എൽഡിഎഫിന് തൃക്കാക്കരയിൽ പിഴച്ചതെങ്ങനെ? തൃക്കാക്കരയിലെ വിജയത്തോടെ നിയമസഭയിൽ 100 സീറ്റ് തികയ്ക്കാമെന്ന ഇടതുമുന്നണിയുടെ പ്രതീക്ഷയും ആത്‌മവിശ്വാസവുമാണ് തകർന്നത്. മുഖ്യമന്ത്രി പിണറായി വിജയനെ മുന്നിൽ നിർത്തി സർവസന്നാഹങ്ങളുമായി പോരാടിയിട്ടും തൃക്കാക്കര ഉപതെരഞ്ഞെടുപ്പിൽ എൽഡിഎഫ് നേരിട്ടത് കനത്ത തിരിച്ചടി. തെരഞ്ഞെടുപ്പ് പ്രചാരണത്തിന് മുഖ്യമന്ത്രി മുന്നിൽ നിന്നപ്പോൾ എൽഡിഎഫ് കൺവീനറായ ഇ പി ജയരാജൻ്റെയും മന്ത്രിയായ പി രാജീവിൻ്റെയും മേൽനോട്ടത്തിലാണ് തെരഞ്ഞെടുപ്പ് പ്രവർത്തനങ്ങൾ ഇടതുമുന്നണി ഏകോപിപ്പിച്ചത്.
70 എംഎൽഎമാരെ പ്രചാരണത്തിനിറക്കുകയും ഓരോ ലോക്കൽ കമ്മിറ്റിക്ക് കീഴിലായി എംഎൽഎമാരെ വിന്യസിക്കുകയും ബൂത്ത് തലത്തിൽ എംഎൽഎമാരെ പ്രചാരണത്തിറക്കാനും സിപിഎമ്മിനായി. യുഡിഎഫിൻ്റെ കുത്തക മണ്ഡലമായ തൃക്കാക്കരയിൽ മന്ത്രമാരെയും എംഎൽഎമാരെയും പാർട്ടിയുടെ സകല സംവിധാനങ്ങളെയും അണിനിരത്തിയാണ് എൽഡിഎഫ് തെരഞ്ഞെടുപ്പിനെ നേരിട്ടത്. തൃക്കാക്കരയിൽ വിജയം സംഭവിച്ചാൽ സിൽവർലൈൻ പദ്ധതിയുമായി ബന്ധപ്പെട്ട വിവാദങ്ങളുടെ വായടപ്പിക്കാമെന്ന ഉറച്ച വിശ്വാസം സിപിഎമ്മിനുണ്ടായിരുന്നു. എന്നാൽ, പദ്ധതിയുടെ ഭാഗമായി സംസ്ഥാനത്താകെ അലയടിച്ച പ്രതിഷേധം തൃക്കാക്കരയിൽ യുഡിഎഫിന് നേട്ടമായെന്ന് വേണം കരുതാൻ.
സിപിഎമ്മിൻ്റെയോ എൽഡിഎഫിൻ്റെയോ ഭാവി നിർണയിക്കുന്നതിലും സർക്കാരിനെ ഒരു തരത്തിലും ബാധിക്കുകയും ചെയ്യാത്ത തൃക്കാക്കര ഉപതെരഞ്ഞെടുപ്പിൽ സർവ സന്നാഹങ്ങളുമായി തെരഞ്ഞെടുപ്പിനെ നേരിടാൻ സിപിഎം തീരുമാനിച്ചതിന് പിന്നിൽ നിരവധി കാരണങ്ങളുണ്ടായിരുന്നു. മണ്ഡലം രൂപീകരിച്ച നാൾമുതൽ തൃക്കാക്കര ഇടതുമുന്നണിക്ക് കിട്ടാക്കനിയാണ്. 2011ൽ ബെന്നി ബഹനാനും 2016, 2021 നിയമസഭാ തെരഞ്ഞെടുപ്പിൽ പി ടി തോമസും മികച്ച വിജയം നേടിയെ മണ്ഡലത്തിൽ ഇത്തവണ സിപിഎമ്മിന് തുടക്കം മുതൽ വീഴ്ചയുണ്ടായി. ജില്ലാ കമ്മിറ്റി നിർദേശിച്ച അരുൺകുമാർ സ്ഥാനാർഥിയാകുമെന്ന പ്രചാരണവും ചുവരെഴുത്തും ആദ്യഘട്ടത്തിലുണ്ടായി. എന്നാൽ അപ്രതീക്ഷിത നീക്കത്തിനിടെ ജോ ജോസഫ് ഇടതുമുന്നണി സ്ഥാനാർഥിയായി. കോൺഗ്രസിൻ്റെയും യുഡിഎഫിൻ്റെയും ഉറച്ച മണ്ഡലം എന്നത് ഇടതുമുന്നണിക്ക് ഇത്തവണയും തിരിച്ചടിയായി.
ജോ ജോസഫിൻ്റെ സ്ഥാനാർഥിത്വം പ്രഖ്യാപിച്ചതിൽ പോലും നാടകീയത രൂക്ഷമായിരുന്നു. സീറോ മലബാർ സഭയുടെ കീഴിലുള്ള ലിസി ആശുപത്രിയിൽ വെച്ച് മാധ്യമപ്രവർത്തകരെ കണ്ടത് എൽഡിഎഫിന് തലവേദനയായി. സഭയുടെ സ്ഥാനാർഥിയെന്ന വിശേഷണം പോലും ഇടതുപക്ഷത്തെ പിന്നീട് തിരിഞ്ഞുകൊത്തി. മണ്ഡലത്തിലെ പ്രചാരണ പ്രവർത്തനങ്ങളോട് നൂറ് ശതമാനം കൂറുപുലർത്താൻ ഇടതുപക്ഷത്തിനായെങ്കിലും വോട്ടുകൾ അനുകൂലമാകാത്തതിന് കാരണം ഒന്നിലധികം കാരണങ്ങളുണ്ട്. യുഡിഎഫിൻ്റെയും കോൺഗ്രസിൻ്റെയും ഉറച്ച മണ്ഡലം, ട്വൻ്റി20 - ആം ആദ്മി വോട്ടുകൾ, മണ്ഡലത്തിൽ ഉമ തോമസിനോട് ഉയർന്ന സഹതാപതരംഗം, കെ റെയിൽ വിവാദങ്ങൾ എന്നിവ യുഡിഎഫ് സ്ഥാനാർഥിക്ക് നേട്ടമായി.
Find out more:
click and follow Indiaherald WhatsApp channel