'പിണറായിയെ ചവിട്ടി വീഴ്‌ത്തിയെന്ന് ഞാൻ പറഞ്ഞിട്ടില്ല': മറുപടി പറഞ്ഞ് സുധാകരൻ! തൻ്റെ മക്കളെ തട്ടിക്കൊണ്ട് പോകാൻ സുധാകരൻ പദ്ധതിയിട്ടിരുന്നുവെന്നും ഒരു കോൺഗ്രസ് നേതാവ് ഇക്കാര്യമറിയിച്ച് മുന്നറിയിപ്പ് നൽകിയെന്നും മുഖ്യമന്ത്രി പറഞ്ഞതോടെയാണ് ഇരുവരും തമ്മിലുള്ള തർക്കം രൂക്ഷമായത്. വെള്ളിയാഴ്‌ച നടന്ന വാർത്താ സമ്മേളനത്തിൽ മുഖ്യമന്ത്രി നടത്തിയ ആരോപണങ്ങൾക്ക് മറുപടി നൽകുകയാണ് സുധാകരൻ. മുഖ്യമന്ത്രി പിണറായി വിജയനും കെപിസിസി പ്രസിഡൻ്റ് കെ സുധാകരനും തമ്മിലുള്ള വാക്‌പോര് രൂക്ഷം. കാമ്പസ് പഠനകാലത്ത് ബ്രണ്ണൻ കോളേജിൽ വെച്ച് പിണറായി വിജയനെ മർദ്ദിച്ചെന്ന സുധാകരൻ്റെ ആരോപണം മുഖ്യമന്ത്രി ഏറ്റെടുത്തതോടെയാണ് പുതിയ സാഹചര്യമുണ്ടായത്. കെപിസിസിസി പ്രസിഡൻ്റ് സ്ഥാനത്തേക്ക് സുധാകരൻ എത്തിയതോടെ രാഷ്ട്രീയ കേരളം പ്രതീക്ഷിച്ച സാഹചര്യത്തിലേക്ക് കാര്യങ്ങൾ നീങ്ങുകയാണെന്നാണ് നിലവിലെ ആരോപണങ്ങൾ തെളിയിക്കുന്നത്.
സുധാകരൻ്റെ 'കെണിയിൽ' മുഖ്യമന്ത്രി വീണെന്ന് ഒരു വിഭാഗം ആരോപിക്കുമ്പോൾ മുതിർന്ന കോൺഗ്രസ് നേതാക്കളുടെ നിലപാട് ആയുധമാക്കി സുധാകരനെ തുറന്ന് കാട്ടാനാണ് സിപിഎം നീക്കം. മുഖ്യമന്ത്രിയുടെ പ്രതികരണം ഇതിനുള്ള തെളിവാണ്. സമൂഹമാധ്യമങ്ങളിലൂടെ നീക്കം ശക്തമാക്കുകയെന്ന ലക്ഷ്യവും പാർട്ടിക്കുണ്ട്. പ്രതിപക്ഷ നേതാവായി വി ഡി സതീശൻ എത്തിയെങ്കിലും സർക്കാരിനെയോ മുഖ്യമന്ത്രിയെയോ വെല്ലുവിളിക്കാൻ തയ്യാറായിരുന്നില്ല. എന്നാൽ സുധാകരൻ കെപിസിസിസി പ്രസിഡൻ്റ് സ്ഥാനത്തേക്ക് എത്തിയതോടെ പുതിയ സാഹചര്യത്തിലേക്ക് കാര്യങ്ങൾ നീങ്ങുകയാണ്. എന്നാൽ മരം മുറി വിവാദത്തിൽ നിന്ന് ജനശ്രദ്ധയകറ്റാനുള്ള ശ്രമമാണ് മുഖ്യമന്ത്രി നീക്കം നടത്തുന്നതെന്ന ആരോപണവുമുണ്ട്.
