మొన్నటి ఎన్నికల్లోనే ఆయనకు టీడీపీ తొలి జాబితాలో పేరు లేకపోవడం పెద్ద షాక్. పార్టీ నేతలు చీపురుపల్లి సీటు సూచించినా, గంటా పట్టుబట్టి భీమిలీ సీటును కైవసం చేసుకున్నారు. అయితే గెలుపు తర్వాత కూడా ఆయన సంతోషంగా లేరని, “ఇక తన రాజకీయ ప్రయాణం ముగింపు దశలోనే ఉందేమో” అన్న భావనను తన అనుచరులతో పంచుకున్నారని సమాచారం. రాబోయే ఎన్నికల్లో కూడా టీడీపీ–జనసేన–బీజేపీ కూటమి కొనసాగుతుందని స్పష్టమైంది. కానీ ఆ కాంబినేషన్‌లో తనకు మళ్లీ మంత్రి పదవి దక్కదన్న అంచనాకు గంటా వచ్చారట. ఒకవైపు కాపు నాయకులు మంత్రివర్గంలో ఇప్పటికే ఉన్నారు, మరోవైపు తన వియ్యంకుడు నారాయణ మంత్రిగా ఉండటంతో తాను లైమ్‌లైట్‌కి రాకపోవడం ఆయనను వెనక్కి తగ్గించేలా చేసింది.
దాంతో ఇప్పుడు గంటా శ్రీనివాసరావు కొత్త వ్యూహానికి సిద్ధమయ్యారు. తన రాజకీయ వారసత్వాన్ని కుమారుడికి అప్పగించి, ఆయనను భీమిలీ నియోజకవర్గం నుంచి పోటీకి దింపాలని నిర్ణయించుకున్నారట. ఇప్పటికే తన అనుచరులకు, పార్టీ నేతలకు కూడా ఈ విషయంపై సంకేతాలు ఇచ్చినట్లు సమాచారం. ఇకపై గంటా శ్రీనివాసరావు వ్యాపారాలపైనే దృష్టి పెట్టి, సైలెంట్‌గా రాజకీయ జీవితం నుంచి నిష్క్రమించాలని భావిస్తున్నారని చెబుతున్నారు. మొత్తం మీద, విశాఖ రాజకీయాల్లో “గంటా యుగం ముగుస్తుందా?” అన్న ప్రశ్న ఇప్పుడు హాట్ టాపిక్. ఆయన కుమారుడు రాజకీయంగా రంగప్రవేశం చేస్తే, అది టీడీపీలో కొత్త సమీకరణాలకు దారి తీసే అవకాశం ఉందని రాజకీయ విశ్లేషకులు అంటున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి