ఇప్పుడు ఆర్టీసీ పీకల్లోతు కష్టాల్లో కూరుకుపోయి ఉంది. ఆర్థిక ఇబ్బందులు అన్నీ ఇన్నీ కాదు. ఓ వైపు డీజిల్ ధరలు రోజు రోజుకు పెరుగుతుండటం.... దీనికి తగినట్లుగా టికెట్ ధరలు పెరగ లేదు. ఇక టోల్ గేట్ ధరలు, వాహనాల రిజిస్ట్రేషన్, నిర్వహణ ఖర్చులు కూడా భారీగా పెరిగిపోయాయి. వీటికి తోడు గతేడాది మార్చి నెల నుంచి అన్ని డిపోల్లో కూడా ఆర్టీసీ క్యాంటిన్లకు కేటాయించిన స్థలాలు దాదాపు ఖాళీగానే ఉంటున్నాయి. వీటి ద్వారా ప్రత్యేక ఆదాయం రావడం లేదు. ఈ పరిస్థితుల్లో కొత్త బస్సులు కాదు కదా... కనీసం బస్సులకు టైర్లు కూడా కొనలేని దుస్థితి ఆర్టీసీ సంస్థది. రహదారులు పూర్తిగా గోతుల మయం అవడంతో... దాదాపు అన్ని బస్సులు కూడా డొక్కు డొక్కు అవుతున్నాయి. టైర్లు అరిగిపోతున్నాయి. ఒక్క బస్సుకు స్టెప్నీతో కలిపి ఏడు టైర్లు ఆర్డర్ ఇవ్వాల్సి ఉంది. కానీ నిధుల కొరత కారణంగా ప్రస్తుతం ఒక్క టైరు కూడా కొనలేని పరిస్థితి. ఒక్క బాపట్ల బస్ డిపోలోనే టైర్లు లేక దాదాపు పది బస్సులు నిలిచిపోయాయంటే... పరిస్థితి ఎంత దారుణంగా ఉందో అర్థం చేసుకోవచ్చు.