കുട്ടികളെ തട്ടിക്കൊണ്ട് പോകാൻ ശ്രമിച്ചെന്ന മുഖ്യമന്ത്രി പിണറായി വിജയൻ്റെ ആരോപണം കളവാണെന്ന് സുധാകരൻ വാർത്താസമ്മേളനത്തിൽ വ്യക്തമാക്കി. ഇങ്ങനെ ഒരു സംഭവം ഉണ്ടായാൽ പോലീസിനെയാണ് ആദ്യം അറിയിക്കേണ്ടത്. കുട്ടികളെ തട്ടിക്കൊണ്ട് പോകാൻ ശ്രമം നടക്കുന്നുണ്ടെന്ന് അറിയിച്ച കോൺഗ്രസ് നേതാവിൻ്റെ പേരുവിവരങ്ങൾ അദ്ദേഹം പുറത്തുവിടണം. അവ്യക്തമായ ആരോപണങ്ങൾ മുഖ്യമന്ത്രിക്ക് ചേരുന്നതല്ല. മുഖ്യമന്ത്രിക്ക് പൊളിറ്റിക്കൽ ക്രിമിനലിൻ്റെ ഭാഷയാണ്. പിണറായി വിജയൻ്റെ നിലവാരത്തിലേക്ക് താഴാൻ എനിക്കാകില്ല. കോളേജ് പഠനകാലത്ത് പിണറായി വിജയനെ ചവിട്ടി വീഴ്‌ത്തിയെന്ന വാർത്തകൾ തള്ളി സുധാകരൻ. "പിണറായി വിജയനെ ചവിട്ടി വീഴ്‌ത്തിയെന്ന് ഞാൻ പറഞ്ഞിട്ടില്ല. ലേഖനത്തിൽ വന്നത് ഓഫ് റെക്കോർഡായി പറഞ്ഞ കാര്യങ്ങളാണ്. നട്ടെല്ല് ഉണ്ടെങ്കിൽ ആരോപണം തെളിയിക്കാൻ അന്വേഷണം നടത്തണം.
പിആർ ഏജൻസിയുടെ മൂടുപടത്തിൽനിന്നു പുറത്തുവന്ന പിണറായി വിജയനാണ് ഇന്നലെ ജനങ്ങൾക്കു മുന്നിലെത്തിയത്" - എന്നും അദ്ദേഹം പറഞ്ഞു. അതേസമയം തനിക്ക് ഗുണ്ടാ ഗ്രൂപ്പുകളുമായി ബന്ധമുണ്ടെങ്കിൽ മുഖ്യമന്ത്രി തെളിയിക്കണമെന്ന് സുധാകരൻ വെല്ലുവിളിക്കുകയും ചെയ്തു. തന്നെ സംഘപരിവാറാക്കാനും ഗുണ്ടാ ഗ്രൂപ്പുകളുമായി ബന്ധമുള്ളയാൾ ആക്കാനുമുള്ള ശ്രമമാണ് നടക്കുന്നത്. ഒന്നും കാട്ടി തന്നെ വിരട്ടാൻ ശ്രമിക്കേണ്ട. തനിക്കെതിരായ ആരോപണം തെളിയിച്ചാൽ രാഷ്ട്രീയ പ്രവർത്തനം അവസാനിപ്പിക്കാൻ തയ്യാറാണ്. തോക്ക് കൈവശം സൂക്ഷിക്കുന്ന പിണറായി വിജയനാണോ ഇതുവരെ തോക്ക് ഇല്ലാത്ത ഞാൻ ആണോ മാഫിയ എന്ന് ജനം പറയട്ടെ. മുഖ്യമന്ത്രിയുടെ ഓഫീസാണ് കള്ളക്കടത്ത് നടത്തിയത്.
വിദേശ കറൻസി നോട്ട് ഇടപാട് എനിക്കില്ല. മണൽ മാഫിയ ബന്ധം എനിക്ക് ഉണ്ടെങ്കിൽ അന്വേഷിക്കട്ടെ എന്നും കെപിസിസി പ്രസിഡൻ്റ് വ്യക്തമാക്കി. മുഖ്യമന്ത്രി പിണറായി വിജയൻ നടത്തിയത് സംസ്‌കാരഹീനമായ പ്രതികരണമാണെന്ന് സുധാകരൻ പറഞ്ഞു. പിണറായി വിജയന് എന്നെ നേരത്തെ തന്നെ അറിയാം. അർഹതപ്പെട്ട സ്ഥാനത്ത് ഇരിക്കുമ്പോൾ അന്തസോടെ പ്രതികരിക്കണം. കള്ളവാർത്ത പ്രചരിപ്പിക്കാൻ അപാര തൊലിക്കട്ടി വേണം. ചീഞ്ഞളിഞ്ഞ മനസ് ഒരു മുഖ്യമന്ത്രിക്ക് ഭൂഷണമല്ല. ശുദ്ധമായ മനസാവണം ഒരു മുഖ്യമന്ത്രിക്ക് ഉണ്ടാകേണ്ടതെന്നും അദ്ദേഹം ആരോപിച്ചു.
Find out more:
click and follow Indiaherald WhatsApp channel