ఎర్రకోటలో జరిగే గన్ సెల్యూట్ కోసం ఇప్పటి వరకూ బ్రిటిష్ తుపాకులనే వాడటం విశేషం. భారత్ కు స్వాతంత్ర్యం వచ్చి 75 ఏళ్లవుతున్నా ఇంకా వేడుకలకోసం మనల్ని పాలించి వెళ్లిన బ్రిటిష్ తుపాకుల్నే వాడటం నేతలకు నచ్చలేదు. అందుకే భారత్ తయారీ తుపాకులను గన్ సెల్యూట్ కోసం వాడాలనుకుంటున్నారు. ఈ ఏడాది స్వదేశీ పరిజ్ఞానంతో, డీఆర్డీవో సంస్థ తయారు చేసిన ఏటీఏజీఎస్‌ తుపాకులను గన్ సెల్యూట్ కోసం వాడబోతున్నారు.
సాధారణంగా ఈ తుపాకులను సరిహద్దుల్లో ఉపయోగిస్తుంటారు. అయితే వీటిలో కొన్ని మార్పులు చేసి ఈసారి గన్ సెల్యూట్ కోసం సిద్ధం చేశారు. పుణె లోని డీఆర్డీవో శాస్త్రవేత్తలతోపాటు ఉన్నతాధికారులు ఈ ప్రాజెక్టుకు రూపకల్పన చేశారు. ఆత్మనిర్భర్‌ భారత్ లో భాగంగా దేశీయంగా కూడా ఆయుధాలను భారత్ రక్షణ శాఖ అభివృద్ధి చేస్తోంది. భారత సైన్యంలో ఉపయోగిస్తోన్న పాత ఫిరంగుల స్థానంలో వీటిని క్రమక్రమంగా ప్రవేశ పెడుతున్నారు. ఈ ప్రాజెక్టుకు డీఆర్డీవో 2013లో శ్రీకారం చుట్టింది. ఈ తుపాకుల తో 48 కిలోమీటర్ల దూరంలో ఉన్న లక్ష్యాలను కూడా ఛేదించవచ్చు. ప్రస్తుతం ఈ తుపాకులే ఇప్పుడు ఎర్రకోటలో జరిగే 75వ స్వాతంత్ర దినోత్సవాల్లో హైలెట్ కాబోతున్నాయి.
