సాధారణంగా ఎక్కువ శాతం మంది ప్రజలు తమ వయసు పెరిగే కొద్దీ యవ్వనం కరిగిపోతుందని బాధపడుతుంటారు. 60 ఏళ్ల వయసులోనూ ఇరవై ఏళ్ల నవ యవ్వనంగా కనబడేందుకు ఎన్నో రకాల పాట్లు పడుతుంటారు. ఇక అలాంటి వారికి ఇజ్రాయేల్ శాస్త్రవేత్తలు శుభవార్త చెబుతున్నారు. స్వచ్ఛమైన గాలిని పీల్చుకుంటే అది సాధ్యమవుతుందని టెల్‌ అవివ్‌ యూనివర్సిటీ పరిశోధకులు నిరూపించారు. తమ పరిశోధనతో యావత్‌ ప్రపంచం దృష్టిని ఆకర్షించారు. పరిశోధనలో భాగంగా 64 ఏళ్లు లేదా అంతకంటే ఎక్కువ వయసున్న 26 మందిని మూడు నెలల పాటు పరిశీలించారు. ప్రెషరైజ్డ్‌ ఆక్సిజన్‌ చాంబర్‌‌లలో ఉంచి, వారంలో ఐదురోజుల పాటు.. రోజుకు గంటన్నర మాస్క్‌ల ద్వారా స్వచ్ఛమైన ఆక్సిజన్‌ను అందజేశారు. ఈ ట్రయల్స్‌కు వాడిన చాంబర్లలో.. ఆక్సిజన్‌ లభ్యత అత్యంత తక్కువగా ఉండేలా చూశారు. మూడు నెలల అనంతరం.. ఆ వృద్ధుల జీవకణ స్థాయిలో రెండు కీలకమైన మార్పులు జరిగినట్లు పరిశోధకులు గుర్తించారు. ప్రతి మనిషిలోనూ 23 జతల క్రోమోజోమ్‌లు ఉంటాయి. ఇవి ఎక్స్‌, వై ఆకారంలో ఉంటాయి. తల్లిదండ్రుల నుంచి పిల్లలకు ‘జన్యు’ సంబంధ వారసత్వం సంక్రమింపజేసే వాహకాలే క్రోమోజోమ్‌లు. క్రోమోజోమ్‌ల పరిమాణం క్షీణించకుండా.. వాటి చివరన నాలుగువైపులా మూతల్లా ఉండే ‘టెలోమెర్‌’ తొడుగులు ఉంటాయి. సాధారణంగా వయసు పెరిగే కొద్దీ.. టెలోమెర్‌లు తరుగుదలకు గురై వాటి పరిమాణం గణనీయంగా తగ్గిపోతుంది.


మనిషి పుట్టినప్పుడు సగటున 11 కిలోబే‌స్‌లు ఉండే‘టెలోమెర్‌’ పొడవు.. వృద్ధాప్యానికి 4 కిలోబే‌స్‌లకు కుచించుకుపోతుంది. మహిళలతో పోలిస్తే పురుషుల్లోనే టెలోమెర్‌ తరుగుదల రేటు ఎక్కువగా ఉంటుంది. అయితే అందుకు పూర్తి విరుద్ధంగా.. ఈ ప్రయోగాల్లో పాల్గొన్న వృద్ధుల్లో టెలోమెర్‌లు మళ్లీ 20 శాతం పెరిగినట్టు శాస్త్రవేత్తలు గుర్తించారు. పాతికేళ్ల వయసులో ఉన్నప్పటి స్థితికి టెలోమెర్‌లు మళ్లీ చేరడాన్ని అత్యంత సానుకూల అంశంగా అభివర్ణించారు. సాధారణ వ్యాధుల్లాగే.. వయసు మీద పడటాన్ని కూడా నిలువరించవచ్చనే ఆశాభావాన్ని వ్యక్తం చేశారు. పరిశోధనలో పాల్గొన్న వృద్ధుల్లో ‘సెనెసెంట్‌ కణాల’ మోతాదు 37 శాతం మేర తగ్గిందని వెల్లడించారు. ‘సెనెసెంట్‌’లు ఒకరకం శరీర కణాలు. సాధారణంగా వీటివల్ల ఎలా సమస్యలూ తలెత్తవు. కానీ, వాటి డీఎన్‌ఏకు నష్టం వాటిల్లినా, వైరల్‌ ఇన్ఫెక్షన్‌ సోకినా.. ఆరోగ్య సమస్యల రూపంలో తీవ్ర ప్రతికూల పరిణామాలను కలిగిస్తాయి. ప్రతికూలతలు సృష్టించే ‘సెనెసెంట్‌’ కణాలను జాంబీ కణాలు అని కూడా పిలుస్తారు. ఇవి తమ చుట్టుపక్కల సంచరించే ఇతరత్రా శరీర కణాలపైకి రసాయనాలను విడుదలచేసి హాని కలిగిస్తాయి.


