ఐబొమ్మ రవి అరెస్టయ్యాక తెలుగు ప్రేక్షకుల మధ్య, ఇండస్ట్రీలో ఒక పెద్ద చర్చ మొదలైంది. రవి చేసినది చట్టపరంగా 100% తప్పే అయినప్పటికీ, మధ్యతరగతి ప్రేక్షకులు మాత్రం “టికెట్‌ రేట్లు భరించలేకపోతున్న సమయంలో ఫ్రీగా సినిమాలు చూపించాడు కదా” అంటూ అతనికి ఒక రకంగా సపోర్ట్ చేస్తున్నారు. అది తప్పైనా, వారి బాధలో నిజం ఉంది.ఈరోజు ఒక ఫ్యామిలీ థియేటర్‌కి వెళ్తే టికెట్లకే వెయ్యి నుంచి రెండు వేల రూపాయల వరకు ఖర్చవుతుంది.స్నాక్స్, పార్కింగ్, ట్రావెల్ అన్నీ కలిపేస్తే సినిమా ఒక లగ్జరీగా మారిపోయింది. అదే సినిమా కొన్ని రోజుల్లోనే ఐబొమ్మ లాంటి ప్లాట్‌ఫారమ్‌లలో హెచ్ డీలో ఫ్రీగా దొరుకుతోంది. అందుకే రవి వంటి వాళ్లు చాలా మందికి హీరోలాగా కనిపిస్తున్నారు.కానీ ఇక్కడ ఒక పెద్ద నిజం కూడా ఉంది.ఈ “ఫ్రీ” అనే మాట వెనక ప్రేక్షకుడు కోల్పోతున్నది డబ్బు కాదు—డేటా, ప్రైవసీ, మొబైల్‌ సెక్యూరిటీ. పైరసీ సైట్ల వెనక ఉండే నెట్‌వర్క్‌లు బ్యాంక్ వివరాలు, ఫోన్ డేటా, పర్సనల్ ఇన్ఫర్మేషన్ దోచుకోవడం సామాన్యమే. కాబట్టి రవి చేసినది “సేవ” కాదు—సైబర్ క్రైమ్‌నే.


అయినా రవి హీరోగా ఎందుకు మారాడు?

ఎందుకంటే సినిమా ఇండస్ట్రీ తానే మధ్యతరగతి ప్రేక్షకుడిని థియేటర్‌కి దూరం చేసింది.పెద్ద సినిమాలు రిలీజ్ అయ్యాక కొన్ని చోట్ల స్పెషల్ షోలు, పెంచిన టికెట్ రేట్లు, మల్టీప్లెక్స్‌లలో డబుల్ ఛార్జీలు సాధారణమైపోయాయి. ఒక హీరో – ఒక సినిమా – ఒక వారం. ఆ వారం మొత్తం టికెట్ రేట్లు ఆకాశాన్నంటడం, సింగిల్ స్క్రీన్‌లకూ అదే రేట్లు అమలు చేయడం వల్ల ఆర్థికంగా నడవడం కష్టమైపోయింది.ఒక ఫ్యామిలీ నెలలో ఒక్క సినిమా కూడా చూడలేని పరిస్థితి వచ్చింది.


కానీ ఈ సమస్య ఎప్పుడు మొదలైంది?

టికెట్ రేట్ల పెరుగుదల కొత్తకాదు. 1950ల నుంచే పెరుగుతూ వస్తున్నాయి.కానీ 2010 తర్వాత తెలుగు సినిమా అంతర్జాతీయ స్థాయికి ఎదగడంతో నిర్మాణ ఖర్చులు భారీగా పెరిగాయి.దాంతో నిర్మాతలు పెట్టుబడిని తిరిగి తెచ్చుకోవడానికి ప్రభుత్వాన్ని ఒత్తిడి చేసి స్పెషల్ రేట్లు పెంచించుకోవడం ప్రారంభించారు. ప్రభుత్వం ఆపినా… ఇండస్ట్రీ లాబీయింగ్ చేసి తిరిగి పెంచించుకున్నారు.


అతిరేక ప్రమోషన్లు – వ్యర్థ ఖర్చులు

ఇప్పుడు డైరెక్టర్లు, హీరోలు, నిర్మాతలు ప్రేక్షకుడి “మా హీరో కోసం ఏదైనా చేస్తాం” అనే ఫ్యాన్ భావాన్ని బిజినెస్ మోడల్‌గా మార్చేశారు. ప్రీ-రిలీజ్ ఈవెంట్స్, ప్రమోషన్లు, రోడ్డు షోలు, ట్రెండ్ హ్యాష్‌ట్యాగ్స్—ఇవి అన్నీ చూస్తే కోట్లు వృథాగా ఖర్చు అవుతున్నాయి. ఆ కోట్లు చివరికి ఎక్కడి నుంచి రికవర్ చేస్తారు? ప్రేక్షకుడి జేబు నుంచే.వాస్తవానికి నిర్మాతలు ఈ ప్రమోషన్ల మీద ఖర్చు తగ్గించి టికెట్ ధరలను సగటు స్థాయికి తీసుకొస్తే, థియేటర్లలో ప్రేక్షకులు సహజంగానే పెరుగుతారు. కానీ అది చేయకుండా, ఖర్చు మొత్తం ప్రజల మీద వేసేస్తున్నారు. అందుకే ప్రజలు “పైరసీ” వైపు మొగ్గుతున్నారు.


పైరసీ తప్పే :

పైరసీ అంటే దొంగతనం. ఎదుటివాడి కళ, తమయం, హక్కుల్ని పూర్తిగా దోచుకోవడం. టికెట్ రేట్లు అన్యాయం అనిపించినా ప్రేక్షకుడికి ఒక ఎంపిక ఉంది—చూడకపోవచ్చు. కానీ పైరసీ కోసం తన బ్యాంక్ అకౌంట్, ప్రైవసీ, సెక్యూరిటీను రిస్క్ చేస్తాడు. ఇది ఇరువైపులా నష్టం. ఈ పరిస్థితి మారకపోతే…ఈరోజు రవి అరెస్ట్ అయ్యాడు.రేపు రమేష్ వస్తాడు.ఎల్లుండి రాజా వస్తాడు. పైరసీ ఆగదు. ఆగాల్సింది – ఇండస్ట్రీ వ్యూహం. సినిమాని బిజినెస్‌గా కాకుండా కళగా చూడాలి. ప్రేక్షకుడిని కస్టమర్‌గా కాకుండా సహకర్తగా గౌరవించాలి. అప్పుడే పైరసీ ఆగుతుంది.అప్పుడే థియేటర్లు నిండుతాయి. అప్పుడే మంచి సినిమాలు బతుకుతాయి. అంటున్నారు జనాలు..!
మరిన్ని ఇంట్రెస్టింగ్ అప్ డేట్స్ కోసం wa క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి

మరింత సమాచారం తెలుసుకోండి:

I Bomma Ravi

Thota Jaya Madhuri

28/11/2025 07:18 AM