ఇన్నాళ్లూ ఉన్న రూల్స్ ప్రకారం, పిల్లలకు కుల ధ్రువీకరణ పత్రం కావాలంటే తండ్రి కులమే లెక్క. ఒకవేళ భార్యాభర్తలు వేర్వేరు కులాల వారై, భర్త ఓసీ అయ్యుండి, భార్య ఓబీసీ అయితే, ఆ పిల్లలకు ఓబీసీ సర్టిఫికెట్ రావడం గగనమే. దీంతో ఎంతో మంది ఒంటరి తల్లులు, ముఖ్యంగా భర్త నుంచి విడిపోయి పిల్లల బాధ్యతలు మోస్తున్నవారు తీవ్ర ఇబ్బందులు పడుతున్నారు. తమ పిల్లలకు రిజర్వేషన్ ఫలాలు అందక, చదువుల్లో, ఉద్యోగాల్లో వెనుకబడిపోతున్నారని ఆవేదన చెందుతున్నారు.
ఈ అన్యాయానికి చరమగీతం పాడాలంటూ కొందరు సుప్రీం కోర్టు తలుపు తట్టారు. "అయ్యా, మాజీ భర్త దగ్గరికి వెళ్లి మా పిల్లల కులం కోసం చెయ్యి చాపాలా? ఇది ఎంతవరకు సమంజసం? తల్లి ఓబీసీ అయినప్పుడు, ఆమె పిల్లలకు ఆ హోదా ఎందుకు ఇవ్వరు?" అంటూ వాళ్లు వేసిన పిటిషన్లపై సర్వోన్నత న్యాయస్థానం సీరియస్‌గా స్పందించింది.
జస్టిస్ కే విశ్వనాథన్, జస్టిస్ ఎన్ కోటీశ్వర్ సింగ్‌లతో కూడిన ధర్మాసనం ఈ అంశం చాలా సున్నితమైనదని, కీలకమైనదని అభిప్రాయపడింది. విడాకులు తీసుకున్న మహిళ తన బిడ్డ ఓబీసీ క్యాస్ట్ వెరిఫికేషన్ కోసం మళ్లీ మాజీ భర్త వద్దకు వెళ్లాల్సిన దుస్థితి రాకూడదని ఘాటుగా వ్యాఖ్యానించింది.
ప్రస్తుతం ఉన్న నిబంధనల ప్రకారం, తండ్రి లేదా రక్త సంబంధీకులు ఓబీసీ అయితేనే పిల్లలకు ఆ సర్టిఫికెట్ ఇస్తున్నారు. దీన్ని సవాలు చేస్తూ, ఒంటరి తల్లి ఓబీసీ అయితే, ఆమె కుల ధ్రువీకరణ ఆధారంగానే పిల్లలకు ఓబీసీ సర్టిఫికెట్ జారీ చేయాలని పిటిషనర్లు కోరారు. దీనిపై కేంద్రానికి, ఢిల్లీ ప్రభుత్వానికి సుప్రీం కోర్టు ఇప్పటికే నోటీసులు జారీ చేసింది. గత ఫిబ్రవరిలోనే ఈ పిటిషన్లపై విచారణ కూడా మొదలైంది.
త్వరలోనే కొన్ని కీలక అంశాలను పరిష్కరించి, స్పష్టమైన మార్గదర్శకాలు జారీ చేస్తామని జస్టిస్ విశ్వనాథన్ ధర్మాసనం భరోసా ఇచ్చింది. ఈ తీర్పు గనుక పూర్తిగా అమల్లోకి వస్తే, ఒంటరి తల్లుల పిల్లల భవిష్యత్తుకు బంగారు బాటలు పడతాయనడంలో సందేహం లేదు. ఇకపై, తండ్రితో సంబంధం లేకపోయినా, తల్లి ఓబీసీ అయితే చాలు, పిల్లలకు ఆ రిజర్వేషన్ కోటా దక్కే అవకాశం ఉంది. ఇది నిజంగా ఒంటరి పోరాటం చేస్తున్న ఎందరో మహిళలకు, వారి పిల్లలకు ఓ పెద్ద ఊరట. అయితే, ఈ మార్పులు ఎంత వేగంగా, ఎంత సులభంగా అమలవుతాయో చూడాలి. ఏది ఏమైనా, సుప్రీం కోర్టు చూపిన చొరవ మాత్రం అభినందనీయం. వేలాది చిన్నారుల భవిష్యత్తుకు ఇది ఓ ఆశాకిరణం.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి