അവതരണത്തിലെ കൈയൊതുക്കവുമായി ചതുർമുഖം തീയ്യറ്ററുകളിൽ പൊലിക്കുന്നു. കൊൺജറിംഗ്, അനബെല്ല പോലുള്ള സിനിമകൾ കണ്ട് പരിചയിച്ചവരാണ് മലയാളികൾ. തൻറെ മരണത്തിന് ഉത്തരവാദികളായവരെ തിരഞ്ഞ് പിടിച്ച് കൊല്ലുന്ന പ്രതികാര ദാഹിയായ യക്ഷി എന്ന ക്ലീഷേ ചിന്തയേയും പ്രേതത്തെ ഒഴിപ്പിക്കുന്ന പതിവ് കാഴ്ചകളേയും പടിക്ക് പുറത്ത് നിർത്തിയിരിക്കുന്നു എന്നതിലാണ് 'ചതുർ മുഖം' വ്യത്യസ്തമാകുന്നത്. അതായത് ഹൊറർ സിനിമകൾ മലയാളത്തിൽ ഏറെ വന്ന് പോയിട്ടുണ്ടെങ്കിലും വ്യക്തികളിൽ നിന്നും വസ്തുക്കളിലേക്ക് പ്രേതത്തെ സന്നിവേശിപ്പിക്കുന്ന പ്രേതാനുഭവം മലയാള സിനിമയിൽ അത്ര പരിചിതമല്ല.
സ്മാർട്ട് ഫോൺ ശരീരത്തിൻറെ ഒരു ഭാഗമായി കാണുന്ന ജീവതത്തെ സോഷ്യൽ മീഡിയയിലെ തുറന്ന പുസ്തകമാക്കി മാറ്റിയ വ്യക്തിയാണ് തേജസ്വനി. നിലവിൽ ഉപയോഗിച്ചുകൊണ്ടിരുന്ന ഫോൺ കേടാവുകയും വില കൂടിയ മികച്ച ബ്രാൻഡ് ന്യൂ ഫോൺ വാങ്ങുന്നത് വരെ താൽക്കാലിക ഉപയോഗത്തിന് ഓൺലൈനായി കുറഞ്ഞ വിലയിൽ മികച്ച സ്പെസിഫിക്കേഷൻ ഉള്ള ഒരു ഫോൺ വാങ്ങുന്നു. ചിത്രത്തിലെ നായിക കഥാപാത്രമായ തേജസ്വനിയായി മഞ്ജുവാര്യർ എത്തുമ്പോൾ വില്ലൻ കഥാപാത്രമാകുന്നത് ലിസ എന്ന ബ്രാൻഡിലുള്ള ഒരു മൊബൈൽ ഫോണാണ്. അപ്രതീക്ഷിത മുഹൂർത്തങ്ങളും ഭയപ്പെടുത്തുന്ന നിമിഷങ്ങളും വേണ്ടുവോളമുള്ള ചിത്രം ഒരു സീറ്റ് എഡ്ജ് ഹൊറർ അനുഭവം പ്രേക്ഷകന് നൽകുന്നുണ്ട്.
ടെക്നോ ഹൊറർ എന്ന് വിശേഷിപ്പിക്കുന്ന ചിത്രം സോഷ്യൽ മീഡയയിലേക്ക് കണക്ട് ചെയ്യാതെ തന്നെ മൊബൈൽ ഫോൺ എന്ന ഹാർഡ് വെയറിൽ കേന്ദ്രീകരിക്കുന്നു എന്നതും ക്ലീഷേയിലേക്ക് വഴുതി വീഴാതെ ചിത്രത്തെ താങ്ങി നിർത്തുന്നു.തേജസ്വനിയുടെ ജീവിതത്തിൽ ഭയാനകമായ പല അപ്രതീക്ഷിത സംഭവങ്ങളും അരങ്ങേറുന്നു. തേജസ്വനിയുടെ സുഹൃത്തും ബിസിനസ് പങ്കാളിയുമായ ആൻറണി എന്ന സണ്ണി വെയ്ൻ കഥാപാത്രവും അലൻസിയറിൻറെ ക്ലമൻറ് എന്ന കഥാപാത്രവും ഒപ്പം ചേർന്ന് തേജസ്വനിയെ ഈ പ്രശ്നത്തിൽ നിന്ന് രക്ഷപെടുത്താൻ ശ്രമിക്കുന്നതുമാണ് ചതുർമുഖത്തിൻറെ പ്രമേയം. ശബ്ദ വിന്യാസങ്ങൾക്കൊപ്പം ദൃശ്യങ്ങളിലൂടെയും ഭീതി ജനിപ്പിക്കാൻ അഭിനന്ദ് രാമാനുജൻറെ ഛായാഗ്രഹണത്തിന് സാധിച്ചിട്ടുണ്ട്. അതേസമയം മികച്ച ഫ്രെയിമുകളാൽ സമ്പന്നവുമാണ് ചിത്രം.
മനോജിന്റെ എഡിറ്റിംഗും മികവ് പുലര്ത്തിയിട്ടുണ്ട്. അഭയകുമാര് കെ, അനില് കുര്യന് എന്നിവര് ചേര്ന്ന് ഒരുക്കിയ തിരക്കഥ എന്ന ബ്ലൂപ്രിന്റിന് അഭിനന്ദ് രാമാനുജവും ഡോണ് വിന്സെന്റും മനോജും ചേര്ന്ന് മികച്ച ഹൊറര് അനുഭവമാക്കി മാറ്റുമ്പോള് അതിന് ചുക്കാന് പിടിക്കുന്നത് നവാഗതരായ രഞ്ജീത്ത് കമല ശങ്കര്, സലില് വി കൂട്ടുകെട്ടാണ്. മലയാള സിനിമയ്ക്ക് ഒരുപിടി മികച്ച ചിത്രങ്ങളെ സംഭാവന ചെയ്യാന് ഈ ഇരട്ട സംവിധായകര്ക്ക് സാധിക്കുമെന്ന് ചതുര്മുഖം സാക്ഷ്യപ്പെടുത്തുന്നു.
Find out more:
click and follow Indiaherald WhatsApp channel