యాక్షన్ కింగ్ అర్జున్ సర్జా తన స్వీయ నిర్మాణం, దర్శకత్వంలో తీసిన చిత్రం ‘సీతా పయనం’. ఈ మూవీతో తన కూతురు ఐశ్వర్యని, ఉపేంద్ర అన్న కొడుకు నిరంజన్‌ని తెరకు పరిచయం చేశాడు. శ్రీ రామ్ ఫిల్మ్స్ ఇంటర్నేషనల్ బ్యానర్ మీద తెరకెక్కించిన ఈ సినిమాని ఫిబ్రవరి 14న రిలీజ్ చేశారు. మరి ఈ మూవీతో అర్జున్ తన కూతురు ఐశ్వర్యని నిలబెట్టాడా? మంచి విజయాన్ని అందించాడా? లేదా? అన్నది ఓ సారి చూద్దాం.

కథ
సీత (ఐశ్వర్య అర్జున్) చిన్నతనంలోనే అమ్మని కోల్పోతుంది. ఇక నాన్న రాజేంద్ర ప్రసాద్ (సత్య రాజ్) అమ్మలా మారి సీతని పెంచి పెద్ద చేస్తాడు. తండ్రికి కూతురు, కూతురికి తండ్రి ప్రపంచంగా బతికేస్తుంటారు. సీత మాత్రం పెళ్లి ఊసెత్తితే చాలు టాపిక్ మార్చేస్తుంటుంది. సీత ఓ సారి పని మీద వైజాగ్ నుంచి హైదరాబాద్‌కు వెళ్లాల్సి వస్తుంది. ఈ ప్రయాణంలో ఆమెకు అభి పరిచయం అవుతాడు. ఆ జర్నీలోనే కొన్ని ఘటనలు జరుగుతాయి. ఇక ఆమె చేసిన ఈ ప్రయాణంలో జరిగిన సంఘటనలు ఏంటి? ఆమె జీవితంలో వచ్చిన మార్పులు ఏంటి? ఈ జర్నీలో గిరి (అర్జున్ సర్జా), బసవన్న (ధృవ్ సర్జా) పాత్రలు ఏంటి? మరి చివరకు సీత పెళ్లి చేసుకుందా? లేదా? అన్నది తెరపై చూడాల్సిందే.

నటీనటులు
సీత పాత్రకు ఐశ్వర్య పర్‌ఫెక్ట్‌గా సెట్ అయ్యారు. ఐశ్వర్యని కాకుండా ప్రేక్షకులంతా సీతని చూసినట్టుగానే అనిపిస్తుంది. ఇక ఆమె ఆహార్యం, హావభావాలు, మాట తీరు అన్నీ కూడా ఆడియెన్స్‌ని ప్రేమలో పడేస్తాయి. ఆమెని చూస్తే ఇంట్లోని అమ్మాయిలా అనిపిస్తుంది. అంతలా ఆడియెన్స్‌ని కట్టి పడేస్తుంది. ఇక నిరంజన్ కూడా మన ఇంటి అబ్బాయిలానే, రాముడు మంచి బాలుడు అన్నట్టుగా అనిపిస్తాడు. ప్రకాష్ రాజ్‌కి ఇలాంటి పాత్రలు అలవాటే. ఆయన నటనకు వంక పెట్టడానికి లేదు. ఇక సత్యా రాజ్ తండ్రి కారెక్టర్‌లో మరోసారి అందరినీ మెప్పించేశాడు. బిత్తిరి సత్తి రెండు, మూడు చోట్ల కనిపించి, నవ్విస్తాడు. అర్జున్ సర్జా ఎంట్రీకి థియేటర్లు బ్లాస్ట్ అవుతాయి. ధృవ్ సర్జా బ్లాక్, అక్కడ చెప్పిన సందేశం చాలా మందికి కనెక్ట్ అవుతుంది. మిగిలిన పాత్రధారులందరూ కూడా తమకు ఇచ్చిన కారెక్టర్‌కు న్యాయం చేసినట్టు అనిపిస్తుంది.

