పిల్లలు అన్న తర్వాత కొత్త కారు బొమ్మ కావాలని కోరుకోవడం సర్వసాధారణం.. ఇందులో కొత్త ఏముంది అని అనుకుంటున్నారు కదా. అయితే బొమ్మకారుతో ఆడుకోవాలని ఆశపడిన ఆరేళ్లు, మూడేళ్ల వయసు కలిగిన ఇద్దరు బాలురు.. నిజమైన కారు డ్రైవింగ్ చేస్తూ బొమ్మ కారును కొనేందుకు వెళ్లారు. ఇది వినడానికి షాకింగ్ గా ఉంది కదా.. మలేషియాలోని లాంగ్ కావిలో ఇది నిజంగానే జరిగింది. దాదాపు 2.5 కిలోమీటర్ల వరకు అలాగే నిజమైన కారు నడిపారు. కానీ వాహనం అదుపుతప్పి ఓ విద్యుత్ స్తంభాన్ని ఢీకొట్టింది. అక్కడున్నా స్థానికులు పరుగున వచ్చి ప్రమాదానికి కారణమైన డ్రైవర్ ఎక్కడున్నాడో అని చూస్తే ఇద్దరు చిన్నారులు ఉండడం చూసి ఒక్కసారిగా ఆశ్చర్యపోయారు.
తల్లిదండ్రులు ఇంటి పనిలో నిమగ్నమై ఉన్న సమయంలో ఇలా అన్నదమ్ములు ఇద్దరు కూడా గుట్టు చప్పుడు కాకుండా ఇంట్లో ఉన్న కారును బయటకు తీసినట్లు పోలీసులు వెల్లడించారు. ఈ ప్రమాదంలో కారు ముందు భాగం ధ్వంసం కాగా ఆరేళ్ల బాలుడికి స్వల్ప గాయాలు అయ్యాయి. అయితే బొమ్మ కారు కొనేందుకుగాను ఇలా నిజమైన కారులో దుకాణానికి బయలుదేరినట్లు చిన్నారులు చెప్పడంతో పోలీసులు షాక్ అయ్యారు. అయితే తొలుత ఎవరో మద్యం మత్తులో కారు నడుపుతున్నట్లు భావించామని.. కానీ దగ్గరికి వెళ్లి చూస్తే అందులో పిల్లలు ఉన్నారని.. కానీ వారు క్షేమంగా ఉండడంతో ఊపిరి పీల్చుకున్నామని స్థానికులు చెబుతున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి