ప్రముఖ ఐటి దిగ్గజం హెచ్ సిఎల్  టెక్నాలజీస్ యొక్క లాభాల వృద్ధి రేటు పెరిగిందనే చెప్పాలి. అయితే ఈ సంవత్సరం జూలై నుంచి సెప్టెంబర్‌ త్రైమాసికంలో హెచ్‌సీఎల్‌ టెక్నాలజీస్‌ నికర లాభం 18.5 శాతంగా  వృద్ధి చెందింది. రూ. 3,142 కోట్లు రూపాయలుగా నమోదు అయినది.ఇదే వ్యవధిలో ఈ నికర లాభాన్ని గత ఆర్థిక సంవత్సరంతో పోల్చితే రూ. 2,651 కోట్లుగా ఉంది. మరోవైపు, ఆదాయం 6 శాతం పెరిగి రూ. 17,528 కోట్ల నుంచి రూ. 18,594 కోట్లకు చేరింది.అందువలన  షేరు ఒక్కింటికి రూ. 4 చొప్పున మధ్యంతర డివిడెండ్‌ ఇవ్వనున్నట్లుగా  కంపెనీ ప్రకటించింది. ‘కొత్త ఆర్డర్లు భారీగా వచ్చాయి. గత క్వార్టర్‌తో పోలిస్తే 35 శాతం వరకు పెరిగాయి‘ అని సంస్థ యొక్క సీఈవో సీ విజయకుమార్‌ వెల్లడించారు.ఇకపోతే  త్రైమాసికాల వారీగా చూస్తే ఒప్పందాల సంఖ్య ఆల్‌టైమ్‌ గరిష్ట స్థాయిలో నమోదైందని వివరించారు. జర్మనీ, ఫ్రాన్స్, ఆస్ట్రేలియా, జపాన్, కెనడా తదితర మార్కెట్లలో పెట్టుబడులను కూడా పెంచనున్నట్లు విజయకుమార్‌ చెప్పారు.




అయితే  హెచ్‌–1బీ వీసాలపై అమెరికా ప్రభుత్వ ఆంక్షల అంశం మీద అయన స్పందిస్తూ తమ ఉద్యోగుల్లో మూడింట రెండొంతుల మంది స్థానికులే ఉన్నారని విజయకుమార్‌ చెప్పారు.అయితే ఈ ఆర్థిక సంవత్సరంలో వ్యయాలపరంగా కంపెనీ పై  దీని ప్రభావం పెద్దగా ఉండకపోవచ్చు అని, వచ్చే ఏడాది మాత్రం కొంత ఉండవచ్చని  తెలిపారు.ఇక షేర్ విషయానికి వస్తే లాభాల స్వీకరణతో హెచ్‌సీఎల్‌ టెక్నాలజీస్‌ షేరు దాదాపు 4 శాతం తగ్గింది. బీఎస్‌ఈలో ఒక దశలో 4.47% క్షీణించి రూ. 821 స్థాయిని కూడా తాకింది. చివరికి 3.76 శాతం క్షీణతతో రూ. 827.10 వద్ద క్లోజయ్యింది. బీఎస్‌ఈ 30లో అత్యధికంగా నష్టపోయిన షేరు ఇదే. ఎన్‌ఎస్‌ఈలో 3.48 శాతం తగ్గి రూ. 830.05 వద్ద ముగిసింది. బీఎస్‌ఈలో 7.23 లక్షలు, ఎన్‌ఎస్‌ఈలో 2.89 కోట్ల షేర్లు చేతులు మారాయి.



ఉద్యోగుల విషయానికి వస్తే సెప్టెంబర్‌ ఆఖరు నాటికి కంపెనీలో ఉద్యోగుల సంఖ్య 1,53,085గా ఉంది. ఐటీ సేవల విభాగంలో  ఉద్యోగుల వలసలు రేటు 12.2 శాతంగా ఉంది. సెప్టెంబర్‌ త్రైమాసికంలో 1,500 పైచిలుకు ఫ్రెషర్స్‌ను కంపెనీ జాయిన్ చేసుకుంది. ఉద్యోగుల వేతనాల విషయానికి వస్తే కరోనా వైరస్‌ పరిణామాల కారణంగా వేతనాల పెంపు గతంలో వాయిదా పడింది.కానీ ఇప్పుడు వేతనాల పెంపును అక్టోబర్‌ 1 లేదా జనవరి 1 వర్తించేలా చేస్తాము అన్నారు. అదికూడా  దశలవారీగా వివిధ స్థాయిల ఉద్యోగులకు వేతనాల పెంపును అమలు చేయనున్నట్లు విజయకుమార్‌ చెప్పారు.