విశ్లేషణ
సీతా పయనం కోసం అర్జున్ కొత్త కథని, పాయింట్‌ని ఏమీ రాసుకోలేదు. ప్రస్తుత తరం మరిచిపోతోన్న విలువల్ని గుర్తు చేసే ప్రయత్నం చేశాడు. ప్రేమ, పెళ్లి, విడాకులు అనేవి ఇప్పటి తరానికి ఎంత చులకన అయ్యాయో అందరికీ తెలిసిందే. కానీ ప్రేమ గొప్పదనం, మన హైందర ధర్మంలో పెళ్లికి ఉన్న గొప్పదనం గురించి ఎంతో గొప్పగా చెప్పాడు. తల్లిదండ్రుల ప్రేమ ఎలా ఉండాలి.. పిల్లల్ని ఎలా పెంచాలి, ఎంత సంస్కారంతో పెద్ద చేయాలి.. పిల్లలు కూడా తల్లిదండ్రుల పట్ల ఎలా మెలగాలి అనే ఇలాంటి ఎన్నో మంచి విషయాల్ని అర్జున్ చెప్పే ప్రయత్నం చేశాడు.

సీత తన ప్రయాణం మొదలు పెట్టడం, ఆ జర్నీలో అభి చేరడం ఇలా కథ గాడిన పడి.. మనం కనెక్ట్ అవ్వడానికి కాస్త టైం పడుతుంది. అలా సీతా ప్రయాణంతో ఆడియెన్స్ కూడా కనెక్ట్ అయి జర్నీని స్టార్ట్ చేసిన తరువాత ఎండ్ వరకు బోరింగ్‌గా అయితే ఫీల్ అవ్వడు. ఇందులో పెద్ద ట్విస్టులు ఏమీ ఉండవు. అలా సాఫీగా, స్మూత్‌గా కథ సాగుతూ ఉంటుంది. తన ప్రాణాల్ని కాపాడేందుకు పరోక్షంగా కారణమైన ప్రతీ ఒక్కరికీ థాంక్స్ చెప్పేందుకు మళ్లీ సీతా ప్రయాణం స్టార్ట్ చేస్తుంది. అదంతా కూడా ద్వితీయార్దంలో చక్కగా చూపించారు. ఇక ప్రీ క్లైమాక్స్, క్లైమాక్స్ అయితే గుండెల్ని హత్తుకుంటుంది. ఇలాంటి పిల్లలు, తండ్రులు సమాజానికి అవసరం అన్నట్టుగా ఆ పాత్రల్ని మలిచాడు అర్జున్.

ఇక అర్జున్ సర్జా స్పెషల్ కేమియో అదిరిపోతుంది. అర్జున్ అలా ఫ్రేమ్ మీద కనిపిస్తే.. అసలే ఈ సినిమాకి అతనే హీరో అన్నట్టుగా ఉంటుంది. ధృవ్ సర్జా పాత్రతో గో రక్షణ అంటూ ఓ అద్భుతమైన సందేశాన్ని ఇచ్చాడు అర్జున్. ఇక టెక్నికల్ టీంని కూడా అర్జున్ అద్భుతంగా వాడుకున్నాడు. అనూప్ నుంచి మంచి పాటల్ని, బీజీఎంని రాబట్టుకున్నాడు. పాటల కంటే ఎక్కువగా మాటలే మనసుల్ని తాకుతాయి. ఎడిటింగ్, సెట్ వర్క్ ఇలా అన్నీ కూడా బాగానే ఉంటాయి. నిర్మాణ విలువలు ఎంతో ఉన్నతంగా ఉంటాయి. అర్జున్ తన ప్రొడక్షన్ కంపెనీలో ఓ గొప్ప సినిమాని తీసి తన కూతురికి గిఫ్ట్‌గా ఇచ్చినట్టు అనిపిస్తుంది.

రేటింగ్ 3.5/5
మరిన్ని ఇంట్రెస్టింగ్ అప్ డేట్స్ కోసం wa క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి

మరింత సమాచారం తెలుసుకోండి:

seetha payanam

Reddy P Rajasekhar

14/02/2026 07:15 AM