సూపర్ స్టార్ మహేష్ బాబు, దర్శకధీరుడు రాజమౌళి కలయికలో వస్తున్న సినిమాపై అంచనాలు ఏ స్థాయిలో ఉన్నాయో ప్రత్యేకంగా చెప్పనక్కర్లేదు. వీరిద్దరి కాంబినేషన్ లో 'వారణాసి' అనే టైటిల్ తో ఈ ప్రతిష్టాత్మక చిత్రం తెరకెక్కుతున్న సంగతి తెలిసిందే. పాన్ వరల్డ్ స్థాయిలో రూపొందుతున్న ఈ ప్రాజెక్ట్ గురించి ఏ చిన్న వార్త వచ్చినా అది సోషల్ మీడియాలో సంచలనంగా మారుతోంది. అయితే తాజాగా ఈ సినిమా నుంచి ఎవరూ ఊహించని విధంగా ఒక పాట విడుదలై నెట్టింట ప్రకంపనలు సృష్టిస్తోంది.
'రణ కుంభ' పేరుతో విడుదలైన ఈ సాంగ్ ప్రస్తుతం శ్రోతలను విశేషంగా ఆకట్టుకుంటోంది. "ప్రళయం ప్రళయం" అంటూ సాగే లిరిక్స్ తో మొదలైన ఈ పాట, సినిమా థీమ్ ను ఎలివేట్ చేసేలా గూస్ బంప్స్ తెప్పిస్తోంది. సంగీత దిగ్గజం ఎం.ఎం. కీరవాణి తన సొంత యూట్యూబ్ ఛానల్ ద్వారా ఈ పాటను విడుదల చేశారు. రాజమౌళి సినిమాల్లో ఉండే గ్రాండియర్, ఎమోషన్ ఈ పాటలో స్పష్టంగా వినిపిస్తోందని ప్రేక్షకుల నుంచి మంచి రెస్పాన్స్ వస్తోంది.
అయితే ఈ పాట విడుదల చుట్టూ ఇప్పుడు ఆసక్తికరమైన చర్చ నడుస్తోంది. ఈ సినిమా 2027 సంవత్సరంలో ప్రేక్షకుల ముందుకు రానుందని సమాచారం. సినిమా విడుదలకు ఇంకా చాలా సమయం ఉండగానే, జక్కన్న ఇప్పటి నుంచే ప్రమోషన్స్ మొదలుపెట్టడం సినీ వర్గాల్లో హాట్ టాపిక్ అవుతోంది. సాధారణంగా రాజమౌళి తన సినిమాల అప్డేట్స్ విషయంలో చాలా జాగ్రత్తగా ఉంటారు, కానీ మూడేళ్ల ముందే లిరికల్ వీడియోను వదలడం వెనుక ఉన్న వ్యూహం ఏంటని అందరూ చర్చించుకుంటున్నారు.
మరో ఆశ్చర్యకరమైన విషయం ఏమిటంటే, ఈ పాట విడుదలైన విషయం చాలా మంది మహేష్ బాబు అభిమానులకు కూడా తెలియకపోవడం. ఎలాంటి ముందస్తు హడావిడి లేకుండా, సైలెంట్ గా కీరవాణి ఛానల్ లో పాటను విడుదల చేయడంతో ఫ్యాన్స్ ఆశ్చర్యపోతున్నారు. ప్రస్తుతం ఈ వార్త మెల్లగా అభిమానుల్లోకి వెళ్తుండటంతో, రానున్న రోజుల్లో ఈ సాంగ్ సోషల్ మీడియాలో మరిన్ని రికార్డులు సృష్టించడం ఖాయంగా కనిపిస్తోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి