రవితేజ ఈ సినిమాలో లక్ష్మణ్ భేరి అనే రైల్వే పోలీస్ పాత్రలో కనిపించాడు. వరంగల్‌లో పనిచేస్తున్న సమయంలో ఒక మంత్రి కుమారుడిని కొట్టిన ఘటనతో, అతనికి అల్లూరి జిల్లాలోని అడవివరం అనే దూర ప్రాంతానికి ట్రాన్స్‌ఫర్ అవుతుంది. ఆ గ్రామం మొత్తాన్ని శివుడు (నవీన్ చంద్ర) అనే వ్యక్తి తన ఆధీనంలో ఉంచుకున్నాడు. రైతులను బెదిరించి గంజాయి పండించి, అక్రమంగా కోల్‌కతాకు రవాణా చేయడం అతని వ్యాపారం. ఈ పరిస్థితే అడవివరానికి వచ్చిన లక్ష్మణ్ భేరి ఎదుర్కొంటాడు. రైల్వే స్టేషన్ పరిధిలో మాత్రమే అధికారాలు ఉన్నప్పటికీ, తన ధైర్యం, తెలివి, నిబద్ధతతో శివుడి వ్యాపారాన్ని అడ్డుకోవడానికి ప్రయత్నిస్తాడు. జిల్లా ఎస్పీ సహా పలువురు అధికారులు శివుడికి మద్దతుగా ఉన్నా, లక్ష్మణ్ భేరి మాత్రం వెనుకడుగు వేయడు.
ఇక, ఈ యాక్షన్ డ్రామాతో పాటు హీరో ప్రేమకథ కూడా ఉంటుంది. అడవివరం గ్రామానికి చెందిన తులసి (శ్రీలీల)తో ఆయన మధ్య సాగే ప్రేమ ఎపిసోడ్‌లో కొన్ని ట్విస్టులు, కామెడీ టచ్ కూడా ఉన్నాయి. హీరో పెళ్లి కాకపోవడానికి కారణమైన తాతయ్య (రాజేంద్ర ప్రసాద్) పాత్ర సినిమా చివర్లో ఒక ఎమోషనల్ టర్న్ ఇస్తుంది. ఆయన చేసిన త్యాగం ప్రేక్షకుల మనసును తాకుతుంది.
‘మాస్ జాతర’ పక్కా కమర్షియల్ మాస్ ఫార్ములాతో తెరకెక్కిన సినిమా. దర్శకుడు భాను భోగవరపు, ప్రేక్షకులు ఒక మాస్ మూవీ నుండి కోరుకునే అన్ని ఎలిమెంట్లను జాగ్రత్తగా కలపడానికి ప్రయత్నించారు — హీరో ఇన్‌ట్రడక్షన్ సీన్, పంచ్ డైలాగులు, స్టైలిష్ ఫైట్లు, విలన్ గ్యాంగ్, హీరోయిన్‌తో రొమాంటిక్ సాంగ్స్, ఫ్యామిలీ ఎమోషన్, క్లైమాక్స్ ఫైట్ వంటి అన్ని అంశాలు ఉన్నాయి. సినిమా మొదటి భాగం సరదాగా, ఫాస్ట్ పేస్‌లో సాగుతుంది. కామెడీ మరియు యాక్షన్ సన్నివేశాలు ప్రేక్షకులను ఆకట్టుకుంటాయి. కానీ రెండో భాగంలో కథనం కొంచెం నెమ్మదిగా మారుతుంది. కొన్ని సన్నివేశాల్లో లాజికల్ కనెక్టివిటీ తగ్గినట్టు అనిపిస్తుంది.
రవితేజ ఎనర్జీ ఈ సినిమాలో కూడా ప్రధాన ఆకర్షణ. రైల్వే పోలీస్ లుక్‌లో ఆయన స్టైల్, డైలాగ్ డెలివరీ, బాడీ లాంగ్వేజ్ పూర్తిగా మాస్ వాతావరణాన్ని సృష్టిస్తాయి. అయితే కథలో లోతు లేకపోవడం వల్ల ఆయన నటన పూర్తిగా మెరవలేకపోయింది. అయినప్పటికీ, ఆయన ఎనర్జీ, నాటీ స్టెప్స్, పంచ్ డైలాగులు చూడటానికి అయినా థియేటర్ వెళ్లి చూడాలనే ఫీలింగ్ ఫ్యాన్స్‌లో స్పష్టంగా కనిపిస్తుంది. శ్రీలీల అందం, స్క్రీన్ ప్రెజెన్స్ సినిమాకు కలర్ జోడించింది. రాజేంద్ర ప్రసాద్ పాత్రలో ఎమోషనల్ టచ్ అందించగా, నవీన్ చంద్ర విలన్‌గా బలంగా నిలిచాడు. ‘మాస్ జాతర’ ఒక పక్కా మాస్ ఎంటర్‌టైనర్. కొత్తదనం పెద్దగా లేకపోయినా, రవితేజ ఎనర్జీ, భీమ్స్ బీట్‌లు, కొన్ని యాక్షన్ సన్నివేశాలు, కామెడీ మూమెంట్స్ ప్రేక్షకులను అలరిస్తాయి.
రవితేజ ఫ్యాన్స్ ఆయన కోసం .. ఆయన స్టైల్ కోసమైనా ఈ సినిమాను థియేటర్‌లో తప్పక చూడాలి అంటున్నారు జనాలు..!
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి