జనసేన కోటా:
జనసేనకు చెందిన మరో కీలక నేతను మంత్రివర్గంలోకి తీసుకుంటామని గతంలో సాక్షాత్తూ ముఖ్యమంత్రే ప్రకటించడంతో, విస్తరణ ఖాయమని అందరూ భావించారు. కొన్ని శాఖల మంత్రులపై కొద్దిపాటి విమర్శలు వచ్చిన నేపథ్యంలో, ప్రక్షాళన ద్వారా క్యాబినెట్ ఇమేజ్ను పెంచుకోవాలని చంద్రబాబు తొలుత యోచించారు. అయితే, ప్రభుత్వం ఏర్పడి తక్కువ కాలమే కావడం వల్ల ఇప్పుడే మార్పులు చేస్తే పార్టీలో అసమ్మతి పెరిగే అవకాశం ఉందని ఆయన భావించినట్లు తెలుస్తోంది. గత ఎన్నికల సమయంలో పార్టీ విజయం కోసం సీట్లు త్యాగం చేసిన వారు, కష్టకాలంలో పార్టీకి అండగా నిలిచిన సీనియర్లు మంత్రి పదవులపై భారీ ఆశలు పెట్టుకున్నారు.
రెండో ఏడాది వ్యూహం:
ప్రస్తుతం ప్రభుత్వం రెండో సంవత్సరంలోకి అడుగుపెడుతున్న తరుణంలో, కీలక నిర్ణయాలు తీసుకునే కంటే సంక్షేమ పథకాలను ప్రజల్లోకి తీసుకెళ్లడమే లక్ష్యంగా పెట్టుకున్నారు. సంచలన నిర్ణయాలు తీసుకునే కంటే, అందరినీ కలుపుకుపోవాలనే ఉద్దేశంతోనే చంద్రబాబు విస్తరణపై మౌనంగా ఉన్నారు. మంత్రి పదవుల విషయంలో జాప్యం జరుగుతున్నప్పటికీ, నామినేటెడ్ పదవుల భర్తీలో మాత్రం చంద్రబాబు దూకుడు ప్రదర్శిస్తున్నారు. ఇప్పటికే పలు కార్పొరేషన్లకు చైర్మన్లను నియమించిన ప్రభుత్వం, త్వరలోనే మరిన్ని పదవులను భర్తీ చేస్తామని ప్రకటించింది. మంత్రి పదవులు దక్కని అసంతృప్త నేతలను ఈ నామినేటెడ్ పదవుల ద్వారా బుజ్జగించే ప్రయత్నం చేస్తున్నారు.
ఫైనల్గా చూస్తే 2025లో మంత్రివర్గ విస్తరణ లేనట్లేనని స్పష్టమవుతోంది. వచ్చే ఏడాది మే లేదా జూన్ నాటికి ప్రభుత్వం రెండేళ్లు పూర్తి చేసుకునే సమయంలో భారీ స్థాయిలో క్యాబినెట్ ప్రక్షాళన ఉండే అవకాశం ఉందని సమాచారం. అప్పటివరకు ఆశావహులు తమ నియోజకవర్గాల్లో పట్టు పెంచుకుంటూ, చంద్రబాబు గుడ్ బుక్స్లో ఉండేందుకు ప్రయత్నించాల్సిందే. ప్రస్తుతానికి మంత్రులందరూ తమ పదవులను కాపాడుకున్నా.. పనితీరు ఆధారంగా వచ్చే ఏడాది ఎవరికి ఉద్వాసన తప్పుతుందోనన్న టెన్షన్ మాత్రం కొనసాగుతూనే ఉంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి