తెలంగాణ రాజకీయాల్లో జూబ్లీహిల్స్ ఉప ఎన్నిక ఫలితాల తర్వాత బీజేపీలో కొత్త అలజడి మొదలైంది. పార్టీ అభ్యర్థి డిపాజిట్ కూడా కోల్పోవడం కేవలం ఓటమి మాత్రమే కాకుండా, అంతర్గత విభేదాలు ఎంత తీవ్రంగా ఉన్నాయో బయటపెట్టింది. ఈ ఎన్నికల్లో బీజేపీ ప్రచారం, వ్యూహం, నాయకత్వం ఈ మూడింటిలోనూ తీవ్రమైన లోపాలు ఉన్నాయని స్పష్టంగా కనిపించింది. ముఖ్యంగా నేతల మధ్య చోటుచేసుకున్న మాటల యుద్ధం పరిస్థితిని మరింత దిగజార్చింది. ఈటల రాజేందర్ ఇటీవల చేసిన వ్యాఖ్యలు పార్టీ లోపలే పెద్ద చర్చకు దారితీశాయి. “ మత రాజకీయాలు, డివిజన్ పాలిటిక్స్ తెలంగాణలో నడవవు. అవి నేతలు మానుకోవాలి ” అని ఈటల చెప్పడం స్పష్టంగానే బండి సంజయ్‌పై లక్ష్యంగా ఉన్న విమర్శలుగానే మారింది. ఎందుకంటే జూబ్లీహిల్స్ ప్రచారంలో బండి సంజయ్ హిందూత్వ ఆధారిత ప్రసంగాలకు ప్రాధాన్యం ఇచ్చారు. దీనిపై ఈటల అసంతృప్తి పార్టీ శ్రేణుల్లో పెద్ద చిచ్చు రేపింది.
దీనికి ప్రతిస్పందనగా బండి సంజయ్ “ హిందూ సనాతన ధర్మ రక్షణ కోసం పనిచేయకపోతే నేను ఉండడానికి అర్థమే లేదు ” అని వ్యాఖ్యానించారు. ఈటల - బండి సంజయ్ మధ్య ఉన్న భేదాభిప్రాయాలు ఇంతకుముందు కూడా వెలువడినా ... ఇప్పుడు అవి బహిరంగ ఘర్షణలుగా మారడం పార్టీకి పెద్ద నష్టమని నేతలే అంగీకరిస్తున్నారు.
మరోవైపు, జూబ్లీహిల్స్ ఓటమి మొత్తం బాధ్యతను కిషన్ రెడ్డి భుజాన వేసుకుంటున్నారు. ఎందుకంటే అభ్యర్థి ఎంపిక నుంచి ప్రచారం వరకు అన్నిటిలోనూ ఆయనే ముందుండి నిర్ణయాలు తీసుకున్నారు. అయితే రాష్ట్ర నాయకత్వం, ఎంపీలు, ఎమ్మెల్యేలు ప్రచారంలో ఎక్కువగా పాల్గొనకపోవడం పార్టీ సమన్వయం పూర్తిగా కూలిపోయిందని సూచిస్తోంది. ఇదే కారణంగా అర్బన్ ఓటర్లను ఆకట్టుకోవడంలో బీజేపీ విఫలమైంది.
రాజకీయ విశ్లేషకుల భావన ప్రకారం, బీజేపీ ఇలాగే అంతర్గత కలహాల్లో ఇరుక్కుంటే తెలంగాణ రాజకీయాల్లో ప్రత్యామ్నాయ శక్తిగా ఎదగడం చాలా కష్టం. కాంగ్రెస్ ప్రభుత్వానికి పెద్దగా ప్రతిపక్ష ఒత్తిడి లేకుండా పోవచ్చు. ఇప్పటికే బీజేపీ ఎమ్మెల్యేలు ఎవరి దారిలో వారు నడుస్తుండటం, రాష్ట్ర అధ్యక్షుడిగా రామచంద్రరావు వచ్చినా మార్పు రాకపోవడం పార్టీ స్థితిగతులను మరింత దిగజార్చుతోంది. పార్టీ కార్యకర్తలు కూడా గందరగోళంలో ఉన్నారు. ఐక్యత లేకుండా, సాధారణ ఉప ఎన్నికలో కూడా పోటీ చేయలేని పరిస్థితి వస్తే వచ్చే అసెంబ్లీ ఎన్నికలకు ఎలా సిద్ధమవుతారని ప్రశ్నలు లేవుతున్నాయి. మొత్తానికి, జూబ్లీహిల్స్ ఓటమి బీజేపీలో మరో చిచ్చునే కాకుండా, భవిష్యత్తు రాజకీయాల్లో పెద్ద సమస్యల ఆరంభమని చెప్పాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి