చైనా సరిహద్దుల విషయంలో ఆధారాలు లేకుండా మాట్లాడవద్దని, ప్రతిపక్ష నేతగా బాధ్యతాయుతంగా మెలగాలని దేశ అత్యున్నత న్యాయస్థానం రాహుల్ గాంధీకి హితవు పలికిన సంగతి తెలిసిందే. ఇది కాంగ్రెస్ పార్టీకి, ముఖ్యంగా రాహుల్ నాయకత్వానికి పెద్ద మచ్చగా మిగిలింది. ఈ దెబ్బ నుంచి సోదరుడి పరువును కాపాడే బాధ్యతను ప్రియాంక తన భుజాలపై వేసుకున్నట్టు కనిపిస్తోంది. అయితే, ఆ క్రమంలో ఆమె ఏకంగా న్యాయవ్యవస్థకే పాఠాలు చెప్పే ప్రయత్నం చేయడం గమనార్హం.
ప్రభుత్వాన్ని ప్రశ్నించడం ప్రతిపక్షాల హక్కు అని, ఆ విషయాన్ని తాము గుర్తు చేయాల్సిన అవసరం ఏర్పడిందని ప్రియాంక వ్యాఖ్యానించారు. అంతటితో ఆగకుండా, ఎవరు నిజమైన భారతీయుడో నిర్ణయించేది న్యాయమూర్తులు కాదంటూ చేసిన వ్యాఖ్యలు నేరుగా సుప్రీంకోర్టుకే హెచ్చరికలు పంపేలా ఉన్నాయి. ప్రతిపక్ష నేతకు దక్కాల్సిన గౌరవం ఇవ్వాలంటూ ఆమె చేసిన సూచన, న్యాయస్థానాలు తమ పరిధిలో ఉండాలన్న పరోక్ష సంకేతమేనని పలువురు భావిస్తున్నారు.
ప్రియాంక తీరును చూస్తుంటే, ఆమె తన నాయనమ్మ, మాజీ ప్రధాని ఇందిరా గాంధీని గుర్తుకు తెస్తున్నారన్న చర్చ మొదలైంది. ఒకప్పుడు ఇందిరా గాంధీ సైతం న్యాయవ్యవస్థపై ఆధిపత్యం చెలాయించారని, న్యాయమూర్తుల నియామకాల్లో జోక్యం చేసుకుని, రాజ్యాంగాన్ని సైతం తనకు అనుకూలంగా మార్చుకున్నారని చరిత్ర చెబుతోంది. అత్యవసర పరిస్థితి (ఎమర్జెన్సీ) విధించి, పౌర హక్కులను కాలరాసిన ఆ చీకటి రోజులను దేశం ఇంకా మర్చిపోలేదు.
ఇప్పుడు ప్రియాంక కూడా అదే తరహాలో న్యాయవ్యవస్థ స్వతంత్రతను ప్రశ్నించడం, తమకు నచ్చని తీర్పులు వస్తే న్యాయమూర్తులనే తప్పుబట్టే ధోరణిని ప్రదర్శించడం ఆందోళన కలిగిస్తోంది. భవిష్యత్తులో అధికారం చేతికి వస్తే, గాంధీ కుటుంబం మళ్లీ పాత రోజులను తిరిగితీసుకువచ్చి, రాజ్యాంగ వ్యవస్థలను తమ గుప్పిట్లో పెట్టుకునే ప్రమాదం ఉందన్న వాదనలకు ప్రియాంక తాజా వ్యాఖ్యలు బలం చేకూరుస్తున్నాయి. ఇది కేవలం సోదరుడిపై ప్రేమతో చేసిన వ్యాఖ్యలా లేక గాంధీ కుటుంబం నరనరాల్లో జీర్ణించుకుపోయిన ఓ నిరంకుశ ధోరణికి నిదర్శనమా అనేది కాలమే నిర్ణయించాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి