విశాఖ సాగరతీరానికి మరో అట్రాక్షన్ రాబోతోంది. ఏషియాలోనే అతిపెద్ద కన్వెన్షన్ సెంటర్ ఏర్పాటు కానుంది. ఈ మేరకు విశాఖలో ఉపరాష్ట్రపతి వెంకయ్యనాయుడు ప్రతిష్టాత్మక నిర్మాణానికి శంకుస్థాపన చేశారు. 9 ఎకరాల విస్తీర్ణంలో అత్యాధునిక హంగులతో రూపుదిద్దుకోనున్న కన్వెన్షన్ సెంటర్ ను యుఏఈ కి చెందిన లూలూ గ్రూప్ నిర్మిస్తోంది. హోటల్స్, కన్వెన్షన్ సెంటర్ల నిర్మాణంలో ప్రపంచ ప్రసిద్ధి చెందిన యుఏఈకి చెందిన లులూ గ్రూప్ అత్యంత ప్రతిష్టాత్మకంగా నిర్మిస్తున్న ఈ కన్వెన్షన్ సెంటర్ కు ఉపరాష్ర్టపతి వెంకయ్యనాయుడు శంకుస్థాపన చేశారు.
విశాఖలో 9 ఎకరాల విస్తీర్ణంలో 700కోట్ల పెట్టుబడితో నిర్మించే కన్వెన్షన్ సెంటర్ ను అంతర్జాతీయ స్థాయిలో కనీవినీ ఎరుగని అధునాతన సౌకర్యాలతో నిర్మిస్తున్నారు. 7వేల మందితో గ్లోబల్ ఈవెంట్స్ ను నిర్వహించుకునేలా భారీ కన్వెన్షన్ సెంటర్ తో పాటు అత్యాధునికమైన ఫంక్షన్ హాల్స్.. ఈ కన్వెన్షన్ సెంటర్ ప్రత్యేకత.. ఇక్కడ అన్ని ఫంక్షన్ లకు అనువైన అత్యాధునిక ఇంటీరియర్ డెకరేషన్స్ కూడా అందుబాటులో ఉంటాయి.
అద్భుతమైన ఆతిథ్యం.. అత్యద్భుతమైన వాతావరణంలో 5 స్టార్ హోటల్ అదనపు అట్రాక్షన్ కాబోతోంది. అన్నింటికి మించి.. వరల్డ్ క్లాస్ షాపింగ్ మాల్.. ఆహారప్రియుల కోసం 50కి పైగా ఫుడ్ కోర్ట్స్, 2 స్క్రీన్ మల్టిప్లెక్స్ థియేటర్లు, ఫ్యామిలీ అంతా కలిసి ఎంజాయ్ చేసేలా ఫ్యామిలీ ఎంటర్ టైన్ మెంట్, అమ్యూజ్ మెంట్ సెంటర్లతో నభూతో నభవిష్యత్ అన్న రీతిలో లులూ కన్వెన్షన్ సెంటర్ రాబోతోంది.
కేవలం ఎంటర్ టైన్ మెంట్ కోణంలోనే కాదు.. ఈ ప్రతిష్టాత్మక ప్రాజెక్ట్ పూర్తైతే విశాఖ చుట్టుపక్కల పదివేల మంది వరకూ ఉపాధి దొరకనుంది. ఈ ప్రతిష్టాత్మక ప్రాజెక్ట్ ను తాము చేపట్టడం ఆనందంగా ఉందన్న లులు గ్రూప్ చైర్మన్ యూసఫ్ అలీ.. మంచి అభిరుచి గల ముఖ్యమంత్రితో పనిచేయడం సంతోషంగా ఉందన్నారు. ఈ ప్రాజెక్ట్ ఎలా ఉండాలో ఓ ఆర్కిటెక్ లా, ఇంజినీర్ లా చంద్రబాబు తమకు వివరించారని చెప్పారు. వీలైనంత త్వరగా ఈ నిర్మాణం పూర్తి చేస్తామన్నారు.
‘విశాఖ’లో త్వరలో ఏర్పాటు చేయనున్న కన్వెన్షన్ సెంటర్ కు సముద్రతీరం అదనపు ఆకర్షణగా నిలుస్తుందని సీఎం చంద్రబాబునాయుడు అన్నారు.. 30నెలలలోపే ఈ ప్రతిష్టాత్మక ప్రాజెక్ట్ ను పూర్తిచేయాలని చంద్రబాబు లులు ప్రతినిధులను కోరారు. ప్రాజెక్ట్ ను వీలైనంత త్వరగా పూర్తిచేసేలా ప్రభుత్వం అన్నిరకాల సహకారం అందిస్తామన్న చంద్రబాబు.. వీలైతే వచ్చే సీఐఐ సదస్సు ఈ కన్వెన్షన్ సెంటర్ లోనే జరుపుదామని ఆకాంక్షించారు.
