తెలుగు సినీ పరిశ్రమ చరిత్రలో సినీ పరమపదం అంటే ఎన్టీఆర్, ఏఎన్ఆర్, కృష్ణ, శోభన్ బాబు పేర్లు అందరికీ గుర్తుకొస్తాయి. ఆ తర్వాత కాలంలో చిరంజీవి, బాలకృష్ణ, వెంకటేష్, నాగార్జున ఈ నలుగురు సీనియర్ హీరోలు టాలీవుడ్‌కు నాలుగు స్తంభాలుగా నిలిచారు. దశాబ్దాలపాటు ఇండస్ట్రీని నిలబెట్టి, ప్రతి జనరేషన్‌కు వినోదం అందిస్తూ తమకంటూ ప్రత్యేకమైన ట్రేడ్‌మార్క్ స్టైల్‌ను సొంతం చేసుకున్నారు. కాలం మారినా, ట్రెండ్స్ మారినా, వీరు కమర్షియల్ సినిమాల్లో తమ కెరీర్‌ను అప్‌డేట్ చేసుకుంటూ దూసుకుపోతూనే వున్నారు. అయితే ఇప్పుడు ప్రపంచం పాన్ ఇండియా సినిమాల వైపు పరుగులు తీస్తోంది. సౌత్ సినిమాలు దేశవ్యాప్తంగా మాత్రమే కాదు, గ్లోబల్‌గా సత్తా చాటుతున్నాయి. కానీ సీనియర్ నాలుగు హీరోల విషయానికి వస్తే, పాన్ ఇండియా మార్కెట్ కోసం ప్రత్యేకంగా రూపొందిన సినిమా ఇప్పటివరకూ వీరి నుంచి రాలేదు.
సీనియర్ హీరోలు కావడంతో ఇండస్ట్రీపైనే, సౌత్ ప్రేక్షకులపైనే దృష్టి పెట్టారు. కానీ ఇప్పుడు ఆ గ్యాప్‌ను మోస్ట్ పవర్ఫుల్ స్టెప్‌తో నటసింహం బాలయ్య భర్తీ చేస్తున్నారు. అఖండ 2 - తాండవంను పాన్ ఇండియా ప్రమోషన్‌తో విడుదల చేయాలనే నిర్ణయం ఇప్పుడు ఇండస్ట్రీ దృష్టిని మొత్తం ఆకర్షిస్తోంది. ఈ సినిమాకు గాను బాలయ్య టీం చేసిన పనులు చూస్తే, వారి అంబిషన్ ఏ స్థాయిలో ఉందో అర్థమవుతోంది. పాటలను ముంబైలో లాంచ్ చేయడం, కర్నాటకలో ట్రైలర్ రిలీజ్ చేయడం, ఉత్తరప్రదేశ్ ముఖ్యమంత్రి యోగి ఆదిత్యనాథ్‌ను కలిసి ఆయన ఆశీర్వాదాలు తీసుకోవడం ఇవ‌న్నీ పాన్ ఇండియా స్ట్రాటజీలో భాగమే. అదీగాక, బాలయ్య స్వయంగా హిందీ డబ్బింగ్ చెప్పడం ఈ సినిమా కోసం ఆయన చూపుతున్న కమిట్‌మెంట్‌కు నిదర్శనం.
కంటెంట్ విషయానికొస్తే ట్రైలర్ టీజర్ చూస్తే డివైన్ పవర్, సనాతన ధర్మ పరాక్రమం, ఆర్మీ , వార్ ఎలిమెంట్స్ కలయికగా కనిపిస్తోంది. ఇలాంటి జానర్ నార్త్ ఇండియాలో భారీగా వర్కౌట్ అవుతుందని ఇప్పటికే నిరూపితమైంది దీంతో అఖండ 2ను పాన్ ఇండియా రేంజ్‌లో ప్రమోట్ చేయడానికి ఇదే సరైన సమయం, సరైన కంటెంట్. ఇప్పటిదాకా సీనియర్ నాలుగు హీరోల్లో ఎవరూ పాన్ ఇండియా రేసులో అడుగుపెట్టలేదు. ఇప్పుడు బాలయ్య మొదటి ప్రయత్నంతోనే బిగ్ బ్లాస్ట్ కొడతాడా? అన్నదానిపై సినిమా ఇండస్ట్రీ, ఫ్యాన్స్ అంతా ఉత్కంఠగా ఎదురు చూస్తున్నారు. మొదటి ప్రయత్నమే సూపర్ హిట్ కావాలని… టాలీవుడ్ కూడా కోరుకుంటోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి