విశాఖ ఉక్కు ఫ్యాక్టరీని రక్షించుకోడానికి అవసరమైతే పదవులకు సైతం రాజీనామా చేస్తామని చెప్పారు చంద్రబాబు. సీఎం జగన్ సైతం ఉక్కు ఫ్యాక్టరీ విషయంలో కఠిన నిర్ణయాలు తీసుకోవాలని కేంద్రంపై ఒత్తిడి పెంచాలని సూచించారు. ఉక్కు ఉద్యమాన్ని జగన్ ముందుండి నడిపించాలన్నారు చంద్రబాబు. ఈమేరకు ఆయన విశాఖ ఉక్కు పరిరక్షణ పోరాట సమితి కన్వీనర్ కు రాసిన లేఖలో పేర్కొన్నారు.
చంద్రబాబు నిజంగా కలసి పనిచేయాలనుకుంటే నేరుగా జగన్ కే లేఖ రాయాలి, ఆయనతోనే మాట్లాడాలి. ఆయితే బాబు మాత్రం విశాఖ ఉక్కు పరిరక్షణ పోరాట సమితికి లేఖ రాసి జగన్ ఉద్యమాన్ని ముందుండి నడిపించాలని కోరారు. చంద్రబాబు కోరినట్టు జగన్ ఈ ఉద్యమంకోసం ముందుకొస్తారా, అన్ని పార్టీలు కలసి పనిచేస్తాయా అనేది అనుమానమే.
విశాఖ ఉక్కు కర్మాగారం ప్రైవేటీకరణకు వ్యతిరేకంగా అసెంబ్లీలో తీర్మానం చేసి వైసీపీ తమ చిత్తశుద్ధి నిరూపించుకుంది. కేంద్రంలో అధికారంలో ఉన్న బీజేపీ మాత్రం అక్కడా ఇక్కడా డబుల్ గేమ్ ఆడుతోంది. ఓవైపు కేంద్ర మంత్రులు ప్రైవేటీకరణ ఖాయమేనంటారు, మరోవైపు రాష్ట్ర బీజేపీ నేతలు వినతిపత్రాలకు ఢిల్లీ వెళ్తారు. వీటిలో ఏది నిజం, ఎంత నిజం అనేతి తేలాల్సి ఉంది. ఉక్కు కర్మాగారాన్ని రక్షించుకోడానికి ఇప్పటికైనా ఉమ్మడి పోరాటం అనే అంశం తెరపైకి రావడం నిజంగా ఆహ్వానించాల్సిన పరిణామమే. పార్లమెంట్ లో ఏపీ ఎంపీలంతా ఉమ్మడిపోరాటం చేస్తే ఉక్కు ఫ్యాక్టరీయే సాదు, ప్రత్యేక హోదా కూడా రావాల్సిందే.
