నారింజ పండును తినడం ఆరోగ్యానికి ఎంతో మేలు చేస్తుందనే విషయం మనందరికీ తెలిసిందే. విటమిన్ 'సి' తో పాటు అనేక పోషకాలు ఇందులో మెండుగా ఉంటాయి. అయితే, చాలా మంది నారింజ గుజ్జు తిని, దాని తొక్కను మాత్రం పడేస్తారు. కానీ, ఈ తొక్క కూడా మనకు ఎన్నో అద్భుతమైన ప్రయోజనాలను కలిగిస్తుందని మీకు తెలుసా? ఈ విషయాలు తెలిస్తే మీరు ఇకపై ఆరెంజ్ తొక్కను అస్సలు వృధా చేయరు.
నారింజ తొక్కలో ఫైబర్ (పీచుపదార్థం), విటమిన్ సి, యాంటీ ఆక్సిడెంట్లు, యాంటీ బ్యాక్టీరియల్ లక్షణాలు పుష్కలంగా ఉంటాయి. ఈ పోషకాలు మన ఆరోగ్యాన్ని మెరుగుపరచడంలో కీలక పాత్ర పోషిస్తాయి. నారింజ తొక్కలో ఉండే అధిక ఫైబర్ జీర్ణవ్యవస్థకు చాలా మంచిది. ఇది జీర్ణక్రియను మెరుగుపరచి, మలబద్ధకం వంటి సమస్యల నుంచి ఉపశమనం కలిగిస్తుంది.
విటమిన్ సి, యాంటీ ఆక్సిడెంట్లు పుష్కలంగా ఉండటం వలన ఇది రోగనిరోధక శక్తిని బలోపేతం చేస్తుంది. తద్వారా అంటువ్యాధులు, జలుబు, దగ్గు వంటి శ్వాసకోశ సమస్యల నుండి ఉపశమనం లభిస్తుంది. కొందరు ఆస్తమా, బ్రాంకైటిస్ చికిత్సలోనూ దీనిని ఉపయోగిస్తారు. ఈ తొక్కల్లోని ఫైబర్, రక్తంలో చక్కెర కలిసే వేగాన్ని తగ్గిస్తుంది. ఇది రక్తంలో చక్కెర స్థాయిలను నియంత్రించడంలో సహాయపడుతుంది, కాబట్టి డయాబెటిస్ ఉన్నవారికి ఇది చాలా ప్రయోజనకరం.
నారింజ తొక్క చర్మ సంరక్షణకు ఒక అద్భుతమైన ఔషధంలా పనిచేస్తుంది. దీనిని ఎండబెట్టి పొడి చేసి, సున్నిపిండిలో కలుపుకుని వాడటం లేదా ఫేస్ ప్యాక్గా వేసుకోవడం వల్ల చర్మంపై ఉండే మృతకణాలు తొలగిపోయి, చర్మం మృదువుగా, కాంతివంతంగా మారుతుంది. ఇది మొటిమల మచ్చలు, నల్లటి మచ్చలను తగ్గించడంలో కూడా సహాయపడుతుంది. జిడ్డు చర్మం ఉన్నవారికి ఇది చాలా మంచిది. నారింజ తొక్కలను ఇంట్లో సహజమైన శుభ్రపరిచే ఏజెంట్గా (క్లీనింగ్ ఏజెంట్గా) కూడా ఉపయోగించవచ్చు. దీని సువాసన ఇంటిని తాజాగా ఉంచుతుంది. అలాగే, దీనిని మొక్కల మొదళ్లలో వేయడం ద్వారా క్రిమి కీటకాలు దూరమవుతాయి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి