విజయ్ సేతుపతి, అరుముగ కుమార్ కాంబోలో ‘ఏస్’ అనే చిత్రం తెరకెక్కింది. ఈ మూవీలో రుక్మిణి వసంత్, దివ్యా పిళ్లై, యోగి బాబు వంటి వారు నటించారు. ఈ మూవీని తెలుగులోకి దర్శక, నిర్మాత బి. శివ ప్రసాద్ తన శ్రీ పద్మిణి సినిమాస్ బ్యానర్ మీద తీసుకు వచ్చారు. ఈ మూవీని తెలుగులో మే 23న బి. శివ ప్రసాద్ భారీ ఎత్తున రిలీజ్ చేశారు. మరి ఈ చిత్రానికి తెలుగు ఆడియెన్స్ నుంచి ఎలాంటి స్పందన వచ్చింది? ఏస్ మూవీ ఏ మేరకు మన తెలుగు వారిని ఆకట్టుకుంటుంది? అన్నది చూద్దాం.
కథ
జైలు నుంచి విడుదలైన బోల్ట్ కాశీ (విజయ్ సేతుపతి) కొత్త జీవితం కోసం మలేసియాకు వస్తాడు. అక్కడ జ్ఞానందం (యోగి బాబు) అతనికి ఆశ్రయం కల్పిస్తాడు. కల్పన (దివ్యా పిళ్లై) నడిపే హోటల్‌లో చెఫ్‌గా కాశీ పనిలో చేరతాడు. ఈ క్రమంలో, తన పెంపుడు తండ్రి రాజా దొరై (బబ్లూ) నుండి ఇంటిని విడిపించుకోవడానికి డబ్బు కూడబెడుతున్న రుక్మిణి (రుక్మిణి వసంత్)తో కాశీ ప్రేమలో పడతాడు.
మరోవైపు, కల్పన తన హోటల్ లోన్ కట్టలేక ఇబ్బందులు పడుతుంది. తన ప్రేయసి రుక్మిణి సమస్యను తీర్చడానికి, కల్పనకు సహాయం చేయడానికి, బోల్ట్ కాశీ, జ్ఞానందంతో కలిసి మలేసియాలో అక్రమ వ్యాపారాలు నడిపే ధర్మ (అవినాష్) వద్దకు డబ్బుల కోసం వెళ్తారు. అయితే, వడ్డీ కట్టడంలో ఆలస్యమైతే ప్రాణాలు తీసే ధర్మ ఉచ్చులో వారు చిక్కుకుంటారు.
ఈ ప్రమాదకరమైన పరిస్థితి నుంచి బోల్ట్ కాశీ ఎలా బయటపడతాడు? బ్యాంకు దోపిడీతో సంబంధం ఏమిటి? ఈ నేరాలన్నిటి నుంచి తప్పించుకుని, తాను ప్రేమించిన రుక్మిణితో సంతోషంగా జీవిస్తాడా? అసలు బోల్ట్ కాశీ గతం ఏమిటి? చివరికి అతను ఎలాంటి నిర్ణయం తీసుకుంటాడు? ఈ ప్రశ్నలన్నింటికీ సమాధానం తెలుసుకోవాలంటే సినిమా చూడాల్సిందే.
నటీనటులు
బోల్ట్ కాశీగా విజయ్ సేతుపతి కొత్త పాత్రలో కనిపించాడు. మొదటి సారి డార్క్ కామెడీని పండించాడు. ఇక యోగి బాబు అయితే ఆద్యంతం నవ్విస్తాడు. రుక్మిణి వసంత్ అందాలు అందరినీ మెస్మరైజ్ చేస్తాయి. దివ్యా పిళ్లైకి ఓ మంచి పాత్ర దక్కింది. బబ్లూకి ఓ డిఫరెంట్ రోల్ పడింది. అవినాష్ విలనిజం మెప్పిస్తుంది. మిగిలిన పాత్రలు తమ పరిధి మేరకు ఆకట్టుకుంటాయి.
విశ్లేషణ
ఏస్ మూవీ కోసం దర్శకుడు అరుముగ కుమార్ మంచి కథను రాసుకున్నాడు. ఆ కథను అంతే ఎంగేజింగ్‌గా ప్రజెంట్ చేశాడు. స్టార్టింగ్ నుంచి ఎండ్ వరకు ఎక్కడా బోర్ కొట్టించడు. ప్రేక్షకుల ఊహకు అందేలానే కథనం సాగుతూ ఉన్నా కూడా ఎక్కడా అయితే బోర్ కొట్టదు. విజయ్ సేతుపతి డార్క్ కామెడీ, యోగిబాబు టైమింగ్, రుక్మిణి వసంత్ అందాలు ఆ లోపాల్ని కప్పి పుచ్చేస్తుంటాయి. అలా సినిమాను ఎంగేజింగ్‌గా తీయడంలో దర్శకుడు సక్సెస్ అయ్యాడనిపిస్తుంది.
ప్రథమార్దం అంతా కూడా పరిచయాలతో సరిపోతుంది. అసలు కథ మొదలు అవ్వడానికి చాలా టైం తీసుకుంటాడు. ఫస్ట్ హాఫ్‌లో విజయ్ సేతుపతి, యోగిబాబు ట్రాక్.. హీరో హీరోయిన్ల పరిచయం, ప్రేమ వంటి సన్నివేశాలతో కూల్‌గా సాగుతుంది. విలన్ డెన్‌కు వెళ్లి అక్కడ పేకాట ఆడే సీన్ బాగుంటుంది. ఇంటర్వెల్‌కు అసలు కథ మొదలవుతుంది. సెకండాఫ్ అంతా కూడా అక్కడే తిరిగినట్టు అనిపిస్తుంది. బ్యాంక్‌లో దొంగిలించిన సొమ్ముతో హీరో ఎలా బయటపడతాడు? అసలు ఈ నేరాల్లోంచి ఎలా తప్పించుకుంటాడు? అనే పాయింట్లతో సెకండాఫ్ మరింత ఇంట్రెస్ట్‌గా ఉంటుంది. క్లైమాక్స్‌లో హీరో చేత డైరెక్టర్ ఆడించే ఆట, స్క్రీన్ ప్లే కొత్తగా ఉంటుంది. చివర్లో ఇచ్చిన ట్విస్ట్ ఆకట్టుకుంటుంది.
సాంకేతికతంగా ఈ చిత్రం అందరినీ మెప్పిస్తుంది. కెమెరామెన్ విజువల్స్ ఆకట్టుకుంటాయి. పాటలు వినసొంపుగా ఉంటాయి. శామ్ సీఎస్ ఆర్ఆర్ మెప్పిస్తుంది. ఎడిటింగ్‌లో కొన్ని చోట్ల లోపాలు కనిపిస్తాయి. ఇక ఇలాంటి ఓ ఎంగేజింగ్ మూవీని తెలుగు ప్రేక్షకులకు అందించి తన అభిరుచిని చాటుకున్నాడు దర్శక నిర్మాత బి. శివ ప్రసాద్. శ్రీ పద్మిణి సినిమాస్ బ్యానర్ మీద ఈ మూవీని తెలుగులోకి రిలీజ్ చేసి ఓ మంచి చిత్రాన్ని అయితే ఆడియెన్స్‌కు అందించారని చెప్పొచ్చు.
రేటింగ్ : 3.0/5.0
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి