సూర్యాపేట నుంచి అమరావతి వరకు దాదాపు 150 కిలోమీటర్ల దూరాన్ని ఏపీ ప్రభుత్వం చూసుకోవాల్సి ఉంటుంది. హైదరాబాద్ ఫ్యూచర్ సిటీ నుంచి సూర్యాపేట వరకు మాత్రం కేవలం 90 కిలోమీటర్లదే. ఈ నేపథ్యంలో ఆంధ్రప్రదేశ్ ప్రభుత్వం తనపై పడే ఆర్థిక భారాన్ని తగ్గించుకునే ప్రయత్నంలో ఉంది. ఫ్యూచర్ సిటీని అనుసంధానించడం వల్ల తెలంగాణకు కూడా మేలే జరుగుతుందని వాదిస్తూ, భూసేకరణతో పాటు ఖర్చులో గణనీయమైన భాగాన్ని తెలంగాణ భరించాలని ఏపీ ప్రతిపాదిస్తోంది. అంతేకాకుండా, తాము గరిష్ఠంగా 10% మేర ఖర్చు భరించగలమని సంకేతాలు ఇస్తోంది. అయితే దీనికి తెలంగాణ ప్రభుత్వం పెద్దగా ఆసక్తి చూపడం లేదని తెలుస్తోంది. మీ రాష్ట్రంలో రహదారి ఎక్కువ భాగం ఉన్నందున ఆ బాధ్యత మీరే తీసుకోవాలన్నది తెలంగాణ వైఖరిగా కనిపిస్తోంది.
ఈ వివాదం బనకచర్ల ప్రాజెక్టు తరహాలోనే సవాళ్లను తెచ్చిపెట్టే అవకాశం ఉంది. ఇప్పటికే ఆ ప్రాజెక్టుపై కేంద్రం, తెలంగాణ మధ్య ఉన్న సమస్యలతో ఏపీ ఆందోళనలో ఉంది. ఇలాంటి సమయంలో ఈ హైవే నిర్మాణానికి సంబంధించిన భూసేకరణ, నిధుల పంపకం అంశాలు రెండు రాష్ట్రాల మధ్య తగాదాలకు దారి తీసే అవకాశం ఉంది. అయితే మరోవైపు, రెండు రాష్ట్రాలు కూడా ఈ ప్రాజెక్టును ప్రతిష్ఠాత్మకంగా తీసుకున్నాయి. ఫ్యూచర్ సిటీ అభివృద్ధికి, అమరావతి రాజధాని కనెక్టివిటీకి ఈ రహదారి కీలకం కావడంతో చివరికి ఇరువురు ముఖ్యమంత్రులు రాజీ మార్గాన్ని అన్వేషించే అవకాశం ఉందని రాజకీయ విశ్లేషకులు భావిస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి