడి, దానికి బదులుగా రిప్లై రాకపోతే, ఆ సందేశం నెలవారీ పరిమితిలోకి లెక్కించబడుతుంది. ఒకవేళ రిప్లై వస్తే, ఆ సంభాషణ సాధారణ సంభాషణగా పరిగణించబడుతుంది, దానిపై ఎటువంటి పరిమితులు ఉండవు.
అయితే, ఈ నెలవారీ పరిమితికి సంబంధించిన ఖచ్చితమైన సంఖ్యను (Exact Cap) వాట్సాప్ ఇంకా వెల్లడించలేదు. ఈ పరీక్షల సమయంలో వివిధ పరిమితులను పరిశీలిస్తున్నట్లు తెలుస్తోంది. సాధారణంగా వాట్సాప్‌ను ఉపయోగించే సాధారణ యూజర్లపై ఈ కొత్త పరిమితి ప్రభావం పెద్దగా ఉండదని, వారి మెసేజింగ్ అనుభవానికి ఎలాంటి ఆటంకం కలగదని వాట్సాప్ హామీ ఇస్తోంది. ఈ పరిమితికి దగ్గరవుతున్న యూజర్లకు లేదా బిజినెస్ ఖాతాలకు వాట్సాప్ ఒక పాప్-అప్ వార్నింగ్ (Pop-up warning) పంపే అవకాశం ఉంది. ఈ కొత్త మార్పు రాబోయే వారాల్లో మరిన్ని దేశాలకు విస్తరించవచ్చని భావిస్తున్నారు. స్పామ్‌ను నిరోధించేందుకు వాట్సాప్ చేపడుతున్న చర్యల్లో ఇది ఒక భాగమని చెప్పవచ్చు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి