తెలుగు సినీ పరిశ్రమ హైదరాబాద్ లోనే ఉందని, ఏపీలో లేదని, కానీ సినీ పరిశ్రమకు వస్తున్న ఆదాయంలో 70శాతం ఏపీ నుంచే వస్తోందని ట్వీట్ చేశారు ఎంపీ భరత్ రామ్. లైట్ బాయ్ నుంచి స్టార్ హీరో వరకు ప్రతి ఒక్కరూ ఏపీనుంచి సంపాదిస్తున్నారని అన్నారు. ఏపీనుంచి ఆదాయం వస్తుంది కాబట్టి.. ఏపీలో ఇండస్ట్రీ పెట్టాలని ఆయన వారిని ఆహ్వానించారు. వాస్తవానికి ఏపీలో తెలుగు సినీ ఇండస్ట్రీని పెట్టాలనే వాదన, డిమాండ్ చాలా కాలంగా వినిపిస్తోంది. దీనికి గత ప్రభుత్వం, ఈ ప్రభుత్వం కూడా సానుకూలంగానే ఉన్నాయి. అయితే హైదరాబాద్ లో స్టూడియోలకు అలవాటు పడి, అక్కడి వాతావరణాన్ని ఇష్టపడిన ఇండస్ట్రీ వ్యక్తులు ఏపీకి రాలేకపోతున్నారు. దీంతో ఆ వ్యవహారం అక్కడితో ఆగిపోయింది. షూటింగ్ లకోసం వస్తుంటారు కానీ, సినీ ఇండస్ట్రీ మొత్తం, లేదా కొంత భాగం ఏపీకి రావడం ఇప్పుడల్లా సాధ్యమయ్యే పని కాదు.
కానీ ఎంపీ భరత్ రామ్ చేసిన కామెంట్ లో ఇండస్ట్రీ ఇక్కడికి రావాలంటూనే.. వారి సంపాదన ఇక్కడినుంచే వస్తుంది కదా అనే పాయింట్ టచ్ చేశారు. దీంతో నెటిజన్లు ఆయన్ని ఓ ఆటాడేసుకుంటున్నారు. వైసీపీకి చెందిన సాక్షి పేపర్ ఆఫీస్ ఎక్కడుందని, అది హైదరాబాద్ లోనే ఉంది కదా అని ప్రశ్నిస్తున్నారు. మరి ఆ పత్రిక మెయిన్ ఆఫీస్ కూడా ఏపీలో పెట్టొచ్చు కదా అంటున్నారు. మరికొందరేమో.. రాజమండ్రిలో వచ్చే కలెక్షన్ల గురించే ఎంపీ మాట్లాడితే బాగుంటుందని కామెంట్ చేశారు. విచిత్రం ఏంటంటే.. ఎంపీ తన ట్వీట్ లో మెన్షన్ చేసిన @goap అనే ట్విట్టర్ హ్యాండిల్ కి అసలు ఏపీ ప్రభుత్వానికే సంబంధం లేదు. బాధ్యతగల పదవిలో ఉన్న ఎంపీ తన అఫిషియల్ ట్విట్టర్ అకౌంట్ నుంచి వేసిన ట్వీట్ లో ప్రభుత్వానికి సంబంధం లేని ట్విట్టర్ హ్యాండిల్ పేరు ప్రస్తావించడాన్ని కూడా కొంతమంది తప్పుబడుతున్నారు. ప్రభుత్వం గురించి, ప్రభుత్వ వెబ్ సైట్లు, అధికారిక సోషల్ మీడియా అకౌంట్ల గురించి కాస్త తెలుసుకుని ఉండాలంటూ హితవు పలుకుతున్నారు. మొత్తమ్మీద టికెట్ల వ్యవహారంపై ట్వీట్ వేసి ట్రోలింగ్ ఎదుర్కొంటున్నారు యువ ఎంపీ భరత్ రామ్.
