సినిమా ఆరంభంలో సత్య ఎపిసోడ్ ద్వారా కథను మొదలుపెట్టిన విధానం ప్రేక్షకుల్లో ఆసక్తిని రేకెత్తించింది. ఆ పాత భవనంలో ఏదో నిగూఢ రహస్యం ఉందనే భావన కలిగించడంలో దర్శకుడు విజయం సాధించారు. అయితే ఆ ఆసక్తి మొదటి సన్నివేశం వరకే పరిమితమైంది. రాజా సాబ్ ఎంట్రీ, ఫైట్లు, పాటలు వంటి అంశాలు ఎంతో రొటీన్గా అనిపిస్తాయి. ఎక్కడా కథలో వేగం పెరగకుండా కేవలం సీన్లను నింపుకుంటూ వెళ్లినట్లు అనిపిస్తుంది. ఈ చిత్రంలో ఏకంగా ముగ్గురు హీరోయిన్లను ఎందుకు పెట్టారో ఎవరికీ అర్థం కాలేదు. ప్రభాస్ ను పాత రోజుల్లో లాగా స్టైలిష్ గా చూపించడానికి ముగ్గురు భామలు అవసరమా అనే ప్రశ్న తలెత్తుతోంది. ఈ పాత్రల వల్ల కథలో సాగతీత పెరిగింది తప్ప ఆయా పాత్రలకు సరైన ముగింపు లేదు. వారి మధ్య వచ్చే రొమాంటిక్ సన్నివేశాల్లో వినోదం కూడా పండలేదు. ముఖ్యంగా ప్రభాస్ చెప్పే కొన్ని డైలాగులు స్పష్టంగా లేకపోవడం అభిమానులను అసంతృప్తికి గురిచేసింది.
మొదటి భాగం చివర్లో వచ్చే ఇంటర్వెల్ బ్యాంగ్ కొంత మెరుగ్గా అనిపించినా, దాన్ని ఇంకాస్త ప్రభావవంతంగా తీర్చిదిద్దే అవకాశం ఉంది. విరామం తర్వాత వచ్చే సన్నివేశాలు మళ్ళీ పాత ధోరణిలోనే సాగాయి. మారుతి సినిమాల్లో సాధారణంగా ఉండే హాస్యం ఈ చిత్రంలో పూర్తిగా లోపించింది. ప్రభాస్ కామెడీ చేసి చాలా కాలం కావడంతో ఈ సినిమాపై చాలా ఆశలు పెట్టుకున్న ప్రేక్షకులకు నిరాశే ఎదురైంది. హారర్ ఎలిమెంట్స్ కూడా భయపెట్టే విధంగా లేవు. సాధారణంగా హారర్ సినిమాలకు వెళ్లే వారు భయం కోసం చూస్తారు, కానీ ఆ అంశాన్ని దర్శకుడు సరిగ్గా వాడుకోలేకపోయారు. ఆ మహల్ లో నివసించే పాత్రలకు సంజయ్ దత్ నుండి ఎదురయ్యే ముప్పు ఏమిటో స్పష్టంగా వివరించలేదు. భయంకరమైన ఇంట్లో ఉంటూ కూడా పాత్రలు ఎంతో ప్రశాంతంగా రొమాన్స్ చేసుకోవడం విడ్డూరంగా అనిపిస్తుంది. పాత్రలే అంత తీరిగ్గా ఉన్నప్పుడు ప్రేక్షకులకు టెన్షన్ ఎందుకు కలుగుతుందనేది ఇక్కడ ప్రధాన సమస్య.
టెక్నికల్ పరంగా చూస్తే థమన్ అందించిన సంగీతం కొన్ని చోట్ల బాగున్నా, కథలో ల్యాగ్ ఉండటం వల్ల అది పెద్దగా సహాయపడలేదు. విజువల్ ఎఫెక్ట్స్ పర్వాలేదనిపించినా, స్క్రీన్ ప్లే లో ఉన్న లోపాల వల్ల సినిమా గందరగోళంగా తయారైంది. ప్రభాస్ తనవంతుగా వింటేజ్ లుక్ తో ఆకట్టుకోవాలని ప్రయత్నించారు కానీ బలహీనమైన దర్శకత్వం ఆయన శ్రమను వృథా చేసింది. ఈ సినిమా సెకండాఫ్ లో వచ్చే కొన్ని లాజిక్ లేని సీన్లు ప్రేక్షకులను విసిగించాయి. హారర్ కామెడీ అని ప్రచారం చేసినా.. అటు భయం గానీ ఇటు నవ్వు ఏదీ రాదు. కేవలం ప్రభాస్ ఇమేజ్ కారణంగా ఓపెనింగ్స్ భారీగా వచ్చినా, సినిమా కంటెంట్ పరంగా మాత్రం మారుతి మార్కు మిస్ అయ్యింది. ఈ భారీ బడ్జెట్ చిత్రం బాక్సాఫీస్ వద్ద నిలబడాలంటే కేవలం అభిమానుల మద్దతు మాత్రమే సరిపోదు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి