పెద్దలు జీవితంలో విజయం సాధించాలంటే ఏకాగ్రత చాలా ముఖ్యమని చెబుతూ ఉంటారు. చాలా మందికి కొన్ని పనులపై సులభంగానే ఏకాగ్రత కుదురుతుంది. కొన్ని విషయాల్లో మాత్రం ఏకాగ్రత అస్సలు కుదరదు. మనలో చాలామంది సినిమాలు చూసే సమయంలో, గేమ్స్ ఆడే సమయంలో పూర్తి ఏకాగ్రతతో ఉంటారు. కానీ పుస్తకాలు పట్టుకుంటే చాలు చిరాకు పడుతూ ఉంటారు.
మనం ఏ పనినైనా ప్రతిరోజూ అనుకున్న సమయానికి పూర్తి చేస్తే మనకు ఆ పనిపై ఏకాగ్రత ఉన్నట్టేనని చెప్పవచ్చు. అలా ప్రతిరోజూ ఏకాగ్రతతో పోటీ పరీక్షలకు సిద్ధమైతే చదివింది అర్థం కావడంతో పాటు జ్ఞాపకశక్తి పెరుగుతుంది. కాబట్టి ఏ పని చేస్తున్నా ఆ పనిని ఎంత ఏకాగ్రతతో చేస్తున్నామో గుర్తుంచుకోవాలి. ప్రస్తుతం మీరు ఎక్కడ ఉన్నా... ఏ పని చేస్తున్నా ఎంత ఏకాగ్రతతో చేస్తున్నామో గుర్తుంచుకోవాలి.
ఈరోజుల్లో ఏ పనిలోనైనా విజయం సాధించాలంటే ఏకాగ్రత చాలా అవసరం. మనం ఏకాగ్రతను అలవరచుకోవడం వల్ల లేనిపోని ఆలోచనలు రావడం చాలావరకు తగ్గిపోతాయి. కొన్ని చిట్కాలు పాటించడం ద్వారా ఏకాగ్రతను పెంచుకోవచ్చు. ఏకాగ్రత లేకపోతే బద్ధకస్తులుగా మారే అవకాశం ఉంటుంది. ఏకాగ్రత సాధించాలంటే మొదట ప్రాధాన్యత లేని విషయాలను మన పరిసరాల నుంచి దూరం చేయాలి.
రోజులో అనివార్యమైన, ముఖ్యమైన పనులకు ప్రథమ ప్రాధాన్యత ఇవ్వాలి. పనులను విజయవంతంగా పూర్తి చేసి నలుగురి ప్రశంసలు పొందేందుకు ప్రయత్నించాలి. శ్రద్ధతో పనులను చేయడం మొదలుపెడితే తక్కువ సమయంలో అత్యుత్తమ ఫలితాలు సొంతమవుతాయి. మీ పనులను మీరు వేగంగా, సులభంగా చేయగలుగుతున్నారంటే మీలో ఏకాగ్రత పెరుగుతుందని అర్థం చేసుకోవాలి.