ఈ కారణంతో చాలామందిలో మధుమేహం, కేటరాక్ట్‌, ఆస్టియోపోరోసిస్‌, అల్జీమర్స్‌, పార్కిన్సన్స్‌, కిడ్నీ సమస్యలు, ధమనుల్లో కొవ్వు పేరుకుపోవడం, హృద్రోగాలు వంటివి తలెత్తుతుంటాయని గతంలో ఎలుకలపై జరిపిన పరిశోధనల్లో తేలింది. ఈ తరహా జాంబీ కణాలు భారీగా శరీరంలో పేరుకుపోతే.. రుగ్మతల ముప్పు ఉంటుంది. ఇజ్రాయేల్ శాస్త్రవేత్తల తాజా పరిశోధనలో.. ఆక్సిజన్‌ చాంబర్లలో గడిపిన వృద్ధుల్లో ‘సెనెసెంట్‌’ కణాల మోతాదు 37 శాతం తగ్గడం మరో సానుకూల అంశం. పౌష్టికాహారం, వ్యాయామాలతో టెలోమెర్‌ల తరుగుదల రేటును, జాంబీ కణాల మోతాదును తగ్గించి.. వృద్ధాప్య ఛాయలు త్వరగా అలుముకోకుండా చేయొచ్చని గతంలో పలు పరిశోధనల్లో వెల్లడయ్యింది. తమ పరిశోధన అంతకు మించిన ఫలితాలనే అందించిందని టెల్‌ అవివ్‌ వర్సిటీ శాస్త్రవేత్త డాక్టర్‌ అమీర్‌ హదానీ తెలిపారు. తాజా పరిశోధన ఆశాజనకంగా ఉంది.. గతంలో అనేక మంది శాస్త్రవేత్తలు ఇటువంటి ప్రయత్నాలు చేసినా అంతగా విజయవంతం కాలేదు. అయితే, ప్రస్తుత పరిశోధనలో పాల్గొన్న సమూహం చాలా చిన్నది. కానీ, తదుపరి పరిశోధనలకు ఇది ప్రోత్సాహంగా ఉంటుంది. టెల్ అవీవ్ యూనివర్సిటీ ఫ్యాకల్టీ ఆఫ్ మెడిసిన్, సాగోల్ స్కూల్ ఆఫ్ న్యూరోసైన్స్ నిపుణుడు షైర్ ఎఫ్రాటి తమ పరిశోధనకు ప్రేరణగా నిలిచి కారకం గురించి వివరించారు. ‘కవలలపై నాసా చేసిన ప్రయోగంలో ఒకరిని అంతరిక్షంలోకి పంపి, మరొకర్ని భూమిపై ఉంచారు. వారి టెలీమెర్ పొడవులో గణనీయమైన వ్యత్యాసాన్ని ప్రదర్శించారు.. వృద్ధాప్యంలో జరిగే మార్పులను బట్టి బయటి వాతావరణంలో మార్పులు కోర్ సెల్యులార్‌ను ప్రభావితం చేస్తాయని మేము గ్రహించాం’ అని ఎఫ్రాటి అన్నారు. కణ విభజన జరిగినప్పుడల్లా మిగితా క్రోమోజోమ్‌లతో పాటు అవి తమను తాము కాపీ చేసుకుంటాయి. అయినప్పటికీ, ప్రతిరూపణతో చిన్న చిన్న శకలాలు కొత్త కాపీలోకి ప్రవేశించడంలో విఫలమవుతాయి.. తాజా క్రోమోజోమ్ దాని పూర్వీకుల కంటే తక్కువగా ఉంటుంది. చిన్న టెలీమెర్‌లు క్రోమోజోమ్‌ను ఉత్పరివర్తనాల అధిక ప్రమాదంలో ఉంచుతాయి.. ఈ ఉత్పరివర్తనాలు కేన్సర్ వంటి అన్ని వ్యాధులలోనే కాదు వయస్సు-సంబంధిత పరిస్థితుల సమూహానికి దారితీసే మార్పులతో సమానంగా ఉంటాయి.